30 C
Phnom Penh

លោក សម រង្ស៊ី ​នឹង​ត្រូវ​ចាប់​ខ្លួន​​​​បញ្ជូន​​ទៅ​ពន្ធនាគារ​​ ពេល​វិល​ត្រឡប់​មកដល់​កម្ពុជា​វិញ​​

ដោយ ឌឹ ខេមបូឌា ដេលី

បទវិភាគ

​​លោក សម រង្ស៊ី ប្រធាន​គណបក្ស​ប្រឆាំង​​​​​នឹង​ត្រូវ​ចាប់​ខ្លួន​ពេល​​​​ធ្វើ​ដំណើរ​មក​ដល់​​​អាកាស​យាន​ដ្ឋាន​អន្តរជាតិ​ភ្នំពេញ​នៅ​យប់​នេះ​ បន្ទាប់ពី​​​បញ្ជាក់​​ថា ​លោក​នឹង​វិល​ត្រឡប់​ពី​បរទេស​វិញ​​តាម​ការ​គ្រោង​ទុក បើ​ទោះ​បី​ជា​​​​មាន​​​​​ដីកា​​​​តុលាការ​កាលពី​សប្ដាហ៍​មុន​​​បង្គាប់​ឲ្យ​ចាប់​ខ្លួន​លោក​ពីបទ​បរិហារកេរ្តិ៍​លោក ហោ ណាំហុង រដ្ឋមន្ត្រី​ក្រសួង​ការ​បរទេស​​យ៉ាងណា​ក្ដី។

​កាលពី​ថ្ងៃ​សុក្រ តុលាការ​បាន​ចេញ​ដីកា​ចាប់​ខ្លួន​​ប្រធាន​​គណបក្ស​សង្គ្រោះ​ជាតិ​រូប​នេះ ដែល​បាន​ស្ថិត​នៅ​ឯ​បរទេស​ចាប់​តាំង​ពី​ថ្ងៃ​ទី​៧ ខែ​វិច្ឆិកា​មក ពីបទ​បរិហារកេរ្តិ៍​ក្នុង​សំណុំរឿង​ប្ដឹង​លោក​កាលពី​ឆ្នាំ​២០០៨ ដែល​​មជ្ឈដ្ឋាន​ទូទៅ​យល់​ថា​ត្រូវ​បាន​​ចាត់​ទុក​ជា​មោឃៈ​​​ជា​ផ្នែក​មួយ​នៃ​ការ​​ព្រះរាជទាន​លើក​លែង​ទោស​សម្រាប់​លោក សម រង្ស៊ី ​​កាលពី​ឆ្នាំ​២០១៣។

​តាម​ទម្លាប់ លោក សម រង្ស៊ី តែង​តែ​ប្រើ​ប្រាស់​លិខិត​ឆ្លង​ដែន​បារាំង និង​​ផ្ទះ​របស់​លោក​​​​នៅ​ក្នុង​​ទីក្រុង​បា៉រីស​ ដើម្បី​​​គេច​វេះ​ពី​ការ​ផ្ដន្ទា​​ទោស​ជំរុញ​ដោយ​​ហេតុ​ផល​នយោ​បាយ​ ប៉ុន្តែ​​​​លោក​បាន​ថ្លែង​ទៅកាន់​ក្រុម​អ្នក​គាំទ្រ​​ក្នុង​ពិធី​ជួប​ជុំ​មួយ​​នៅ​​ប្រទេស​កូរ៉េ​ខាង​ត្បូង​ កាលពី​ថ្ងៃ​​សៅរ៍​ថា លើក​នេះ​​មិន​ដូច​លើក​មុន​​ឡើយ។

លោក សម រង្ស៊ី ជា​មួយ​នឹង​​វត្ត​មាន​លោក កឹម សុខា អនុប្រធាន​គណបក្ស​សង្គ្រោះ​ជាតិ​នៅ​អែប​អំឡុង​​ពិធី​មួយ​ក្នុង​ទីក្រុង​កំពង់ផែ​ប៊ូសាន (Busan) ​ដែល​មាន​ពលករ​ចំណាក​ស្រុក​​​​​ខ្មែរ​ប្រមាណ​៣០.០០០​នាក់​នៅ​ក្នុង​ប្រទេស​កូរ៉េ​ខាង​ត្បូង បាន​ស្រែក​ឡើង​ថា “ពួកគេ​​​នឹង​មក​ចាប់​ខ្លួន​ សម រង្ស៊ី។ តើ​ សម រង្ស៊ី ខ្លាច​ទេ? អត់​ទេ​!”។

