សាលាដំបូងខេត្តស្វាយរៀងបានចោទប្រកាន់មនុស្សទី១១ គឺកម្មការិនីកាត់ដេរម្នាក់ជុំវិញការតវ៉ាដោយហិង្សាដែលមានការគប់ដុំថ្មនៅតំបន់សេដ្ឋកិច្ចពិសេសមេនហាតធេន និងតៃសេង ក្នុងក្រុងបាវិតក្នុងរយៈពេលមួយសប្ដាហ៍កន្លះកន្លងមក។
លោក ទេព ផល្លា បុគ្គលិករដ្ឋបាលជាន់ខ្ពស់នៅតុលាការនេះបានមានប្រសាសន៍ថា ស្ត្រីម្នាក់នេះដែលលោកមិនចាំឈ្មោះ ត្រូវបានចោទប្រកាន់កាលពីថ្ងៃសុក្រចំពោះការចូលរួមនៅក្នុងការតវ៉ាកាលពីថ្ងៃអង្គារ មុនពេលការបិទទ្វាររយៈពេលពីរថ្ងៃ ដែលបានធ្វើឲ្យការងារនៅតំបន់សេដ្ឋកិច្ចពិសេសទាំងពីរនេះផ្អាកជាបណ្ដោះអាសន្ន។
លោកបានមានប្រសាសន៍ថា “ស្ត្រីរូបនេះត្រូវបានចោទប្រកាន់ផ្អែកលើអង្គហេតុថ្មីៗ…ទាក់ទងការប្រើអំពើហិង្សាលើមន្ត្រីនគរបាល ធ្វើឱ្យពួកគេរងរបួសក្បាល នៅពេលកម្មករគប់ដុំថ្ម និងវត្ថុរឹងផ្សេងៗទៀតទៅលើនគរបាល”។
លោកបានបន្ថែមថា “ស្ត្រីរូបនេះត្រូវបានបញ្ជូនទៅតុលាការដើម្បីឃុំខ្លួនបណ្ដោះអាសន្ន ហើយត្រូវបានចោទប្រកាន់ពីបទបំផ្លាញទ្រព្យសម្បត្តិ និងប្រើអំពើហិង្សាដោយចេតនា”។
ការចោទប្រកាន់នេះធ្វើឡើងបន្ទាប់ពីការចាប់ខ្លួនកម្មករកាត់ដេរបួននាក់នៅក្រុងបាវិតកាលពីថ្ងៃទី១៧ និង១៨ ខែធ្នូ ហើយអ្នកបើកបររថយន្ដដឹកកម្មករប្រាំមួយនាក់កាលពីថ្ងៃពុធ និងថ្ងៃព្រហស្បតិ៍។ ពួកគេទាំង១០នាក់ត្រូវបានចោទប្រកាន់ពីបទបំផ្លាញទ្រព្យសម្បត្តិ ប្រើអំពើហិង្សាដោយចេតនា និងការញុះញង់។
លោក សែ វុទ្ធី មេបញ្ជាការកងរាជអាវុធហត្ថខេត្តបានមានប្រសាសន៍ថា ស្ត្រីរូបនេះដែលត្រូវបានចាប់ខ្លួនកាលពីថ្ងៃសុក្រ មានអាយុខ្ទង់២០ឆ្នាំ ប៉ុន្តែលោកមិនបានប្រាប់ឈ្មោះទេ។ លោកបានអះអាងថា ស្ត្រីរូបនេះមានពិរុទ្ធភាព ប៉ុន្តែលោកមិននិយាយលម្អិតអំពីភ័ស្តុតាងដាក់បន្ទុកលើនាងឡើយ។
មុនពេលដាក់ទូរស័ព្ទចុះពេលអ្នកយកព័ត៌មានសាកសួរ លោកបានមានប្រសាសន៍ថា
“ជាក់ស្ដែង ស្ត្រីរូបនេះបានបំផ្លាញទ្រព្យសម្បត្តិរោងចក្រ និងបង្ករបួសស្នាមដល់មន្ត្រីនគរបាល”។
