យោងតាមកាសែតវៀតណាមនិងកម្ពុជាបានឲ្យដឹងថា ប្រទេសកម្ពុជានិងវៀតណាមបានព្រមព្រៀងពន្លឿនការវាស់វែងកំណត់ព្រំដែនរួមរបស់ខ្លួន ហើយមិនអនុញ្ញាតឲ្យ “កម្លាំងសត្រូវ” និង “ពួកជ្រុលនិយម” គំរាមកំហែងដល់សន្តិសុខអំឡុងកិច្ចប្រជុំរយៈពេល ពីរថ្ងៃក្នុងទីក្រុងហូជីមិញ ដែលបានបញ្ចប់កាលពីថ្ងៃពុធ។
កិច្ចប្រជុំលើកទី៧ស្ដីពីកិច្ចសហប្រតិ បត្តិការ និងការអភិវឌ្ឍបណ្តាខេត្តនៅតាមព្រំដែនដែលធ្វើជាសហប្រធានដោយលោក ស ខេង រដ្ឋមន្ត្រីក្រសួងមហាផ្ទៃ ធ្វើឡើងតែពីរបីខែប៉ុណ្ណោះបន្ទាប់ពីមានការតវ៉ាជាច្រើនលើកដែលដឹកនាំដោយគណបក្ស សង្គ្រោះជាតិ បណ្តាលឲ្យមានការប៉ះទង្គិចគ្នានៅតាមព្រំដែនដែលមានជម្លោះ ទីដែលប្រជាជនកម្ពុជាបានចោទប្រទេសវៀត ណាម ថាបានរំលោភយកដី។
អត្ថបទមួយនៅក្នុងកាសែតនគរបាលជាតិបានដកស្រង់សម្ដីរបស់លោក ព្រំ សុខា រដ្ឋលេខាធិការក្រសួងមហាផ្ទៃដែលបានលើកឡើងថា កិច្ចប្រជុំនេះបានកាត់បន្ថយភាពតានតឹងជុំវិញបញ្ហាព្រំដែន ហើយបានបង្កើតឲ្យមានទំនាក់ទំនងកាន់តែខ្លាំងក្លាជាងមុន ប្រសិនបើជម្លោះនៅពេលអនាគត កើតឡើង។
សេចក្ដីរាយការណ៍នេះមានខ្លឹមសារថា ”លោក ព្រំ សុខា ថ្លែងថា ភាពលំបាកដែលភាគីទាំងពីរបានប្រឈម ជាពិសេសបញ្ហាប្រឈមដែលបង្កឡើងដោយគណបក្សប្រឆាំង និងពួកជ្រុលនិយម ក៏ត្រូវបានលើកយកមកពិភាក្សា និងដោះស្រាយផងដែរ។ លើសពីនេះទៅទៀត ភាគីទាំងពីរគឺប្រទេស កម្ពុជា និងវៀតណាម យល់ព្រមទំនាក់ទំនងអំពីបញ្ហាប្រឈមទាំងអស់ដែលអាចកើតឡើងនៅពេលអនាគត”។ ក្រុមមន្ត្រីនៅក្រសួងមហាផ្ទៃមិនអាចទាក់ទងសុំអត្ថាធិប្បាយបានទេ។
យោងតាមខ្លឹមសារកិច្ចប្រជុំចុះផ្សាយនៅក្នុងកាសែត Thanh Nien News ភាគីទាំងពីរ “បាន យល់ព្រមពន្លឿនការកំណត់ព្រំដែនគោកការបោះបង្គោលព្រំដែន និងសន្យាមិនអនុញ្ញាតឲ្យកម្លាំងសត្រូវប្រើប្រាស់ទឹកដីរបស់ខ្លួនរៀងៗខ្លួនបំផ្លាញដល់សន្តិសុខ និងស្ថិរភាពរបស់ប្រទេសដទៃឡើយ”។
យោងតាមសេចក្ដីរាយការណ៍ព័ត៌មាននេះបានឲ្យដឹងថា គណៈប្រតិភូនៃប្រទេសទាំងពីរក៏បានព្រមព្រៀងធ្វើឲ្យប្រសើរឡើងនូវទំនាក់ទំនងពាណិជ្ជកម្មតាមព្រំដែន និងជំរុញពាណិជ្ជកម្មទ្វេភាគី ដែលបច្ចុប្បន្ននេះមានទឹកប្រាក់ប្រហែល២,៥ពាន់លានដុល្លារក្នុងមួយឆ្នាំដល់៥ពាន់លានដុល្លារ “នៅពេលអនាគត”។
សេចក្ដីរាយការណ៍ដដែលនេះលើកឡើងថា ពួកគេក៏បានពិភាក្សាអំពីជំនួយទៅ វិញទៅមកក្នុងវិស័យកសិកម្ម រុកា្ខប្រមាញ់ នេសាទ និងគាំពារសុខភាពផងដែរ ប៉ុន្តែមិនបានផ្ដល់ព័ត៌មានលម្អិតឡើយ។ ប្រទេសជិតខាងទាំងពីរនេះបានរៀបចំកិច្ចប្រជុំកន្លងមកផ្ដោតលើខេត្តនៅតាមព្រំដែនកាលពីឆ្នាំ២០១២ ហើយមានគម្រោងកោះប្រជុំម្ដងទៀតនៅឆ្នាំក្រោយក្នុងប្រទេសកម្ពុជា៕ សារុន