លោក​​បាន​មាន​ប្រសាសន៍​ថា “​កម្ពុជា ​ជា​ប្រទេស​កំណើត​​ ជា​មាតុភូមិ​​​របស់​ខ្ញុំ ហើយ​ខ្ញុំ​ពិត​ជា​ត្រូវ​វិល​ត្រឡប់​​​ទៅ​វិញ​ដើម្បី​​សង្គ្រោះ​​ប្រទេស​របស់​យើង​។ គម្រោង​របស់​ខ្ញុំ​មិន​កែប្រែ​​ទេ​។ ទោះ​បី​ខ្ញុំ​ស្លាប់​ វា​គ្មាន​បញ្ហា​ទេ​។ ខ្ញុំ​នឹង​ស្លាប់​ក្នុង​នាម​ជា​ខ្មែរ​ ហើយ​មិន​ស្លាប់​បម្រើ​ជន​បរទេស​​ទេ​”។

លោក សម រង្ស៊ី និង​​​លោក កឹម សុខា ដែល​​​ជា​​​ប្រធាន​​​ និង​​​អនុប្រធាន​​​គណបក្ស​​​សង្គ្រោះ​​​ជាតិ​​​​​​ចាប់​​​ដៃ​​​គ្នា​​​លើក​​​ឡើង​​​លើ​​​​បង្ហាញ​​​ពី​​​សាមគ្គីភាព​​​​​ អំឡុង​​​ពិធីជួបជុំ​​​មួយ​​​របស់​​​គណបក្ស​​​សង្គ្រោះ​​​ជាតិ​​​នៅក្នុង​​​ប្រទេស​​​​​​កូរ៉េខាង​​​ត្បូង​​​កាល​​​ពីម្សិលមិញ។ រូបថតៈ ហ្វេសប៊ុក
លោក សម រង្ស៊ី និង​​​លោក កឹម សុខា ដែល​​​ជា​​​ប្រធាន​​​ និង​​​អនុប្រធាន​​​គណបក្ស​​​សង្គ្រោះ​​​ជាតិ​​​​​​ចាប់​​​ដៃ​​​គ្នា​​​លើក​​​ឡើង​​​លើ​​​​បង្ហាញ​​​ពី​​​សាមគ្គីភាព​​​​​ អំឡុង​​​ពិធីជួបជុំ​​​មួយ​​​របស់​​​គណបក្ស​​​សង្គ្រោះ​​​ជាតិ​​​នៅក្នុង​​​ប្រទេស​​​​​​កូរ៉េខាង​​​ត្បូង​​​កាល​​​ពីម្សិលមិញ។ រូបថតៈ ហ្វេសប៊ុក

មន្ត្រី​គណបក្ស​សង្គ្រោះ​ជាតិ​បាន​​លើក​ឡើង​​មុន​នេះ​កាលពី​ម្សិលមិញ​ថា ​ជើង​ហោះ​​​​ហើរ​​ដែល​លោក​ សម រង្ស៊ី ជិះ​ នឹង​​ចុះ​ចត​នៅ​អាកាសយាន​ដ្ឋាន​អន្តរជាតិ​សៀមរាប​ នៅ​ម៉ោង​ប្រហែល​១១​យប់ ប៉ុន្តែ​លោក យ៉ែម បុញ្ញរិទ្ធ អ្នក​នាំពាក្យ​គណបក្ស​នេះ ​បាន​មាន​ប្រសាសន៍​កាលពី​យប់​មិញ​ថា គម្រោង​នេះ​បាន​ផ្លាស់​ប្ដូរ​ ហើយ​ប្រធាន​គណបក្ស​ប្រឆាំង​រូប​នេះ​នឹង​​​​​ជិះ​ជើង​ហោះ​ហើរ​ចុះ​ចត​​​នៅ​​អាកាស​​​​​​​​យានដ្ឋាន​​​ភ្នំពេញ​វិញ។

