លោក ស ខេង រដ្ឋមន្ត្រីក្រសួងមហាផ្ទៃបានសុំអធ្យាស្រ័យចំពោះសាធារណជននូវការរំខាននិងការប៉ះពាល់ចរាចរក្នុងពេលមានការរៀបពិធីរៀបអាពាហ៍ពិពាហ៍កូនរបស់លោកកាលពីចុងសប្តាហ៍មុន ក្នុងក្រុងភ្នំពេញ។
នៅក្នុងលិខិតចេញកាលពីម្សិលមិញ ខុទ្ទកាល័យលោក ស ខេង បានសរសេរថា “សមត្ថកិច្ចពាក់ព័ន្ធក៏បានខិតខំប្រឹងប្រែងយកចិត្តទុកដាក់រៀបចំសណ្តាប់ធ្នាប់សាធារណៈ និងការរក្សារំហូរជាប្រក្រតីនៃចរាចរណ៍ ដោយពុំតម្រូវឲ្យមានការបិទកំណាត់មហាវិថីព្រះនរោត្តម និងកំណាត់ផ្លូវ២៤០នោះឡើយ។ ប៉ុន្តែទោះបីជាយ៉ាងនេះក្តី សម្តេចក្រឡាហោម ស ខេង សូមអភ័យទោសចំពោះសាធារណជននូវរាល់ការរំខាន ឬការប៉ះពាល់ដោយអចេតនា ដែលអាចកើតមានក្នុងអំឡុងពេលនៃការប្រារព្ធពិធីខាងលើនេះ”។
កាលពីថ្ងៃសុក្រ មួយថ្ងៃមុនពិធីអាពាហ៍ពិពាហ៍រយៈពេលពីរថ្ងៃបានចាប់ផ្តើមជាផ្លូវការ ភ្ញៀវចាប់ផ្តើមធ្វើដំណើរមកដល់។ នៅវិថីលេខ២៤២ ភាគខាងត្បូងនៃភូមិគ្រឹះត្រូវបិទទាំងស្រុង មានរោងដ៏ធំមួយបំពាក់ដោយម៉ាស៊ីនត្រជាក់បានបិទផ្លូវថ្មើរជើង។
នៅខាងជើង វិថីលេខ២៤០ត្រូវកកស្ទះដោយរថយន្តប្រណីតៗដែលចតសេ្អកស្កះ ចំណែកឯរនាំងដែកបានបិទចុងទាំងពីរនៃផ្លូវរវាងមហាវិធីនរោត្តម និងវិថី៥១។ នៅខាងមុខភូមិគ្រឹះ មានរថយន្តប្រណីតៗច្រើនគ្រឿងចតពេញចិញ្ចើមផ្លូវ និងចំណែកផ្លូវម្ខាងនៃមហាវិថីនរោត្តម ដែលចរាចរស្ទើរតែកកស្ទះរាប់ម៉ោង មុននឹងដល់ម៉ោងកកស្ទះជាធម្មតា។ មាននគរបាលចរាចររាប់សិបនាក់បានកំពុងបញ្ជាចរាចរនៅលើមហាវិថីនរោត្តមចាប់ពីម៉ោងប្រហែល៤រសៀល ក៏ដូចជាមាននគរបាលក្រុងភ្នំពេញជាង១០នាក់ កងរាជអាវុធហត្ថក្រុងជាង១០នាក់ កងអង្គរក្សលោកនាយករដ្ឋមន្ត្រី និងសន្តិសុខឯកជនជាច្រើននាក់៕