ភ្ញៀវទេសចរដែលមានកាមេរ៉ាចូលទស្សនាប្រាសាទដ៏ល្បាញល្បីនៅឧទ្យានបុរាណអង្គរក្នុងខេត្តសៀមរាបត្រូវមានការពិចារណាឲ្យបានវែងឆ្ងាយមុនពេលថតរូបដោយសារឥឡូវនេះរដ្ឋាភិបាល បានដាក់បទបញ្ជាថ្មី មានប្រសិទ្ធភាពភ្លាមសម្រាប់អ្នកដែល មានបំណងរកប្រាក់ពីរូបថតរបស់ខ្លួន។
គិតចាប់ពីថ្ងៃទី១ ខែធ្នូទៅ តំណាងក្រុមហ៊ុន ទាំងអស់ និងអ្នកសារព័ត៌មានដែលចង់ថតរូបនៅក្នុងឧទ្យានអង្គរ ព្រមទាំងភ្ញៀវទេសចរដែលមានផែនការរកប្រាក់ចំណេញពីរូបថត ឬរូបវីដេអូរបស់ខ្លួន ត្រូវសុំការអនុញ្ញាតជាមុនតាមរយៈការបំពេញពាក្យសុំនៅទីស្នាក់ការអាជ្ញាធរអប្សរាជាស្ថាប័នរដ្ឋាភិបាលដែលគ្រប់គ្រងតំបន់បេតិកភណ្ឌពិភពលោក។
លោក ឡុង កុសល ប្រធានផ្នែកទំនាក់ទំនងរបស់អាជ្ញាធរអប្សរាបានមានប្រសាសន៍ កាលពីម្សិលមិញថា បទបញ្ជាថ្មីនេះត្រូវបានពន្យល់ដល់អ្នកកាសែតដែលមានមូលដ្ឋាននៅក្នុងខេត្តសៀមរាបកាលពីថ្ងៃច័ន្ទ។
លោកបានថ្លែងថា “អាជ្ញាធរអប្សរាហាមអ្នកកាសែតជាតិ និងអន្តរជាតិ និងក្រុមហ៊ុនឯកជនទាំងអស់មិនឲ្យថតរូបនៅក្នុងតំបន់អង្គរទេ ពីព្រោះយើងមិនពេញចិត្តនឹងការដែលពួកគេបាន ប្រើប្រាស់រូបថតរបស់ខ្លួនទៅធ្វើអាជីវកម្ម”។
ដោយពន្យល់ថា សន្តិសុខរបស់អាជ្ញាធរអប្សរា នឹងពិនិត្យមើលដំណើរមកទស្សនា នេះ លោកបានមានប្រសាសន៍ថា ”តាមបទ បញ្ជាថ្មី អ្នកកាសែត និងក្រុមហ៊ុនទាំងអស់អាចដាក់ពាក្យសុំការអនុញ្ញាត ប្រសិនបើពួកគេចង់ថតរូបនៅក្នុងតំបន់អង្គរ ហើយយើងនឹងជូនអ្នកទាំងនោះទៅ”។
លោក កុសល បានមានប្រសាសន៍ទៀតថា បុគ្គលិកឧទ្យានអង្គរក៏នឹងហាមអ្នកដែលពួកគេសង្ស័យថា បានថតរូប ឬថតវីដេអូក្នុងគោលបំណងធ្វើអាជីវកម្មដោយគ្មានការអនុ ញ្ញាតផងដែរ បន្ទាប់មកនាំពួកគេទៅទីស្នាក់ ការអាជ្ញាធរអប្សរា កន្លែងដែលពួកគេអាច ដាក់ពាក្យសុំការអនុញ្ញាតដោយឥតគិតថ្លៃ។
លោកមិនបាននិយាយថា តើអាជ្ញាធរអប្សរាបានដាក់លក្ខណវិនិច្ឆ័យច្បាស់លាស់ក្នុងការវាយតម្លៃការដាក់ពាក្យសុំដែលខ្លួនទទួលបានឬយ៉ាងណាឡើយ ប៉ុន្តែ លោកបានពន្យល់ថា បទបញ្ជាថ្មីនេះមានគោលបំណង សំខាន់ដើម្បីទប់ស្កាត់កុំឲ្យមានការប្រើប្រាស់រូបថតដែលធ្វើឲ្យប៉ះពាល់ដល់ឧទ្យានអង្គរ។
លោកបានមានប្រសាសន៍ថា “យើងចង់ការពារតំបន់បេតិកភណ្ឌ ពីព្រោះមនុស្សមួយចំនួនបានថតរូប និងប្រើប្រាស់រូបថតទាំងនេះសម្រាប់ផលិតភាពយន្ត និងបោះ ពុម្ពសៀវភៅ និងខិត្តប័ណ្ណ ដែលប៉ះពាល់យ៉ាងខ្លាំងដល់តំបន់អង្គរ”។
នៅពេលសុំឲ្យលើកឧទាហរណ៍លោក កុសល បានលើកឡើងថា លោកមិនអាចឆ្លើយសំណួរនេះបានទេ ពីព្រោះទូរស័ព្ទរបស់លោកអស់ថ្ម។
លោក សឿង សិដ្ឋ អ្នកយកព័ត៌មានឲ្យកាសែតរស្មីកម្ពុជាបាននិយាយថា លោកព្រួយ បារម្ភ ថា បទបញ្ជាថ្មីនេះអាចធ្វើឲ្យលោកខាតពេលវេលាដ៏មានតម្លៃ។
លោកបានថ្លែងថា “ខ្ញុំត្រូវចំណាយពេលសុំការអនុញ្ញាត។ ជួនកាលយើងត្រូវថតរូបនៅថ្ងៃដដែល ប៉ុន្តែ វាមិនអាចថតបាន ពីព្រោះ ការិយាល័យអាជ្ញាធរអប្សរានៅឆ្ងាយ គឺចម្ងាយជាង១០គីឡូម៉ែត្រពីទីរួមខេត្ត”។
លោក ប៉ែន ប៊ុណ្ណា ប្រធានក្លឹបអ្នកកាសែត បានមានប្រសាសន៍ថា លោកមិនទាន់ហ៊ាននិយាយអ្វីទេពាក់ព័ន្ធបទបញ្ជាថ្មីនេះលុះណាតែលោកបានមើលថា តើបទបញ្ជានេះនឹងអនុវត្តដោយរបៀបណាសិន។ រដ្ឋាភិបាលប្រតិ កម្មចំពោះរូបថត និងការលើកឡើងអំពីឧទ្យាន បុរាណ ដែលអង្គរវត្តជាមោទនភាពដោយមាននៅលើទង់ជាតិ និងបង្ហាញឲ្យឃើញពីសម័យកាលដ៏រុងរឿងនៃអាណាចក្រខ្មែរ។
កាលពីឆ្នាំ២០០៩លោក មឿង សុន សកម្មជននយោបាយត្រូវបានរកឃើញពិរុទ្ធភាពពីបទផ្សព្វផ្សាយព័ត៌មានមិនពិតចំពោះការអះអាងថា គម្រោងដាក់ភ្លើងបំភ្លឺនៅប្រាសាទអង្គរវត្តនឹងធ្វើឲ្យខូចប្រាសាទ។ លោកស្ថិតនៅក្នុងការនិរទេសខ្លួនដោយខ្លួនឯងនៅឡើយ ដើម្បីគេចចេញពីការជាប់ពន្ធនាគាររហូតដល់ដើមឆ្នាំនេះពេលមានការព្រះរាជទានលើកលែងទោសធានាការវិលត្រឡប់មកវិញដោយសុវត្ថិភាព”៕សារុន