លោក​​បាន​​លើក​ឡើង​បន្ថែម​ទៀត​​ថា “គាត់​នឹង​មក​ដល់​​ភ្នំពេញ​នៅ​ម៉ោង​១០​យប់។ មក​ដល់​ភ្នំពេញ​ប្រសើរ​ជាង​​មក​ដល់​​នៅ​សៀមរាប​”។

សូម​បញ្ជាក់​​ថា លោក សម រង្ស៊ី ប្រឈម​ការ​ជាប់​ពន្ធនាគារ​​​​រយៈ​ពេល​២​ឆ្នាំ​ទាក់​ទិន​សុន្ទរកថា​របស់​លោក​កាលពី​ឆ្នាំ​២០០៨​ ដែល​​​​ក្នុង​នោះ​លោក​បាន​ចោទ​ប្រកាន់​លោក ហោ ណាំហុង ថា​ជា​ប្រធាន​មន្ទីរ​ឃុំឃាំង​បឹង​ត្របែក ​របស់​ខ្មែរ​ក្រហម​ដែល​ឃុំឃាំង​​​​ក្រុម​បញ្ញវន្ត​ និង​​មន្ត្រី​ការទូត​​​ដែល​របប​ ប៉ុល ពត ​​បាន​ហៅ​​ឲ្យ​វិល​​ត្រឡប់​មក​កម្ពុជា​វិញ។

ការ​អះអាង​ទាំង​នេះ​ជា​ចំណុច​​រសើប​​​ខ្លាំង​​​សម្រាប់​លោក ហោ ណាំហុង ដែល​បាន​ច្រាន​​​​ចោល​វា​ជា​យូរ​មក​ហើយ​​។ កាលពី​ឆ្នាំ​២០១១​ ​​លោក​បាន​​ឈ្នះ​បណ្ដឹង​បរិហារកេរ្តិ៍​​ប្តឹង​​លោក សម រង្ស៊ី ដែល​បាន​បោះ​បង់​​បណ្ដឹង​ឧទ្ធរណ៍​ប៉ុន្មាន​ខែ​មុន​ពេល​​​ទទួល​បានការ​​ព្រះរាជ​ទាន​​​លើក​លែង​ទោស​កាលពី​ឆ្នាំ​២០១៣ សម្រាប់​​​​ការ​ផ្ដន្ទាទោស​ជាច្រើន​ផ្សេង​ទៀត​។

ទោះ​ជា​យ៉ាង​ណា លោក សម រង្ស៊ី និង​គណបក្ស​សង្គ្រោះ​ជាតិ​​​ភ្ញាក់​ផ្អើល​យ៉ាង​ខ្លាំង​ដោយសារ​ការ​​​ព្រះរាជទាន​​លើក​លែង​ទោស​​​​ដែល​​លោក​ទទួល​បាន ​មិន​បាន​គ្រប​ដណ្ដប់​​បណ្ដឹង​បរិហារកេរ្តិ៍ ហើយ​មេធាវី​របស់​លោក ​​​ហោ ណាំហុង បាន​សរសេរ​សំណើ​ទៅ​​សាលា​​​ដំបូង​រាជធានី​កាលពី​សប្ដាហ៍​មុន​ ដើម្បី​ស្នើ​ឲ្យ​អនុវត្ត​សេចក្ដី​សម្រេច​កាលពី​ឆ្នាំ​២០១១​។

​លោក ការ សាវុត្ថ មេធាវី​របស់​លោក ហោ ណាំហុង បាន​មាន​ប្រសាសន៍​​កាល​ពី​ម្សិល​មិញ​អំពី​សំណើ​នេះ​​ថា ”​នេះ​មិនពាក់​ព័ន្ធ​​​រឿង​នយោបាយ​ទេ យើង​គ្រាន់​តែ​ចង់​អនុវត្ត​ច្បាប់​ប៉ុណ្ណោះ។ នេះ​ជា​សិទ្ធិ​របស់​យើង​​អំឡុង​​រយៈ​ពេល​​៥ឆ្នាំ​ [អាជ្ញាយុកាល​]។ យើង​អាច​ដាក់​ពាក្យ​បណ្ដឹង​ថ្ងៃ​ណាក៏​បាន​”។

