ក្រុមមន្ត្រីបាននិយាយកាលពីម្សិលមិញថា បន្ទាប់ពីមានការបណ្តេញចេញប្រជាជនប្រហែល១.០០០គ្រួសារដែលភាគច្រើនជាជនជាតិវៀតណាមរស់នៅក្នុងផ្ទះអណ្តែតទឹកក្នុងក្រុងកំពង់ឆ្នាំងកាលពីដើមខែនេះ មក ឥឡូវនេះអាជ្ញាធរខេត្តមានគម្រោងបណ្តេញប្រជាជនប្រហែល១.៥០០គ្រួសារទៀតដែលភាគច្រើនជាពលរដ្ឋខ្មែររស់នៅផ្នែកខាងត្បូងនៃទន្លេ។
ជាផ្នែកមួយនៃគម្រោងកែលម្អសោភណភាពក្រុង ជនជាតិវៀតណាមជាច្រើនគ្រួសារ ដែលរស់នៅក្នុងបឹងទន្លេសាប កណ្តាលក្រុងកំពង់ឆ្នាំង ត្រូវបានបង្ខំឲ្យបណ្តែតផ្ទះរបស់ខ្លួនចេញពីកន្លែងនោះ ហើយកាលពីថ្ងៃពុធ អាជ្ញាធរបានបន្តអនុវត្តបទបញ្ជានេះទៅកាន់កន្លែងតាំាងទីលំនៅផ្សេងទៀតក្នុងស្រុករលាប្អៀរជាប់គ្នានោះ។
លោក សូ សារ៉េត ប្រធានក្រុមប្រឹក្សាស្រុក និងលោក ម៉ម ជឿន អ្នកនាំពាក្យសាលាខេត្តបានបញ្ជាក់អះអាងពីបទបញ្ជាដែលបានធ្វើឡើងកាលពីម្សិលមិញ ប៉ុន្តែ មិនបានផ្តល់ព័ត៌មានលម្អិតអំពីសេចក្តីសម្រេចេនះទេ។
លោក ម៉ម ជឿន បានមានប្រសាសន៍ថា ”ខ្ញុំបានទទួលព័ត៌មាននៅក្នុងកិច្ចប្រជុំថា អាជ្ញាធរមានគម្រោងផ្លាស់ទីលំនៅគ្រួសារជាច្រើនដែលរស់នៅក្នុងផ្ទះអណ្តែតទឹកទៅកាន់ដីគោកវិញ ប៉ុន្តែ ខ្ញុំមិនទាន់មានព័ត៌មានលម្អិតអំពីករណីនេះទេ ពីព្រោះខ្ញុំមិនបានចូលរួមប្រជុំឡើយ”។
លោក ម៉ម ជឿន បានលើកឡើងត្រឹមតែថា គ្រួសារដែលត្រូវបានបណ្តេញចេញដូចជាគ្រួសារជនជាតិវៀតណាមជាច្រើន ដែលបានបណ្តេញចេញពីក្រុងកំពង់ឆ្នាំងនោះ នឹងត្រូវផ្តល់ដីមួយក្បាលឲ្យរស់នៅក្នុងពេលណាមួយពីរបីឆ្នាំក្រោយនេះ។
លោក ឆេង ញ៉ាន់ អភិបាលរងស្រុកដែល មិនអាចទាក់ទងបានកាលពីម្សិលមិញ ត្រូវបានកាសែតកោះសន្តិភាពដកស្រង់សម្តីដែលបាននិយាយថា អាជ្ញាធរកំពុងរៀបចំដីមួយក្បាលទំហំ៦០០មែ៉ត្រ គុណនឹង១.០០០ម៉ែត្រនៅជិតភូមិអណ្តែតទឹកនេះសម្រាប់ការតាំងទីលំនៅថ្មី។
អ្នកស្រី អៀង សុខ អាយុ៦១ឆ្នាំ ដែលលើកឡើងថា អ្នកស្រីបានរស់នៅក្នុងភូមិរយៈពេលប្រហែល៣០ឆ្នាំមកហើយបាននិយាយថា អ្នកស្រីធ្លាប់ដាំដំណាំអំឡុងរដូវប្រាំង ពីព្រោះផ្ទះរបស់អ្នកស្រីមួយផ្នែកស្ថិតនៅលើដីនេះ។
អ្នកស្រីបាននិយាយថា “គម្រោងនេះល្អពីព្រោះខ្ញុំនិងសមាជិកគ្រួសាររបស់ខ្ញុំមិនចង់រស់នៅលើទឹកឡើយ។ វាលំបាកខ្លាំងណាស់។ ឧទាហរណ៍នៅពេលមានខ្យល់ខ្លាំង ព្យុះ ឬរលកធំៗ វាធ្វើឲ្យខូចខាតទ្រព្យសម្បត្តិរបស់យើង”។
អ្នកស្រីបានបន្ថែមថា “ទោះយ៉ាងណា ខ្ញុំគិតថា ទំហំដីដែលពួកគេមានគម្រោងផ្តល់ឲ្យពួកយើង គឺតូចណាស់”៕ សារុន