លោក នួត បូពិនណារ័ត្ន អ្នកសម្របសម្រួលអង្គការសិទ្ធិមនុស្សលីកាដូប្រចាំខេត្តនេះបានមានប្រសាសន៍ថា លោកបាននិយាយជាមួយក្រុមគ្រួសារស្ត្រីរូបនេះ ហើយបានកំណត់អត្តសញ្ញាណថា នាងឈ្មោះ ជ័យ សាខន។ លោកបានថ្លែងថា ក្រុមគ្រួសាររបស់នាងបានប្រាប់លោកថា នាងត្រូវបានកំណត់អត្តសញ្ញាណដោយអាជ្ញាធរតាមរូបភាពវីដេអូនៃការតវ៉ាកាលពីថ្ងៃអង្គារ។
លោកបានថ្លែងថា “មុខរបស់នាងត្រូវបានគេស្គាល់តាមរយៈរូបភាពវីដេអូ ហើយនាងត្រូវបានចាប់ខ្លួននៅពេលដែលនាងចេញពីធ្វើការ។ ឥឡូវនេះនាងស្ថិតក្នុងពន្ធនាគារ”។
ការតវ៉ាបានចាប់ផ្ដើមកាលពីថ្ងៃទី១៦ ខែធ្នូ នៅពេលកម្មករមួយចំនួនបានចេញពីរោងចក្ររបស់ខ្លួនតវ៉ាទាមទារដំឡើងប្រាក់ខែ។ កម្មករមកពីរោងចក្រផ្សេងទៀតបានចូលរួមជាមួយពួកគេ ហើយភ្លាមៗនោះ ក្រុមកម្មករបានប្រែក្លាយជាហិង្សា ដោយយកដុំថ្មគប់ទៅលើរោងចក្រ និងកម្លាំងសន្តិសុខ។
បន្ទាប់ពីការតវ៉ារយៈពេលពីរថ្ងៃ រដ្ឋាភិបាលបានបញ្ជាឲ្យបិទទ្វារកាលពីសប្ដាហ៍មុន ការងារបានបន្តឡើងវិញកាលពីថ្ងៃសុក្រ ហើយលោក បូពិនណារ័ត្ន បានលើកឡើងថា ស្ថានភាពបានត្រឡប់ទៅរកភាពធម្មតាវិញហើយកាលពីថ្ងៃសៅរ៍។
សហជីពដែលមានសមាជិកនៅក្នុងតំបន់សេដ្ឋកិច្ចពិសេសទាំងនេះបានលើកឡើងថា ពួកគេមិនបានចូលរួមក្នុងការបង្កឱ្យមានការតវ៉ានេះទេ ហើយបានយល់ព្រមជួយធ្វើឲ្យមានភាពស្ងប់ស្ងាត់ឡើងវិញ ជាថ្នូរនឹងការដោះលែងកម្មករបួននាក់ដំបូងដែលត្រូវបានចាប់ខ្លួន ដែលអ្វីៗមិនទាន់កើតឡើងនៅឡើយទេ។
កាលពីម្សិលមិញ លោក ឆេង ឈន់ ប្រធានសហជីពការងារឯករាជ្យបានមានប្រសាសន៍ថា លោកមិនបានទទួលបានព័ត៌មានពីការចាប់ខ្លួនកាលពីថ្ងៃសុក្រទេ ហើយលោកបារម្ភថា ការតវ៉ានឹងបន្ត ប្រសិនបើវិធានការច្បាប់នៅតែបន្តនោះ។
លោក ឆេង ឈាន់ បានថ្លែងថា “ប្រសិនបើការចាប់ខ្លួនបន្តដោយគ្មានការដោះលែងទេនោះ ខ្ញុំបារម្ភថា កម្មករនឹងធ្វើការតវ៉ាទាមទារឲ្យអាជ្ញាធរដោះលែងពួកគេ”។
លោកបានបន្ថែមថា ការតវ៉ាថ្មីក៏អាចចាប់ផ្ដើមផងដែរ ប្រសិនបើរោងចក្រអនុវត្តតាមការសន្យារបស់ខ្លួនថា នឹងកាត់ប្រាក់ឈ្នួលរបស់កម្មកររយៈពេលពីរថ្ងៃ ដែលរដ្ឋាភិបាលបានបិទទ្វារតំបន់សេដ្ឋកិច្ចពិសេសទាំងនេះ៕ សារុន