ឧត្ដម​សេនីយ៍ឯក​ គៀត ច័ន្ទថារិទ្ធ អ្នក​នាំ​ពាក្យ​អគ្គស្នងការដ្ឋាន​នគរ​បាល​ជាតិ​ បាន​មាន​ប្រសាសន៍​ថា នៅ​ពេល​លោក សម រង្ស៊ី ​ត្រឡប់​​​​​មក​ដល់​កម្ពុជា​វិញ នគរ​បាល​នឹង​អនុវត្ត​​ដីកា​ចាប់​ខ្លួន​នេះ។ លោកបាន​​ថ្លែង​ថា “​យើង​នឹង​អនុវត្ត​ច្បាប់​។ នោះ​ជា​ភារកិច្ច​របស់​នគរ​បាល​ នគរ​បាល​អនុវត្ត​ច្បាប់​​​ នៅ​ពេល​​តុលាការ​​បង្គាប់​។ ដូច្នេះ​នគរ​បាល​ត្រូវ​តែ​អនុវត្ត​ វា​ជា​​ភារកិច្ច​របស់​ពួកគេ”។

ពេល​សាក​សួរ​ថា​ តើ​នគរ​បាល​​ព្រួយ​បារម្ភ​​​អំពី​លទ្ធភាព​ដែល​អ្នក​គាំទ្រ​របស់​លោក សម រង្ស៊ី អាច​នឹង​បង្ហាញ​មុខ​តាម​ផ្លូវ​​ដើម្បី​​ប្រឆាំង​ការ​ចាប់​ខ្លួន​លោក ​​ឬយ៉ាង​ណា​នោះ ​អ្នក​នាំ​ពាក្យ​រូប​នេះ​​​បាន​មាន​ប្រសាសន៍​ថា នគរ​បាល​​អាច​ដោះ​ស្រាយ​ស្ថានភាព​​បាន​។ លោក​​​បាន​បន្ត​​ថា “​នគរ​បាល​​ដឹង​ថា ត្រូវ​​​​ធ្វើ​ការ​ងារ​របស់​ខ្លួន​យ៉ាង​ម៉េច​ហើយ​។ យើង​ក៏​ព្រួយបារម្ភ​ដែរ​ ប៉ុន្តែ​ពេល​ពួកគេ​​មក​អនុវត្ត​ ពួកគេ​ដឹង​ថា​ត្រូវ​ធ្វើ​យ៉ាង​​ម៉េច​ហើយ​”។​

​ក្រោយ​ពី​មាន​ព័ត៌មាន​ទាក់​ទិន​​ដីកា​ចាប់​ខ្លួន​​​នេះ​​ ក្រសួង​ការ​បរទេស​សហរដ្ឋអាមេរិក​​បាន​​​​អះអាង​ថា ខ្លួន​​​​ព្រួយបារម្ភ​​​អំពី “បរិយាកាស​នយោបាយ​​ដែល​កាន់​តែ​អាក្រក់​ទៅៗ​នៅ​​កម្ពុជា​​ ក្នុង​រយៈ​ពេល​ប៉ុន្មាន​សប្ដាហ៍​ថ្មីៗ​នេះ”។

អំឡុង​សន្និសីទ​កាសែត​ក្នុង​រដ្ឋធានី​វ៉ាស៊ីន​តោន លោក ម៉ាក ថូណឺ (Mark Toner)​ អ្នក​នាំពាក្យ​​​​​ក្រសួង​ការ​បរទេស​សហ​រដ្ឋ​អាមេរិក ​​​​​បាន​​គូស​​​​បញ្ជាក់​​ថា ដីកា​ចាប់​ខ្លួន​នេះ​​​​កើត​មាន​​ឡើង​ក្រោយ​​ហេតុ​ការណ៍​​​​វាយ​តំណាង​រាស្ត្រ ​គណ​បក្ស​សង្គ្រោះ​ជាតិ​​​ នៅ​ក្រៅ​រដ្ឋ​​​សភា​កាលពី​ចុង​ខែ​មុន។

