កាលពីថ្ងៃសុក្រ ក្រុមហ៊ុនរ៉ូយ៉ាល់គ្រុបបានវាយបកការអះអាងរបស់រដ្ឋាភិបាលថា ខ្លួនបានសាងសង់ផែសម្រាប់លើកដាក់សម្ភារនៅលើឆ្នេរអូរត្រេះក្នុងក្រុងព្រះសីហនុដោយមានការអនុញ្ញាត ដោយបញ្ជាក់ក្នុងសេចក្តីថ្លែងការណ៍មួយថា អតីតអភិបាលខេត្តបានយល់ព្រមឲ្យសាងសង់។
កាលពីថ្ងៃពុធ គណៈកម្មាធិការជាតិគ្រប់គ្រងនិងអភិវឌ្ឍន៍តំបន់ឆ្នេរសមុទ្រកម្ពុជា បានបញ្ជាឲ្យក្រុមហ៊ុននេះរើផែនេះចោល ដោយហៅសំណង់នោះថា “សំណង់អនាធិបតេយ្យ” ហើយនិយាយថា ក្រុមហ៊ុនរ៉ូយ៉ាល់គ្រុបបានចាប់ផ្តើមសាងសង់រចនាសម្ព័ន្ធប្រវែង៤០ម៉ែត្រ ក្នុងពេលខ្លួនស្នើសុំច្បាប់ពីរដ្ឋាភិបាលដើម្បីសាងសង់ ដោយមិនបានរង់ចាំសេចក្តីសម្រេចជាមុន។ក្នុងសេចក្តីថ្លែងការណ៍ដែលផ្សព្វផ្សាយតាមអុីនធឺណិត និងជូនសាធារណជន និងប្រព័ន្ធផ្សព្វផ្សាយ ក្រុមហ៊ុនរ៉ូយ៉ាល់គ្រុបដែលគ្រប់គ្រងដោយឧកញ៉ាមានខ្នងក្រាស់ គិត ម៉េង បាននិយាយថា ផែសម្រាប់លើកដាក់សម្ភារ និងគម្រោងក្នុងសមុទ្រគឺមានបំណងធ្វើជាមូលដ្ឋានដើម្បីលើកស្ទួយទេសចរណ៍ឆ្នេរ។ ក្រុមហ៊ុនក៏បានអះអាងថា លោក ឈិត សុខុម អតីតអភិបាលខេត្ត ដែលបានទទួលតំណែងនៅក្នុងក្រសួងមហាផ្ទៃកាលពីឆ្នាំមុន បានផ្តល់ការអនុញ្ញាតឲ្យសាងសង់ផែសម្រាប់លើកដាក់សម្ភារនេះ។
លិខិតបានសរសេរថា “ក្រុមហ៊ុនបានកំពុងអនុវត្តដោយគោរពតាមការឯកភាពជាគោលការណ៍ពីអភិបាលខេត្តព្រះសីហនុ តាមលិខិតចុះថ្ងៃទី២៤ ខែកក្កដា ឆ្នាំ២០១៥ ដែលកាលណោះ ឯកឧត្តម ឈិត សុខុន ជាអភិបាលខេត្តព្រះសីហនុ ឲ្យធ្វើផែពីរកន្លែង ផែមួយនៅលើគោក និងផែមួយទៀតនៅលើកោះ។ ក្រុមហ៊ុនបានសិក្សាយ៉ាងហ្មត់ចត់ ហើយក៏បានសហការជាមួយអាជ្ញាធរខេត្ត និងក្រសួងពាក់ព័ន្ធប្រកបដោយស្មារតីទទួលខុសត្រូវ។ គ្មានហេតុផលណាដែលក្រុមហ៊ុនអនុវត្តដោយរំលងច្បាប់ ឬធ្វើឲ្យខូចប្រយោជន៍ជាតិនោះទេ”។
ទោះជាយ៉ាងនេះក្តី លោក ឈិត សុខុន បានមានប្រសាសន៍ថា ផែលើកដាក់សម្ភារដែលសង់ដោយបេតុងនិងដែក មិនត្រូវគ្នានឹងរចនាសម្ព័ន្ធដែលលោកបានឯកភាពនោះទេ។
លោក ឈិត សុខុន បានមានប្រសាសន៍ថា “នៅក្នុងលិខិត យើងគ្រាន់តែឯកភាពឲ្យក្រុមហ៊ុនសង់ផែលើកដាក់សម្ភារបណ្តោះអាសន្នប៉ុណ្ណោះ និងត្រូវសហការជាមួយអាជ្ញាធរ និងអ្នកជំនាញបរិស្ថាន”។ ការយល់ព្រមនោះមិនបានបញ្ជាក់ឲ្យច្បាស់លាស់ថាតើផែលើកដាក់សម្ភារបណ្តោះអាសន្ននោះអាចស្ថិតនៅទីនោះយូរប៉ុន្មានទេ ប៉ុន្តែលោកអតីតអភិបាលខេត្តរូបនេះបានមានប្រសាសន៍ថា អ្វីដែលបានសាងសង់គឺខុសគ្នាទៅនឹងអ្វីដែលក្រុមហ៊ុនបានស្នើ។
លោក យន្ត មីន អភិបាលខេត្តបានមានប្រសាសន៍កាលពីថ្ងៃសុក្រថា លោកបានបញ្ជាឲ្យក្រុមហ៊ុនបញ្ឈប់ការសាងសង់ ប៉ុន្តែមិនព្រមនិយាយថា នៅពេលណាផែលើកដាក់សម្ភារនឹងត្រូវកម្ទេចចោលទេ។
លោក យន្ត មីន បានមានប្រសាសន៍ថា “យើងនឹងធ្វើមួយជំហានម្តងៗ”។ លោកអភិបាលខេត្តរូបនេះបានបដិសេធមិនធ្វើអត្ថាធិប្បាយចំពោះកិច្ចព្រមព្រៀងរវាងក្រុមហ៊ុនរ៉ូយ៉ាល់គ្រុប និងលោកអភិបាលខេត្តចាស់ទេ។
លោក ឈុន ប៊ុនថា អគ្គនាយករងក្រុមហ៊ុនរ៉ូយ៉ាល់គ្រុប ដែលទទួលបន្ទុកគម្រោងនោះ បានមានប្រសាសន៍ថា សំណង់បានបញ្ឈប់ ហើយលោកកំពុងរង់ចាំបទបញ្ជាថាត្រូវធ្វើយ៉ាងម៉េចទៀត។
លោក ឈុន ប៊ុនថា បាននិយាយថា “យើងទុកឲ្យមេដឹកនាំកំពូលដោះស្រាយបញ្ហានេះ។ អាស្រ័លើឧកញ៉ា គិត ម៉េង”។
លោក គិត ម៉េង បានមានប្រសាសន៍ថា លោករវល់ណាស់៕រើន