កាលពីម្សិលមិញមន្ត្រីប៉ូលិសម្នាក់បាននិយាយថា ស្ត្រីពីរនាក់ទៀតបានស្លាប់កាលពីថ្ងៃពុធ និងថ្ងៃព្រហស្បតិ៍ ក្រោយពីផឹកស្រាត្រាំសម្បកឈើនៅខេត្តក្រចេះ ហើយតុលាការខេត្តនេះកាលពីម្សិលមិញបានចាប់ផ្ដើមធ្វើការសាកសួរបុរសម្នាក់ដែលរងការចោទប្រកាន់ថា បានបិតស្រានេះ។
លោក អ៊ុំ ភី ស្នងការរងខេត្តបាននិយាយថា ឈ្មោះ ឆយ សាលី អាយុ៣១ឆ្នាំ បានស្លាប់នៅតាមផ្លូវទៅមន្ទីរពេទ្យកាល់ម៉ែតនាវេលាម៉ោងប្រហែល៧យប់ថ្ងៃពុធ ឡាយ សាយ អាយុ៣៣ឆ្នាំ បានស្លាប់នៅមន្ទីរពេទ្យនោះនៅម៉ោងប្រហែល១ឈានចូលព្រឹកថ្ងៃព្រហស្បតិ៍ ក្រោយពីអ្នកទាំងពីរបានផឹកស្រាដែលត្រាំសម្បកឈើនាងនួន នៅស្រុកស្នួល។
លោកបាននិយាយថា ស្ត្រី១០នាក់ផ្សេងទៀតកំពុងទទួលការព្យាបាលនៅតាមមន្ទីរពេទ្យនានាក្នុងក្រុងភ្នំពេញ និងខេត្តក្រចេះកាលពីម្សិលមិញ ហើយស្ត្រីមួយចំនួនស្ថិតក្នុងស្ថានភាពធ្ងន់។
ការស្លាប់ពីរនាក់ទៀតនេះ កើតមានឡើងបន្ទាប់ពី ប្រលុង ធឿន អាយុ៣៤ឆ្នាំ និង កន សារឿន អាយុ២១ឆ្នាំ បានស្លាប់កាលពីថ្ងៃអង្គារ និងកាលពីថ្ងៃពុធ ក្រោយពីផឹកស្រានេះ។ លោក ភី បាននិយាយថា សា រ៉េត អាយុ៦០ឆ្នាំ ដែលបិតស្រានេះ ត្រូវបានចាប់ខ្លួននៅរសៀលថ្ងៃពុធ និងកំពុងត្រូវគេសាកសួរនៅតុលាការខេត្តកាលពីម្សិលមិញ។
លោកបានឲ្យដឹងទៀតថា ”ប៉ូលិសបានបញ្ជូនលោក រ៉េត ទៅសាកសួរ ពីព្រោះអ្នកដែលផឹកស្រារបស់គាត់បានស្លាប់ និងច្រើននាក់ទៀតបានធ្លាក់ខ្លួនឈឺ”។
លោក ភី បាននិយាយថា មន្ត្រីរបស់លោកបានធ្វើការសន្និដ្ឋានថា សម្បកឈើក្នុងស្រានោះមិនបណ្ដាលឲ្យមានការស្លាប់ទេ ព្រោះស្ត្រីម្នាក់ក្នុងចំណោមស្ត្រីដែលស្លាប់នោះ បានផឹកស្រាមិនត្រាំសម្បកឈើ៕ និត