លោក​មាន​​ប្រសាសន៍​ថា “​ពេល​វេលា​​នៃ​បទ​ចោទ​ប្រកាន់​ទាំង​នេះ​​បង្ហាញ​ពី​​ឥទ្ធិពល​នយោបាយ​នៅ​ក្នុង​ដំណើរ​ការ​យុត្តិធម៌​។ លើស​ពី​នេះ​ទៅទៀត​ គំរូ​នៃ​ចំណាត់​ការ​​លើ​​​គណបក្ស​ប្រឆាំង​​នេះ ​បង្ហាញ​ពី​ការ​វិល​ទៅ​រក​​​ការ​អនុវត្ត​​ និង​យុទ្ធ​សាស្ត្រ​នយោបាយ​​ឃោរ​ឃៅ​ដែល​ប្រជាពលរដ្ឋ​កម្ពុជា​​ បាន​បង្ហាញ​​យ៉ាង​​​​ច្បាស់​ថា ពួកគាត់​​​​លែង​ចង់​បាន​តទៅទៀត​”។​​​​​​​​​​​​​​​​​

លោក សាយម៉ុន ស្ព្រីនហ្គ័រ​​​ (Simon Springer)  សាស្ត្រាចារ្យ​​​​​​នៅ​​​សាកលវិទ្យាល័យ​​​​​​​វីកតូរៀ​​​ (University of Victoria) ក្នុង​​​ប្រទេស​​​កាណាដា ដែល​​​​បាន​សិក្សា​​​ស្រាវ​​​ជ្រាវ​​​​អំពី​​​​ការ​​​​វិវឌ្ឍ​ផ្នែក​​​​នយោបាយ​​​​​​​នៅ​​កម្ពុជា​​​ក្នុង​​​រយៈ​​​ពេល​​​​​​មួយ​​​ទស​វត្សរ៍​​​កន្លង​​​មក​​​នេះ ​​​​​​បាន​​​លើក​​​ឡើង​​​ថា ​ដីកា​​​ចាប់ខ្លួន លោក សម រង្ស៊ី ​ភ្លាមៗ​នេះ​បង្ហាញ​​​ថា ​​លោក​​​នាយក​​​រដ្ឋ​​​មន្ត្រី ហ៊ុន​​​ សែន​​​ កំពុង​​​ចាប់​​​ផ្តើម​​​ភ័យ ​​​ស្លន់​​​ស្លោ​​​។

លោក​​​បាន​​​លើក​​​ឡើង​​​តាម​​​រយៈ​​​អីុម៉េល​​​មួយ​​​ថា “ដីកា​​​ចាប់​​​ខ្លួន​​​ភ្លាម​​​ៗ​​​ថ្មី​​​បំផុត​​​នេះ​​​ធ្វើ​​​ឡើង​​​ភ្លាម​​​ៗ​​​ បន្ទាប់​​​ពី​​​ជ័យ​​​ជម្នះ​​​ក្នុង​​​ពេល​​​ថ្មី​​​ៗ​​​របស់​​​លោក​​​ស្រី អ៊ុង សាន ស៊ូជី នៅ​​​ក្នុង​​​ប្រទេស ​​​មីយ៉ាន់ម៉ា ដោយ​​​វា​​​បង្ហាយ​​​ឲ្យ​​​ឃើញយ៉ាង​​​​ច្បាស់​​​ថា លោក ហ៊ុន សែន កំពុង​​​តែ​​​ភ័យ​​​ខ្លាច​​​។​​ គាត់​​​កំពុង​​​តែ​​​ធ្វើ​​​ដូច​​​​​​អ្វ​​ី​​​ដែល​​​ជន​​​ផ្តាច់​​​ការ​​​ទាំង​​​អស់​​​ធ្វើ​​​​​​… ពោល​គឺ​​​​​សម្ដែង​​​ចេញ​​​​នូវ​​​សកម្មភាព​​​ភ័យ​​​ខ្លាច​​​យ៉ាង​​​ខ្លាំង​​​”។

