សាមណេរព្រះជន្ម១៥វស្សាមួយអង្គត្រូវបាននាំចេញពីវត្តមួយនៅក្នុងខណ្ឌពោធិ៍សែនជ័យ រាជធានីភ្នំពេញកាលពីថ្ងៃសៅរ៍បន្ទាប់ពីបានចាប់រំលោភក្មេងស្រីអាយុ៥ឆ្នាំម្នាក់កាលពីសប្ដាហ៍មុន នេះបើយោងតាមនគរបាលដែលនិយាយថា ខ្លួនកំពុងរង់ចាំភ័ស្តុតាងបន្ថែមទៀតមុនពេលចាប់ខ្លួនសាមណេរអង្គនេះ។
នគរបាលបាននិយាយថា សាមណេរអង្គនេះដែលជាសាច់ញាតិរបស់ព្រះគ្រូចៅអធិការនោះ មិនទាន់ត្រូវបានផ្សឹកនៅឡើយទេ ប៉ុន្តែត្រូវបាននាំទៅកាន់វត្តថ្មីមួយនៅក្នុងសង្កាត់ចោមចៅ កាលពីថ្ងៃសៅរ៍ ដោយមន្ត្រី មកពីមន្ទីរធម្មការ និងសាសនារាជធានីបន្ទាប់ពីឪពុកម្ដាយក្មេងស្រីរងគ្រោះបានដាក់ពាក្យបណ្ដឹងទៅនគរបាលកាលពីថ្ងៃសុក្រ។
លោក ទូច ផន អធិការរងនគរបាលខណ្ឌពោធិ៍សែនជ័យ បានមានប្រសាសន៍ថា នគរបាលកំពុងបន្តស៊ើបអង្កេត និងរង់ចាំលទ្ធផលនៃការធ្វើកោសល្យវិច័យរបស់ក្មេងស្រីរងគ្រោះមុនពេលពួកគេចាប់ខ្លួនសាមណេរអង្គនេះ។
លោកបានថ្លែងថា “នគរបាលរបស់យើងកំពុងស្វែងរកភ័ស្តុតាងបន្ថែមទៀត ហើយរហូតមកទល់ពេលនេះយើងមិនទាន់ទទួលបានលទ្ធផលនៃការធ្វើកោសល្យវិច័យពីមន្ទីរពេទ្យនៅឡើយទេ”។
យោងតាមលោក អេ ស្រ៊ុន នាយប៉ុស្តិ៍សង្កាត់បានឲ្យដឹងថា ក្មេងស្រីរូបនេះបានរត់លេងនៅវត្តគោកខ្សាច់ ក្នុងសង្កាត់ភ្លើងឆេះរទេះកាលពីថ្ងៃទី៩ ខែវិច្ឆិកា ស្រាប់តែពេលនោះ សាមណេរអង្គនោះបានចាប់នាង ហើយនាំទៅកាន់បន្ទប់ដាក់អីវ៉ាន់មួយ រួចចាប់រំលោភនាងតែម្ដង។
លោកបានថ្លែងថា បងប្រុសអាយុ៨ឆ្នាំរបស់ក្មេងស្រីរងគ្រោះបានឃើញនាងចេញ ពីបន្ទប់នោះ ដោយស្រែកយំមានទាំងនំមួយកញ្ចប់ និងទឹកផ្លែឈើមួយកំប៉ុងនៅក្នុងដៃផង ដែលសាមណេរអង្គនេះបានឲ្យនាងបន្ទាប់ពីរំលោភរួច។ លោកបានបន្ថែមថា បងប្រុសរូបនេះបាននាំនាងទៅផ្ទះវិញ ហើយក្មេងស្រីរូបនេះបានប្រាប់ម្ដាយរបស់នាងពីការរំលោភនោះ។
លោក អេ ស្រ៊ុន បានថ្លែងថា “យើងបានសួរក្មេងស្រីរូបនេះពីរលើក ហើយនាងនៅតែនិយាយដូចគ្នាដដែលអំពីអ្វីដែលសាមណេរ អង្គនេះបានធ្វើមកលើនាង”។ លោកបានបន្ថែមថា សាមណេរព្រះជន្ម១៥វស្សាអង្គនេះទើបតែបួសបានពីរបីខែប៉ុណ្ណោះ។
លោក ណុប អ៊ន ត្រូវជាជីតារបស់ក្មេងស្រីរងគ្រោះបាននិយាយថា ឪពុកម្ដាយរបស់ក្មេងស្រីបានរង់ចាំរហូតដល់ថ្ងៃសុក្រ ដើម្បីដាក់ពាក្យបណ្ដឹងទៅនគរបាលសង្កាត់ពីព្រោះ ដំបូងពួកគាត់បានព្យាយាមចរចាទាមទារសំណង ជាមួយក្រុមគ្រួសារសាមណេរអង្គនោះ។
លោកបានលើកឡើងថា “ខ្ញុំគ្រាន់តែចង់ឲ្យនគរបាលរកយុត្តិធម៌ជូនចៅស្រីរបស់ខ្ញុំតែប៉ុណ្ណោះ ពីព្រោះនាងទើបតែមានអាយុ៥ឆ្នាំប៉ុណ្ណោះមិនដឹងអ្វីទេ”៕ សារុន