អាជ្ញាធរបាននិយាយកាលពីថ្ងៃពុធថា នគរបាលបានចាប់ខ្លួនបុរសម្នាក់កាលពីថ្ងៃពុធទាក់ទងនឹងការរំលោភសម្លាប់កុមារីអាយុ១៤ឆ្នាំម្នាក់ ដែលសាកសពរបស់នាងត្រូវបានឪពុកម្តាយនាងរកឃើញនៅក្នុងវាលស្រែក្នុងខេត្តកំពត ហើយកំពុងតាមរកបុរសម្នាក់ទៀតនៅភ្នំពេញដែលជនសង្ស័យបាននិយាយថាជាជនរួមគំនិត។
យោងតាមលោក ម៉ៅ ច័ន្ទមធុរិទ្ធ ស្នងការនគរបាលខេត្តកំពតបានឲ្យដឹងថា ឪពុកម្តាយរបស់ជនរងគ្រោះបានប្រាប់ប៉ូលិសថា ពួកគេបានឃើញកូនរបស់ខ្លួននៅរស់ ក្នុងពេលដែលនាងដើរចេញពីផ្ទះតាមផ្លូវនៅក្នុងស្រុកឈូកទៅផ្ទះបងស្រីនាងមានចម្ងាយប្រហែល២០០ម៉ែត្រកាលពីល្ងាចថ្ងៃច័ន្ទ។ ពួកគេមិនបានរាយការណ៍ជូនប៉ូលិសឃុំទាក់ទងនឹងការបាត់ខ្លួននាងទេ ពីព្រោះនាងតែងតែដេកនៅផ្ទះបងស្រីរបស់នាង។
លោក ម៉ៅ ច័ន្ទមធុរិទ្ធ បានមានប្រសាសន៍ថា ” ដំបូង ឪពុកម្តាយគិតថា កូនពួកគេដេកនៅផ្ទះបងស្រីរបស់នាង ដូច្នេះពេលនាងបាត់ខ្លួនពីរថ្ងៃហើយ ពួកគេមិនបានរាយការណ៍ប្រាប់ប៉ូលិសប៉ុស្តិ៍ទេ។ ពួកគេរកឃើញសាកសពនៅព្រឹកថ្ងៃពុធ”។
លោកស្នងការរូបនេះបានមានប្រសាសន៍ថា ក្រោយពីធ្វើកោសល្យវិច័យ នគរបាលសន្និដ្ឋានថា កុមារីត្រូវគេរំលោភ ហើយវាយឲ្យស្លាប់នឹងដំបង។ លោកស្នងការរូបនេះបានមានប្រសាសន៍ថា”ប្រហែលគេមិនចង់ឲ្យជនរងគ្រោះនិយាយ និងចាប់ខ្លួនអ្នកដែលរំលោភនាង”។
លោក ម៉ៅ ច័ន្ទមធុរិទ្ធ បាននិយាយថា ប៉ូលិសបានឃាត់ខ្លួនជនសង្ស័យម្នាក់មានអាយុ១៧ឆ្នាំនៅក្នុងស្រុកឈូក ដោយផ្អែកលើការសម្ភាសជាមួយគ្រួសារជនរងគ្រោះ និងអ្នកជិតខាងនៅក្នុងឃុំល្បើក ប៉ុន្តែប៉ូលិសមិនជឿថា ជនរងគ្រោះបានស្គាល់ជនល្មើសទេ។
លោក កង សាខន ស្នងការរងខេត្ត បានមានប្រសាសន៍ថា លោកកំពុងនៅក្នុងក្រុងភ្នំពេញស្វែងរកចាប់ខ្លួនជនសង្ស័យផ្សេងទៀត ហើយមិនមានពេលឆ្លើយសំណួរបានទេ ព្រោះលោកកំពុងចុះស៊ើបអង្កេត។
លោក អួន ស៊ីវុត្ថា អធិការរងស្រុកឈូក បានជំទាស់នឹងពេលវេលាដែលផ្តល់ឲ្យដោយ លោក ម៉ៅ ច័ន្ទមធុរិទ្ធ ហើយបាននិយាយថា ឪពុកម្តាយរបស់កុមារីបានប្រាប់លោកថានាងបានចេញពីផ្ទះកាលពីល្ងាចថ្ងៃអង្គារ ជាពេលដែលនគរបាលសន្និដ្ឋានថានាងត្រូវគេសម្លាប់។
លោក អួន ស៊ីវុត្ថា បាននិយាយថា “ជនរងគ្រោះត្រូវគេសម្លាប់នៅយប់ថ្ងៃអង្គារពេលដើរទៅផ្ទះបងស្រីនាង ដើម្បីឲ្យចំណីមាន់ដូចធម្មតា។ អធិការរងស្រុកឈូករូបនេះបាននិយាយបន្ថែមថា ជនសង្ស័យប្រហែលជាលបមើលជនរងគ្រោះបន្ទាប់ពីនាងចេញពីផ្ទះ។
អធិការរងស្រុកឈូកបាននិយាយថា “ជនរងគ្រោះបានដើរតាមផ្លូវងងឹតហើយស្ងាត់ទៅផ្ទះបងស្រីនាង។ ជនសង្ស័យលបដើរពីក្រោយជនរងគ្រោះ បន្ទាប់មកចាប់នាងទៅវាលស្រែហើយក៏រំលោភ។ នេះជាកំហុសឪពុកម្តាយ ដែលបណ្តោយឲ្យកូនដើរទៅផ្ទះបងប្អូន ហើយគិតថា គ្មានរឿងអ្វីកើតឡើង”៕ រើន