លោក​​​បាន​​​បន្ថែម​​​ថា “ឥឡូវ​​​នេះ​​​ពល​​​រដ្ឋ​​​ខ្មែរ​​​ដឹង​​​ថា ការ​​​ផ្លាស់​​​ប្តូរ​​​អាច​​​ទៅ​​​រួច​​​ ហើយ​​​​​​លោក ហ៊ុន សែន អាច​​​ប្រវេប្រវា​​​គ្រប់​​​មធ្យោ​​​បាយ​​​តាម​​​ចិត្ត​​​ចង់​​​ដើម្បី​​​ជួស​​​ជុល​​​ទំនប់​​​ដែល​​​ប្រេះ​​ស្រាំ​​​ ប៉ុន្តែ ខ្ញុំ​​​គិត​​​ថា ទោះ​​​ជា​​​មាន​​​ការ​​​ជួស​​​ជុល​​​យ៉ាង​​​ណា​​​ក៏​​​ដោយ ក៏​​​វា​​​មិន​​​អាច​​​ទប់​​​ទំនប់​​​ទឹក​​មិន​ឲ្យ​​​បាក់​​​ធ្លាយបាន​​​​ដែរ​​​”។

លោក អៀ​ សុផល​​​ អ្នក​​​និពន្ធ​​​សៀវ​​​ភៅ​​​”ការ​​​​​​​​ពឹង​​​ផ្អែក​​​ជំនួយ​​​នៅ​​​កម្ពុជា៖ វិធី​ដែល​ជំនួយ​​​បរទេស​​​ធ្វើ​​​ឲ្យ​​​ខូច​​​ដល់​​​លទ្ធិ​ប្រជា​ធិបតេយ្យ​​​” បាន​​​លើក​​​ឡើង​​​ថា ប្រសិន​​​បើ​​​ លោក​ សម ​រង្ស៊ី ​ត្រឡប់​​​មក​​​វិញ​​​នៅ​​​យប់​​​នេះ​​​វា​​​នឹង​​​ធ្វើ​​​ឲ្យ​​​ស្ថាន​ភាព​​​​​នយោបាយ​​​រយៈ​​​ពេល​​​២០​​​ឆ្នាំ​​​​​​​​​នៅ​​​កម្ពុជា​​​មាន​​​ការ​​​ផ្លាស់​​​ប្តូរ​​​ ដោយ​​​ធ្វើ​​​ឲ្យ​​​រដ្ឋាភិបាល​​​ធ្លាក់​​​ក្នុង​​​ស្ថានភាព​​​មួយ​​​ដែល​​​​​​ខ្លួន​​​​​​មិន​​​ធ្លាប់​​​ជួប​​​ពី​​​មុន​​​មក។

លោក​​​បាន​​​សរសេរ​​​នៅ​​​ក្នុង​​​អីុម៉េល​​​មួយ​​​ថា “លោក សម រង្ស៊ី មិន​​​មែន​​​ជា​​​អ្នក​​​ហ៊ាន​​​ប្រថុយ​​​នោះ​​​ទេ​​​ នៅ​​​ពេល​​​កើត​​​មាន​​​រឿង​​​ចាប់​​​​ដាក់​​​ពន្ធនាគារ​​​។ ខ្ញុំ​​​គិត​​​ថា គាត់​​​មិន​​​ដែល​​​​​​ធ្លាប់​​​ជាប់​​​ពន្ធនាគារ​​​សូម្បី​​​តែ​​​មួយ​​​ថ្ងៃ​​​នៅ​​​កម្ពុជា​​​ មិន​​​ដូច​​​លោក កឹម សុខា លោក ម៉ម សូណង់​​​ដូ ​​​[ម្ចាស់​​​ ស្ថានីយវិទ្យុ​​​ប្រឆាំង​​​ដ៏​​​មាន​​​ប្រជាប្រិយភាព]​​​និង​​​សកម្មជន​​​ព្រមទាំង​​​​អ្នក​​​នយោបាយ​​​មួយ​​​ចំនួន​​​ទៀត​​​ឡើយ​​​”។

