អាជ្ញាធរក្នុងខេត្តរតនគិរីនិយាយថា ពួកគេបានរឹបអូសឈើប្រណីតខុសច្បាប់មួយរថយន្តតួរីសកាលពីថ្ងៃពុធ បន្ទាប់ពីរថយន្តនោះ បានបុកម៉ូតូមួយគ្រឿងនៅតាមផ្លូវទៅព្រំដែនវៀតណាម ប៉ុន្តែ បានលែងអ្នកបើករថយន្ត ពីព្រោះគាត់បានរងរបួស។
លោក កៅ សុភិន នាយប៉ុស្តិ៍ឃុំទីងចាក់ស្រុកបរកែវ បាននិយាយកាលពីម្សិលមិញថា ឈើមួយរថយន្តតួរីសនោះត្រូវបានគេដឹកតាមបណ្តោយផ្លូវជាតិ៧៨ ឆ្ពោះទៅច្រកព្រំដែនអន្តរជាតិក្នុងស្រុកអូរយ៉ាដាវ ស្រាប់តែពេលនោះវាបានបុកពីក្រោយម៉ូតូមួយគ្រឿងនៅម៉ោងប្រហែល៣និង៣០នាទីរសៀលថ្ងៃពុធ។
លោក សុភិន បាននិយាយថា “រថយន្តទេសចរណ៍នោះបានបុកម៉ូតូពីក្រោយ បន្ទាប់មកវាបានធ្លាក់ផ្លូវ ហើយបុកដើមឈើ។មនុស្ស ម្នាក់ក្នុងចំណោមមនុស្សបីនាក់នៅលើម៉ូតូបានរបួសធ្ងន់ដោយបាក់ជើងម្ខាង ហើយពួកគេឥឡូវនេះកំពុងសម្រាកព្យាបាលនៅមន្ទីរពេទ្យខេត្ត”។
លោកបាននិយាយថា “យើងបានឃាត់ខ្លួនអ្នកបើករថយន្តមួយរយៈពេលខ្លី ប៉ុន្តែ ដោយសារគាត់រងរបួសធ្ងន់ត្រង់ថ្ងាស និងទ្រូង យើងបានប្រគល់គាត់ទៅឲ្យគ្រួសារដើម្បី ឲ្យពួកគេអាចយកគាត់ទៅព្យាបាល”។
លោក សុភិន បាននិយាយថា អ្នកបើករថយន្តកំពុងបើកឆ្ពោះទៅព្រំដែនវៀតណាមជាទីដែលគាត់មានគម្រោងនឹងលក់ឈើនោះ។ នាយនគរបាលរូបនេះបាននិយាយថា រថយន្តទេសចរណ៍នោះបានផ្ទុកឈើធ្នង់ប្រហែល១០០ដុំ ជាប្រភេទឈើកម្រដែលអាចលក់បានរាប់រយដុល្លារក្នុងមួយមែ៉ត្រគូប។
លោកបាននិយាយថា ករណីនេះត្រូវបានបញ្ជូនទៅអាជ្ញាធរស្រុកហើយ រីឯឈើដែលរឹបអូសបានត្រូវរក្សាទុកនៅប៉ុស្តិ៍នគរបាលឃុំ។
អធិការរងស្រុក លោក រស់ វឌ្ឍនា បាននិយាយថា លោកបានទទួលរបាយការណ៍គ្រោះថ្នាក់ចរាចរណ៍នេះ ហើយនឹងហៅអ្នកបើករថយន្តឲ្យចូលខ្លួនរៀបចំសំណងឲ្យជនរងគ្រោះ ដើម្បីឲ្យគាត់រួចផុតពីរឿងក្តីនៅតុលាការ។ លោកបាននិយាយថា លោកមិនចាំឈ្មោះអ្នកបើករថយន្តនោះទេ។
ចំពោះឈើដែលរឹបអូសបាន អធិការរងរូបនេះ បាននិយាយថា លោកគ្មានបំណងធ្វើការពិន័យអ្នកបើករថយន្ត ឬតាមរកប្រភពឈើទេ ពីព្រោះលោកបានទទួលរងការគំរាម ដកស័ក្ដិ ព្រោះតែការព្យាយាមធ្វើដូច្នេះក្នុងពេលកន្លងមក។
លោក វឌ្ឍនា បាននិយាយថា “កាលពីពីរបីខែមុន ខ្ញុំបានឃាត់រថយន្តតួរីសដឹកឈើប្រណីត ប៉ុន្តែ មនុស្សមួយក្រុមបានមកជួបខ្ញុំ និងបានប្រាប់ខ្ញុំថា ឈើនោះជារបស់មេពួកគេ។ បន្ទាប់មកពួកគេបានបញ្ជាខ្ញុំឲ្យលែងអ្នកបើករថយន្ត និងឲ្យរថយន្តទៅ បើមិនដូច្នោះទេ មេរបស់ ពួកគេនឹងដកស័ក្តិពីស្មារបស់ខ្ញុំ”។
លោកបានបដិសេធមិនប្រាប់ភិនភាគក្រុមបុរសទាំងនោះ ឬមេរបស់ពួកគេទេ។
“ខ្ញុំមិនខ្វល់អំពីការចាត់វិធានការលើរថយន្តដឹកឈើទេ ចាប់តាំងពីខ្ញុំបានទទួលការគំរាមទម្លាក់ស័ក្តិ ពីព្រោះខ្ញុំជាមន្ត្រីប៉ូលិសតូចតាចម្នាក់ ហើយគ្មានអំណាចឃាត់ការដឹកឈើខុសច្បាប់ ពីព្រោះឈ្មួញឈើមានការការពារពីមនុស្សមានអំណាចក្នុងខេត្ត”។
នាយខណ្ឌរដ្ឋបាលខេត្តរតនគិរី លោក វង់ សុខសេរី បាននិយាយថា លោកបានដឹងអំពីការចាប់ឈើកាលពីថ្ងៃពុធ ហើយនឹងតាមរកអ្នកបើកបរដើម្បីពិន័យ ដែលផ្អែកលើតម្លៃឈើដែលរឹបអូសបាន។
លោកបាននិយាយថា “យើងបានទុកពេលមួយខែឲ្យអ្នកបើករថយន្តបង់ប្រាក់ពិន័យ។ ក្នុងករណីជនល្មើសមិនមកបង់ប្រាក់ពិន័យទេ យើងនឹងបញ្ជូនសំណុំរឿងនេះទៅតុលាការ”។
នៅពេលសួរអំពីការអះអាងរបស់លោក វឌ្ឍនា ថាក្រុមមន្ត្រីខេត្តពាក់ព័ន្ធនៅក្នុងការរកស៊ីកាប់ឈើខុសច្បាប់នៅតំបន់នោះ លោក សុខសេរី បានដាក់ទូរស័ព្ទចុះ៕ និត