អ្នករើសអេតចាយម្នាក់បានរងរបួសធ្ងន់នៅក្នុងខណ្ឌចំការមន រាជធានីភ្នំពេញ កាលពីរំលងអធ្រាត្រឈានចូលព្រឹកម្សិលមិញ បន្ទាប់ពីគាត់ទំនងជាត្រូវជនមិនស្គាល់អត្តសញ្ញាណម្នាក់នៅក្នុងរថយន្តឡិចសីុសបាញ់ បើទោះជានគរបាលនិយាយថា ពួកគេមិនច្បាស់ថា តើគាត់ត្រូវគ្រាប់កាំភ្លើង ឬយ៉ាងណានោះ។
លោក សឹុម ឈឿន នាយប៉ុស្តិ៍សង្កាត់បានមានប្រសាសន៍ ថា សាក្សីនៅក្នុងសង្កាត់ទួលទំពូង១ បាននិយាយថា ពួកគេបានឮស្នូរអ្វីទំនងជាស្នូរកាំភ្លើងមុនពេលលោក វ៉ាន សុភា អាយុ ៣៦ឆ្នាំ ជាអ្នករើសអេតចាយបាន ដួល។ លោកបានបន្ថែមថា គេរកមិនឃើញសម្បកគ្រាប់ទេ ហើយក៏មិនឃើញនរណាម្នាក់បាញ់ដែរ។
លោក សុឹម ឈឿន បានថ្លែងថា “យើងមិនដឹងថា តើមូលហេតុអ្វីបណ្តាលឲ្យមានការបាញ់នោះទេ ប៉ុន្តែ ប្រហែលជាគាត់ដាក់រទះបិទផ្លូវ ហើយធ្វើឲ្យគេខឹងបាញ់គាត់តែម្តង។ យើងមិនទាន់ប្រាកដថា តើរបួសរបស់គាត់ដោយសារការបាញ់ ឬដោយសារអ្វីផ្សេងនោះឡើយ”។
លោក សឹុម ឈឿន បានមានប្រសាសន៍ ថា សាក្សីឃើញតែរថយន្តឡិចសីុស ៣០០ប៉ុណ្ណោះបើកចេញពីកន្លែងកើតហេតុយ៉ាងលឿនបន្ទាប់ពីហេតុការណ៍កើតឡើង ហើយសន្និដ្ឋានថា ជនដៃដល់ស្ថិតនៅក្នុងរថយន្ត។
លោកបានថ្លែងថា “ឥឡូវនេះយើងកំពុងស្វែងរកព័ត៌មានបន្ថែម និងរង់ចាំលទ្ធផលនៃការវះកាត់ ដើម្បីរកឱ្យឃើញថា តើគាត់ត្រូវគ្រាប់កាំភ្លើង ឬអ្វីផ្សេងឡើយ”។
លោក សួន សាមិត្ត ប្រធានផ្នែកសង្គ្រោះបន្ទាន់នៅមន្ទីរពេទ្យមិត្តភាពខ្មែរ-សូវៀតកន្លែងដែលជនរងគ្រោះត្រូវបញ្ជូនមក បានមានប្រសាសន៍ថា ជនរងគ្រោះបានចូលសម្រាកកាលពីរំលងអធ្រាត្រឈានចូលព្រឹកម្សិលមិញ ប៉ុន្តែ ថាលោកមិនទាន់ដឹងថា តើគាត់ត្រូវគ្រាប់កាំភ្លើង ឬអ្វីនោះឡើយ។
លោកវេជ្ជបណ្ឌិត សួន សាមិត្ត បានមានប្រសាសន៍ថា “យើងបានទទួលគាត់ ហើយជួយគាត់ បន្ទាប់មកយើងបានបញ្ជូនគាត់ទៅផ្នែកវះកាត់ជាបន្ទាន់។ យើងបានពិនិត្យមើលហ្វីលពីការថត X-ray ហើយឃើញដូចជាមានអ្វីបៀមជាប់នៅត្រង់ឆ្អឹងចង្កេះអ៊ីចឹង ប៉ុន្តែ យើងមិនដឹងថា ជាអ្វីនោះឡើយ។
លោកបានបន្ថែមថា ”គាត់រងរបួសធ្ងន់ប៉ុន្តែ មិនគ្រោះថ្នាក់ដល់ជីវិតឡើយ។ ឥឡូវនេះយើងបានព្យាបាលគាត់ ហើយយើងកំពុងតាមដានការវិវឌ្ឍនៃជំងឺរបស់គាត់”។
លោក ប៊ុន សុភក្ត្រ អភិបាលខណ្ឌចំការមនបានមានប្រសាសន៍ថា លោកមិនដឹងពីហេតុការណ៍នេះទេ ចំណែកលោក ហ៊ាង ថារ៉េត អធិការរងនគរបាលខណ្ឌបានបដិសេធមិនធ្វើអត្ថាធិប្បាយទេ៕សារុន