លោក​​​​​​បន្ថែម​​​ទៀត​​​ថា “សមត្ថកិច្ច​ប្រាកដ​ថា គាត់នឹង​​មិន​វិល​ត្រឡប់​មក​​កម្ពុជា​វិញ​ទេ​​ ហើយ​នឹង​​​​ធ្វើ​​​ដំណើរ​​​ទៅ​​​ប្រទេស​​​បារាំង​​ដើម្បី​​​​រស់​​​នៅ​​​​​​បែប​និរទេស​​​ខ្លួន​​​នៅ​​​ទី​​​នោះ​តាម​​ទម្លាប់​​​​​ដូច​សព្វ​ដង​​​​របស់​​​គាត់​​​​។ បើ​​​មិន​​​​អ៊ីចឹង​ទេ​​​​ ម៉េច​​​​បាន​​​ជា​​​ពួក​​​គេ​​​រង់​​​ចាំ​​​រហូត​​​ដល់​​​គាត់​​​ទៅ​​​ប្រទេស​​​​​​កូរ៉េខាង​​​ត្បូង​​​ ទើប​​​ចេញ​​​ដីកា​​​ចាប់​​​ខ្លួន​​​​​​?”។

លោក ខាល ថាយ័រ (Carl Thayer) អ្នក​​​ជំនាញ​​​​​​ខាង​តំបន់​​​អាស៊ី​​​អាគ្នេយ៍​​​នៅ​​​បណ្ឌិត្យ​​​​សភា​​​កង​​​កម្លាំង​​​ការ​​​ពារ​​​ជាតិ​​​អូស្ត្រាលី​​​ (Australian Defense Force Academy) នៅ​​​ក្នុង​​​ទី​​​ក្រុង​​​កង់​​​បេរ៉ា​​​  បាន​​​លើក​​​ឡើង​​​ថា ប្រសិន​​​បើ​​​លោក សម ​​​រង្ស៊ី ​​​​ធ្វើ​​​តាម​​​ការ​​​សន្យា​​​របស់​​​លោក​​​វិល​​​ត្រឡប់​​​មក​​​វិញ​​​វា​​​នឹង​​​បង្កើន​​​ភាព​​​គ្រោះ​​​ថ្នាក់​​ខ្លាំង​ដល់​​​លោក ហ៊ុន សែន ​​​។

លោក​​​បាន​​​លើក​​​ឡើង​​​តាម​​​រយៈ​​​អីុម៉េល​​​មួយ​​​ថា “លោក ហ៊ុន សែន កំពុង​​​តែ​​​លេង​​​ល្បែង​​​​ដ៏​វែង​អន្លាយ​នេះ​។ គ្មាន​​​ជម្រើស​​​ងាយ​​​​​​ស្រួល​​​សម្រាប់​​​លោក​​​ សម ​​​រង្ស៊ី ​​​ឡើយ។  ​​​ព្រះ​​​មហាក្សត្រ​​​អាច​​​ព្រះរាជទាន​លើក​​​លែង​​​ទោស​​​​​​​​​បាន​។ ប៉ុន្តែ ប្រសិន​​​បើ​​​ព្រះ​​​អង្គ​​​មិន​​​ធ្វើ​​​ដូច្នេះ​​​ទេ​​​ លោក សម រង្ស៊ី ប្រឈម​​​នឹង​​​ការ​​​បាត់​​​បង់​​​អភ័យ​​​ឯកសិទ្ធិ​​​សភា​ និង​​​សិទ្ធិ​​​ឈរ​​​ឈ្មោះ​​​សម្រាប់​​​ការ​​​បោះ​​​ឆ្នោត​​​”។

លោក​​​បាន​​​បន្ថែម​​​ថា “ប្រសិន​​​បើ​​​គាត់​​​​ជាប់​​​​ពន្ធនាគារ​​​ ហើយ​​​​បូជា​​ដើម្បី​បុព្វហេតុ​​ខ្លួន​ វា​​​អាច​​​ធ្វើ​​​ឲ្យ​​​កើត​​​មាន​​​បាតុកម្ម​​​តាម​​​ផ្លូវ​​​ដែល​​​កង​​​សន្តិសុខ​​​របស់​​​លោក ហ៊ុន សែន នឹង​​​បង្ក្រាប​​​។ ​​​ការ​​​​ជាប់​​​​ពន្ធនាគារ​​​នឹង​​​​បង្វែរ​ការ​​ចាប់​អារម្មណ៍​​​​របស់​​​​លោក សម រង្ស៊ី ​​​​ពី​​​​ល្បែង​​​ដ៏​​​សំខាន់​​​ដែល​​​នឹង​​​ឈ្នះ​​​ការ​​​បោះឆ្នោត​​​នៅ​​​អាណត្តិ​​​ក្រោយ​​​”។

លោក​​​បាន​​​លើក​​​ឡើង​​​ទៀត​​​ថា “ជម្រើស​​​ល្អ​​​បំផុត​​​របស់​​​លោក សម រង្ស៊ី គឺ​​​វិល​​​ត្រឡប់ មក​​​ភ្នំពេញ​​​​​​វិញ​​​ តតាំង​​​នឹង​​​ការ​​​ចោទ​​​ប្រកាន់ ​​​ហើយ​​​កៀងគរ​​​ការ​​​គាំទ្រ​​​ពី​​​សាធារណជន​​​សម្រាប់​​​​​​​​បុព្វហេតុ​របស់គាត់​​​​។ និយាយ​​​តាម​​​បែប​​​ម្យ៉ាង​​​ទៀត គឺ​ការ​​​ប៉ះទង្គិច​​​គ្នា​រវាង​​​គណ​​​បក្ស​​​ប្រជា​​​ជន​​​កម្ពុជា និង​​​គណបក្ស​​​សង្គ្រោះ​​​ជាតិ​​​ស្ទើរ​​​តែ​​​មិន​​​អាច​​​​ចៀស​​​​ផុត​​​”។

លោក សម រង្ស៊ី តែង​​​តែ​​​លើក​​​ឡើង​​​ម្តង​​​ហើយ​​​ម្តង​​​ទៀត​​​​ចាប់​​​តាំង​​​ពី​​​ការ​​​ឈ្នះ​​​ដ៏​​​គួរ​​​ឲ្យ​​​ភ្ញាក់​​​ផ្អើល​​​របស់​​​គណបក្ស​​​សង្គ្រោះ​​​ជាតិ​​​អំឡុង​​​ការ​​​បោះឆ្នោត​​​ជាតិ​​​ឆ្នាំ​​​២០១៣​​​ថា ការ​​​ចាប់​​​​​​ខ្លួន​​​លោក​​​​មិន​​​​​​ផ្តល់​​​ផល​​​ប្រយោជន៍​​​ដល់​​​លោក ហ៊ុន សែន ​​​ទេ។ កាល​​​ពី​​​ខែ​​​មីនា ឆ្នាំ​​​២០១៤ លោក​​​បាន​​​លើក​​​ឡើង​​​ថា លោក​​​លែង​​​ត្រូវ​​​ការ​​​លិខិត​​​ឆ្លង​​​ដែន​​​បារាំង​​​របស់​​​លោក​​​ទៀត​​​ហើយ​សម្រាប់​​​សុវត្ថិភាព​​​​​​។

លោក​​​ សម រង្ស៊ី បាន​​​មាន​​​ប្រសាសន៍​​​​អំឡុង​ពេល​នោះ​ថា “​ឥឡូវ​​​នេះ​​​ភាព​​​ខ្លាំង​​​របស់​​​ខ្ញុំ​​​គឺ​​​ការ​​​គាំទ្រ​​​ពី​​​​ពល​​​រដ្ឋ​​​ខ្មែរ​​​។ដោយ​​​សារ​​​ភាព​​​ខ្លាំង​​​នេះ​​​និង​​​ដោយសារ​​​ការ​​​គាំទ្រ​​​ដែល​​​កំពុង​​​តែ​​​មាន​​​ការ​​​កើន​​​ឡើង​​​ដ៏​​​លើស​​​លប់​​​ពី​​​​​​​ពល​​​រដ្ឋ​​​ខ្មែរ​​​ ខ្ញុំ​​​មិន​​​ចេះ​​​​ចាញ់​​​ទេ​​​។ ខ្ញុំ​​​មិន​​​ត្រូវ​​​ការ ​​​អ្វី​​​លើស​ពី​នេះ​ទេ​​​”៕សុខុម​ និង​ស៊ុយឈាង​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស