31 C
Phnom Penh

តុលាការ​ផ្តន្ទាទោស​មន្ត្រី​យោធាពីរនាក់​ឲ្យ​ជាប់​ពន្ធនាគារ​មួយ​ឆ្នាំ​ពីបទ​ឆបោក

ដោយ ឌឹ ខេមបូឌា ដេលី

បទវិភាគ

មន្ត្រី​​​យោធា​​​ពី​​​រ​​​រូប​​​ត្រូវ​​​បាន​​​ចោទ​​​ប្រកាន់​​​ពីបទ​​​ឆបោក​​​ ហើយ​​​​ត្រូវ​​​បាន​​​ផ្តន្ទាទោស​​​ឲ្យ​​​ជាប់​​​ពន្ធនាគារ​​​មួយ​​​ឆ្នាំ​​​កាល​​​ពីម្សិល​មិញ​​​ពីបទទទួល​​សំណូក​​​ដើម្បី​​​រត់​​​ឯកសារ​​​ឲ្យ​​​បាន​​ជាប់​​​ជា​​​និស្សិត​​​ចូល​​​រៀន​​​នៅ​​​សាកល​​​វិទ្យា​​​ល័យ​​​​​​ការពារ​​​ជាតិ​​​ បើ​​​ទោះ​​​ជា​​​បុរស​​​ម្នាក់​​​ក្នុង​​​ចំណោម​​​បុរស​​​ទាំង​​​ពីរ​​​នាក់​​​នេះ​​​មិន​​​មាន​​​វត្ត​​​មាន​​​នៅ​​​ក្នុង​​​តុលាការ​​​ ហើយ​នៅ​បម្រើការ​ងារ ​នៅ​សាកលវិទ្យាល័យ​នៅ​​​ឡើយ​​​ក៏​​​ដោយ​​​។

​លោក អ៊ុក ស៊ីថន (កណ្តាល) ជា​​​មន្ត្រីយោធា​​​ ត្រូវ​​​បាន​​​នាំ​​​ចេញ​​​ទៅកាន់​​​រថយន្ត​​​នគ​​​របាល​​​ ដែល​​​រង់​​​ចាំ​​​នៅ​​​ខាង​​​ក្រៅ​​​សាលា​​​ដំបូង​​​រាជ​​​ធានី​​​ភ្នំពេញ​​​ បន្ទាប់​​​ពី​​​ត្រូវ​​​បាន​​​ផ្តន្ទាទោស​​​ឲ្យជាប់​​​ពន្ធនាគារ​​​ពីបទ​​​ឆបោក​​​។ រូបថតៈ សីុវ  ចាន់ណា​​​/The Cambodia Daily
​លោក អ៊ុក ស៊ីថន (កណ្តាល) ជា​​​មន្ត្រីយោធា​​​ ត្រូវ​​​បាន​​​នាំ​​​ចេញ​​​ទៅកាន់​​​រថយន្ត​​​នគ​​​របាល​​​ ដែល​​​រង់​​​ចាំ​​​នៅ​​​ខាង​​​ក្រៅ​​​សាលា​​​ដំបូង​​​រាជ​​​ធានី​​​ភ្នំពេញ​​​ បន្ទាប់​​​ពី​​​ត្រូវ​​​បាន​​​ផ្តន្ទាទោស​​​ឲ្យជាប់​​​ពន្ធនាគារ​​​ពីបទ​​​ឆបោក​​​។ រូបថតៈ សីុវ ចាន់ណា​​​/The Cambodia Daily

ដើម​​​បណ្តឹង​​​ ហេង​​​ រិទ្ធី បាន​​ផ្តល់​​​​ប្រាក់​​​ចំនួន​​​​​​ ១០.០០០​​​ដុល្លារ​​​ ទៅ​​​លោក​​​ គឹម សុខុន រដ្ឋ​​​បាល​​​ ​​​នៅ​​​សាកល​វិទ្យាល័យ​​​ការពារ​​​ជាតិ កាល​​​ពី​​​ខែ​​​តុលា​​​ ឆ្នាំ​​​២០១៣ជា​​​ថ្នូរ​​​នឹង​​​ការ​​​ទទួល​​​បាន​​​​​​សិទ្ធិ​​​ចូល​​​រៀន​​​នៅ​​​សាកល​​​វិទ្យាល័យ​​​នេះ សម្រាប់​​​ក្មួយ​​​ប្រុស​​​បី​​​នាក់។ លោក រិទ្ធី ដែល​​​ជា​​​មន្ត្រី​​​យោធា​​​មួយ​​​រូប បាន​​​ចាប់​​​ផ្តើម​​​មាន​​​ការ​​​សង្ស័យ​​​​​​ ថា ​​​លោក​​​បាន​​​ចាញ់​​​បោក​​​គេ​​​នៅ​​​ពេល​​​លោក​​​មិន​​​បាន​​​ទទួល​​​ព័ត៌​​​មាន​​​ពី​​​លោក សុខុន ក្នុង​​​រយៈ​​​ ពេល​​​បី​​​ខែ​​​តាម​​​ការ​​​ព្រម​​​ព្រៀង​​​គ្នា​​​។

