ប៉ូលិសបាននិយាយកាលពីថ្ងៃអង្គារថា ក្រុមអ្នកស៊ើបអង្កេតបារាំង ដែលស៊ើបអង្កេតក្នុងរឿងឃាតកម្មឆ្នាំ២០១២លើជនជាតិបារាំងឈ្មោះ ឡូរ៉ង់ វា៉ល្លីយេ និងកូនបួននាក់របស់លោក បានបញ្ចប់ការចុះពិនិត្យដល់ទីកន្លែងថ្មីបំផុតរបស់ពួកគេនៅកម្ពុជា និងបានយកកាំបិតដែលរកឃើញមួយនិងសំណាកឌីអិនអេពីសាច់ញាតិខ្មែររបស់ភរិយាដែលស្លាប់ទៅរបស់លោក ដែលនឹងចំណាយពេលប៉ុន្មានខែខាងមុខធ្វើការវិភាគ។
បួនខែបន្ទាប់ពីពួកគេបានបាត់ខ្លួន សពលោក ឡូរ៉ង់ វា៉ល្លីយេ អាយុ៤២ឆ្នាំ និងសពកូនៗរបស់គាត់ត្រូវបានរកឃើញនៅខែមករាឆ្នាំ២០១២ ក្នុងរថយន្តឡង់គ្រីស័រលិចក្នុងទឹកស្រះ នៅជិតផ្ទះរបស់ពួកគេក្នុងខេត្តកំពង់ស្ពឺ។
ភ្លាមៗប៉ូលិសកម្ពុជាបានចាត់ទុកថា ករណីនេះជាឃាតកម្មអត្តឃាត បើទោះជាការពិត ក្បាលរបស់ជនជាតិបារាំងរូបនេះត្រូវបានរកឃើញក្នុងវ៉ាលិសមួយនៅគូទរថយន្តក៏ដោយ។ ប៉ុន្តែ សាច់ញាតិរបស់លោក ឡូរ៉ង់ វា៉ល្លីយេ នៅប្រទេសបារាំងបានសន្និដ្ឋានថា នេះជាល្បិចបន្លំភ្នែកទៅវិញទេ ដោយលើកឡើងនូវជម្លោះដីធ្លីជាមួយសាច់ថ្លៃខ្មែររបស់លោក ហើយសំណុំរឿងនេះបានបើកឡើងវិញ បន្ទាប់ពីក្រុមអ្នកស៊ើបអង្កេតបារាំងបានធ្វើកោសល្យវិច័យ និងបានបដិសេធថា វាមិនមែនករណីអត្តឃាតទេ។
កាលពីថ្ងៃអង្គារ លោក ឈឹម ឫទ្ធី ចៅក្រមស៊ើបអង្កេតតុលាការខេត្តកំពង់ស្ពឺ បាននិយាយថា ក្រុមអ្នកស៊ើបអង្កេតបារាំងដែលបានត្រឡប់មកប្រទេសកម្ពុជាវិញកាលពីថ្ងៃទី៣០ខែវិច្ឆិកា បន្ទាប់ពីការមកលើកទី១នៅឆ្នាំ២០១៣ដើម្បីពិនិត្យទីកន្លែងឧក្រិដ្ឋកម្ម បានចំណាយពេលប្រាំថ្ងៃក្នុងខេត្តនេះ និងបានចាកចេញទៅវិញកាលពីថ្ងៃសៅរ៍ ជាមួយនឹងតម្រុយថ្មី។
លោកបាននិយាយថា នៅខាងក្នុងផ្ទះរបស់គ្រួសារនេះ “ពួកគេបានបូមទឹកចេញពីអាងទឹកមួយ ហើយពួកគេបានរកឃើញកាំបិតមួយនិងសក់មួយចំនួន។ ពួកគេបានប្រមូលយកកាំបិតនិងសក់ដើម្បីពិនិត្យឌីអិនអេនៅប្រទេសបារាំង”។
ចៅក្រម ឫទ្ធី បាននិយាយថា ពួកគេក៏បានយកសំណាកទឹកមាត់ពីសាច់ញាតិប្រពន្ធរបស់លោក ឡូរ៉ង់ វា៉ល្លីយេ ដែលបានស្លាប់នៅឆ្នាំ២០០៩ ដើម្បីប្រៀបធៀបឌីអិនអេរបស់ពួកគេជាមួយសំណាកដែលពួកគេរកបានពីមុនពីកន្លែងកើតហេតុនោះ។ លោកបាននិយាយថា លទ្ធផលអាចចេញក្នុងពេលប្រាំមួយខែខាងមុខ។
ឧត្តមសេនីយ៍ទោ សុខ ខេមរិន ប្រធាននាយកដ្ឋានព្រហ្មទណ្ឌក្រសួងមហាផ្ទៃ បាននិយាយថា មន្ត្រីរបស់លោកបានជួយក្រុមអ្នកស៊ើបអង្កេតសាកសួរគ្រួសារនេះ។
លោកបាននិយាយថា “យើងទើបតែបានសាកសួរសាច់ថ្លៃបួននាក់របស់លោក ឡូរ៉ង់ វា៉ល្លីយេ សម្រាប់ការស៊ើបអង្កេតនេះ ប៉ុន្តែ យើងមិនទាន់បានរកឃើញជនសង្ស័យក្នុងឃាតកម្មនៅឡើយទេ”។
លោក ហេង ពួង មេធាវី ខាងសាច់ថ្លៃរបស់លោក ឡូរ៉ង់ វា៉ល្លីយេ បាននិយាយថា លោកមិនបានដឹងថា ក្រុមអ្នកស៊ើបអង្កេតបានសាកសួរកូនក្តីរបស់លោក ឬបានយកសំណាកទឹកមាត់ទេ។
ស្ថានទូតបារាំងមិនបានឆ្លើយតបទៅនឹងសំណើសុំការធ្វើអត្ថាធិប្បាយទេ។
ក្នុងសេចក្តីថ្លែងការណ៍មួយ លោកស្រី ក្លូឌីន អង់ហ្វូ៊ ចៅក្រមស៊ើបអង្កេតបារាំងទទួលបន្ទុកសំណុំរឿងនេះ បាននិយាយថា ក្រុមអ្នកស៊ើបអង្កេត “មានការរីកចម្រើនច្រើន” ហើយនឹងសិក្សា “សំណាកថ្មីនេះ”៕និត