នៅ​​​ក្នុង​​​របាយ​ការណ៍​​​ជា​​​លាយលក្ខណ​​​៍​​​អក្សរ​​​ដែល​​បាន​​​អាន​​​អំឡុង​​​សវនាការ​​​ជំនុំ​​​ជម្រះ​​​កាល​​​ពីថ្ងៃ​​​ទី​​​៨​​​ ខែ​​​តុលានៅ​​​សាលា​​​ដំបូង​​​​​​រាជ​​​ធានី​​​ភ្នំពេញ​​​ លោក សុខុន អះ​​​អាង​​​ថា លោក​​​បាន​​​ផ្តល់​​​ប្រាក់​​​៩.០០០​​​ដុល្លារ​នៃ​ប្រាក់​​​សំណូក​​​លើក​​​ដំបូង​​​ទៅ​លោកវរ​​​សេនីយ៍​​​​​​ ឯក​​​ ​​​អ៊ុក ​​​ស៊ីថន នៅ​​​នាយក​​​ដ្ឋាន​​​អធិការ​​​កិច្ច​​​ក្រសួង​​​ការពារ​​​ជាតិ​​​ ដោយ​​​សុំ​​​ឲ្យ​​​លោក​​​ជួយ​​​សម្រប​​​សម្រួល​​​កិច្ច​​​ការ​​​នេះ​​។

អំឡុង​​​សវនាការ​​​ជំនុំ​​​ជម្រះ​​​ដដែល​​​នេះ​​​ លោក ស៊ីថន សារភាពថា លោក​​​បាន​​​ទទួល​​​ប្រាក់​​​នេះ​​​មែន​​​ ប៉ុន្តែ បាន​​​អះ​​​អាង​​​ថា លោក​​​ទទួល​​​បាន​​​តែ​​​៧.៥០០​​​ដុល្លារ​​​ប៉ុណ្ណោះ។

ដោយ​ចេញ​​​សាលក្រម​​​ផ្តន្ទាទោស​​​​កាល​​​ពី​​​ម្សិលមិញ លោក តុប ឈុន​​​ហេង ចៅ​​​ក្រម​​​ប្រធាន​​​ក្រុម​​​ប្រឹក្សា​​​ជំនុំ​​​ជម្រះ​​​បាន​​​ផ្តន្ទា ទោស​​​បុរស​​​ទាំង​​​ពីរ​​​នាក់​​​នេះ​​​ឲ្យ​​​ជាប់​​​ពន្ធនា​​​គារ​​​រយៈ​​​ពេល​​​​មួយ​​​ឆ្នាំ​​​ ពិន័យ​​​ជា​​​ប្រាក់​​​ក្នុង​​​ម្នាក់​​​ៗ​​​​​​​​​ ១លាន​​​រៀល​​​ ហើយ​​​បាន​​​បង្គាប់​​​ឲ្យ​​​ពួក​​​គេ​​​បង់​​​ប្រាក់​​​សំណង​​​​​​ដល់​​​លោក រិទ្ធី ចំនួន​​​៨.០០០​​​ដុល្លារ​​​។

អវត្ត​​​មាន​​​របស់​​​លោក សុខុន សម្រាប់​រយៈពេល​នៃ​សវនាការ​​​ជំនុំ​​​ជម្រះ​​​ មិន​​​ត្រូវ​​​បាន​​​ពន្យល់​​​ឡើយ​​​ ហើយ​​​គេ​​​មិន​​​ទាន់​​​ច្បាស់​​​​ឡើយ​​​​­កាល​​​ពី​​​ម្សិល​​​មិញថា តើ​​​មាន​​​​​​ការ​​​ចេញ​​​ដីកា​​​ចាប់​​​ខ្លួន​​​រូប​​​គាត់ ឬ​​​យ៉ាង​​​ណា​​​នោះ។

លោក ស មឺុន​​​ សាកល​​​វិទ្យាធិការ​​​រង​​​នៃ​​​សាកល​​​វិទ្យាល័យ​​​ការ​​​ពារ​​​ជាតិ​​​បាន​​​មាន​​​ប្រសាសន៍​​​ថា លោក សុខុន នៅកន្លែង​ធ្វើ​​​ការ​​​កាល​​​ពីម្សិល​មិញ ហើយ​​​បាន​​​អះ​​​អាង​​​ថា ​​​លោក​​​​​​មិន​​​ដឹង​​ពីការ​​​​​​​ចោទ​​​ប្រកាន់​​​លើ​​​មន្ត្រី​​​រូប​​​នេះ​​​ទេ បើ​​​ទោះ​​​ណា​​​ជា​​​មាន​​​ការ​​​លើក​​​ឡើង​​​អំពី​​​ករណី​​​នេះ​​​កាលពី​ដើម​​​ខែ​​​នេះ​​​ក៏​​​ដោយ។

លោក ស មឺុន បានថ្លែង​​​ថា “ខ្ញុំ​​​មិន​​​បាន​​​ឃើញ​​​ ដីកា​​​បង្គាប់​​​របស់​​​តុលាការ​​ទេ ហើយ​​​គាត់​​​​​មាន​​​សេរីភាព​​​ដើរហើ​រដោយ​សេរី​នៅ​​​ឡើយ​​​​​​គិត​មក​​​ដល់​​​ព្រឹក​​​មិញ​​​នេះ។នៅពេល​​​ខ្ញុំ​​​ចាក​​​ចេញ​​​ពី​​​ការិយាល័យ​​​ខ្ញុំ ខ្ញុំ​​​បាន​​​ឃើញ​​​គាត់​​​ដើរ​​​ចុះ​​​តាម​​​ជណ្តើរ​​​ក្នុង​​​ឯកសណ្ឋាន​​​យោធា​​​”។

នៅ​​​ពេល​​​សួរ​​​ថា តើ​​​លោក សុខុន នៅ​​បម្រើ​​​ការងារ​​​នៅ​​​សាកល​​​វិទ្យាល័យ​​​ការពារ​​​ជាតិ​ដដែល​​​​ឬយ៉ាង​​​ណា​​​នោះ ​​​លោក ​​​អ៊ុង ​​​ស៊ាន សាកល​​​វិទ្យាធិការ​​​នៃ​​​សាកល​​​វិទ្យាល័យ​​​ការពារ​​​ជាតិ​​​​​​បាន​​​មាន​​​ប្រសាសន៍​​​ថា លោក​​​មិន​​​ច្បាស់​​​ទេ​​​ ពីព្រោះ​​​សាកលវិទ្យាល័យ​​​នេះ​​​មាន​​​បុគ្គលិក​​​ច្រើន​​​ណាស់​​​។ លោក​​​បាន​​​ថ្លែង​​​ថា “វា​​​ជា​​​បញ្ហា​​​បុគ្គល​​​ ហើយ​​​យើង​​​នឹង​​​អនុវត្ត​​​តាម​​​ច្បាប់​​​”។

លោក ឈុំ សុជាតិ អ្នក​​​នាំ​​​ពាក្យ​​​ក្រសួង​​​ការ​​​ ពារ​​​ជាតិ​​​បាន​​​មាន​​​ប្រសាសន៍​​​ថា រឿង​​​ក្ត​​​ី​​​នេះ​​​មិន​​​បាន​​​ឆ្លុះ​​​បញ្ចាំង​​​អំពី​​​បញ្ហា​​​ជា​​​ប្រព័ន្ធ​​​នៅ​​​ក្នុង​​​ក្រសួង​​​ឡើយ​​​ ដោយ​​​លោក​​​បន្ថែម​​​ថា ​​​ឥឡូវ​នេះ​បញ្ហា​​​នេះ​​​ផុត​​​ពីដៃ​​​របស់​​​ពួកគេ​​​ហើយ​​​។

លោក​​​បាន​​​​​​ថ្លែង​​​ថា “យើង​​​មាន​​​គោល​​​ការណ៍​​​ច្បាប់​​​ក្នុង​​​ការ​​​ជ្រើស​​​រើស​​​និស្សិត​​​ ហើយ​​​នៅពេល​មានប​ញ្ហាកើត​ឡើង យើង​​​នឹង​​​​​​ចាត​់​​​វិធានការ​​​តាម​​​ផ្លូវ​​​ច្បាប់​​​។ ក្រសួង​​​ការ​​​ពារ​​​ជាតិ​​​មិន​​​អាច​​​ធ្វើ​​​អ្វី​​​បាន​​​ឡើយ​​​”។

លោក សុត​​​ វុទ្ធី អនុប្រធាន​​​នាយក​​​​​​ដ្ឋាន​​​អធិការកិច្ច​​​​​​នៅ​​​ក្រសួង​​​នេះ​​​បាន​​​មាន​​​ប្រសាសន៍​​​​​​ ថា លោក​​​មិន​​​ដឹង​​​ថា តើ​​​លោក ស៊ីថន និង​​​ត្រូវ​​​ទទួលយក​​​មក​​​បម្រើ​​​ការ​​​ងារវិញ នៅ​​​ពេល​​​ត្រូ​​​វ​​​ បាន​​​ដោះលែង​​​ឬយ៉ាងណានោះ​​​​ឡើយ​​​។

លោក​​​បាន​​​ថ្លែង​​​ថា “យើង​​​ត្រូវ​​​រង់​​​ចាំ​​​​​​ ហើយ​​​​​​ យើង​​​នឹង​​​មាន​​​ការ​​​ពិភាក្សា​​​ផ្ទៃ​​​ក្នុង​​​។ យើង​​​រង់​​​ចាំ​​​ទទួល​​​​​​សាល​​​ក្រម​​​ផ្លូវ​​​ការ​​​​​​​​​ពី​​​តុលាការ​​​​​សិន​​​”៕ សារុន

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស