លោក ចន ឃើរី សង្កត់​​​ធ្ងន់​​​ពី​បញ្ហាសន្តិសុខ និង​ពាណិជ្ជកម្ម​អំឡុង​ដំណើរ​ទស្សនកិច្ច​

មាន​ប្រសាសន៍​នៅ​សួន​​​ច្បារ​​នៃ​សណ្ឋាគារ​ ​​​ Raffles​ កាលពី​រសៀល​ម្សិលមិញ​​ លោក ចន ឃើរី រដ្ឋមន្ត្រី​ក្រសួង​ការ​បរទេស​សហរដ្ឋ​​​អាមេរិក​បានលើកឡើង​ថា “​បញ្ហា​ប្រឈម​បន្ទាន់” នៃ​ការ​ប្រឆាំង​ពួក​ជ្រុល​និយម​ ការ​កសាង​​ទំនាក់​ទំនង​​ពាណិជ្ជកម្ម​ និង​ការ​មើល​ឃើញ​ប្រទេស​កម្ពុជា​​​ប្រែក្លាយ​ជា​ប្រទេស​ប្រជា​​​ធិបតេយ្យ​រីក​ចម្រើន​នោះ​ស្ថិត​នៅក្នុង​របៀប​វារៈ​​សំខាន់​របស់​លោក​​អំឡុង​ដំណើរ​ទស្សនកិច្ច​រយៈ​ពេល​​១ថ្ងៃ​​នៅ​ក្នុង​រាជធានី​ភ្នំពេញ។

​លោក ចន​​​ ឃើរី ដែល​ដំណើរ​ទស្សនកិច្ច​​​របស់លោកមកកាន់​កម្ពុជា​ ធ្វើ​ឡើង​មុន​​កិច្ច​ប្រជុំ​កំពូល​អាមេរិក​-អាស៊ាន​នៅ​ខែ​កុម្ភៈ នៅ​សាន់នីលែន (Sunnylands) ​រដ្ឋកាលីហ្វ័រញ៉ា បាន​ចាត់​ទុក​ជំនួប​របស់​លោក​​​​នៅ​​ពេល​ព្រឹក​ជាមួយ​លោក​នាយក​រដ្ឋមន្ត្រី ហ៊ុន សែន និង​លោក ហោ ណាំហុង រដ្ឋមន្ត្រី​ក្រសួង​ការ​បរទេស​ថា​ជា​ជំនួប​ “​ដោយ​ឥតលាក់លៀម​ និង​​ក្នុង​ន័យ​ស្ថាបនា​”។

cam-photo-front-reuters1នៅ​​ក្នុង​សុន្ទរកថា​បន្ទាប់ពីការ​ពិភាក្សា​របស់លោក​ជាមួយ​លោក ហោ ណាំហុង និង​ជា​ថ្មី​ម្ដង​ទៀត​​នៅ​ក្នុង​សុន្ទរកថានា​ពេល​រសៀល​​ លោក ចន ឃើរី បាន​លើក​ឡើង​ថា ​​ការចូលរួម​របស់​​ប្រទេស​កម្ពុជា​ក្នុង​ការ​ប្រយុទ្ធ​ប្រឆាំង​​រដ្ឋអុិស្លាម​គឺ​ជា​អាទិភាព​​សម្រាប់​សហរដ្ឋអាមេរិក​។

​លោក ចន ឃើរី បាន​លើកឡើង​​នៅ​ក្នុង​សុន្ទរកថា​របស់លោក​នាពេល​រសៀល​ថា     “​ថ្ងៃ​នេះ​ខ្ញុំ​ក៏​បាន​ពិភាក្សា​ជាមួយ​លោក​នាយក​រដ្ឋមន្ត្រី​អំពី​បញ្ហា​ប្រឈម​បន្ទាន់ជា​អន្តរជាតិ​​​នៃ​ការ​ប្រយុទ្ធប្រឆាំង​ពួក​ជ្រុល​និយម​ដ៏​ហិង្សា​ផង​ដែរ។ ហើយ​យើង​បាន​ព្រម​​​ព្រៀង​​​​ ថា នេះ​ពិត​ជា​អាទិភាព​ចម្បង​នៅ​ក្នុង​ទំនាក់​ទំនង​រវាង​​ប្រទេស​ណាមួយ​​នៅ​ថ្ងៃ​នេះ​”។

​ដោយ​ប្រើ​ពាក្យសម្រាប់​​រដ្ឋ​អុិស្លាម​ដែល​ចេញពី​​​ពាក្យ​អារ៉ាប់​ លោក ចន ឃើរី ​​បាន​ថ្លែង​ថា “​លោក​នាយករដ្ឋមន្ត្រី​បាន​សម្ដែង​ការ​ចាប់​អារម្មណ៍​យ៉ាង​ខ្លាំង​លើ​​ប្រទេស​កម្ពុជា ក្នុង​ការ​ធ្វើ​ការ​ងារ​ជាមួយ​កង​​​កម្លាំងចម្រុះ​​​​ប្រឆាំង​​​​ពួកជ្រុលនិយម​”។

លោក​បាន​ថ្លែង​ថា “​គាត់​បាន​សម្ដែង​ការ​​ចាប់​អារម្មណ៍​លើ​ក្រុម​​របស់​យើង ​​អ្នក​ជំនាញ​របស់​យើង​មក​​​​គឺ​​​ដើម្បី​​​រៀបរាប់​សង្ខេប​​ និង​ផ្លាស់​ប្ដូរ​យោបល់​ ហើយ​យើង​បាន​យល់​​​ព្រម​ចំពោះ​រឿង​នោះ​”។ លោក​បាន​បន្ថែម​ថា កិច្ច​ប្រជុំ​កំពូល​នៅសាន់នីលែន​នឹង​ផ្ដល់​ឱកាស​​ដល់​មេដឹកនាំ​ទាំង​អស់​ដែល​មក​ជួប​ប្រជុំ​គ្នា​មាន​ “ការ​ពិភាក្សា​​ស៊ីជម្រៅ​​​” អំពី​ប្រធាន​បទ​នេះ​។

cam-photo-kerry-jump-satoshiអង្គការ​សង្គម​ស៊ីវិល​បាន​​ផ្ញើលិខិត​ចំហ​​​មួយ​ច្បាប់​ជូន​លោក​ ចន ឃើរី នៅ​សប្ដាហ៍​​​នេះ​ជំរុញ​​​ឲ្យ​លោក​លើក​ឡើង​អំពី​​​ការ​រំលោភ ​បំពាន​សិទ្ធិ​មនុស្ស​នៅ​ក្នុង​ប្រទេស​កម្ពុជា និង​​​ការ​​​វាយ​ប្រហារកាលពី​ពេល​ថ្មីៗ​​ទៅ​លើ​​​​គណបក្ស​ប្រឆាំង​អំឡុង​ជំនួប​របស់​លោក​ជាមួយ​លោក ហ៊ុន សែន។

លោក ចន ឃើរី បាន​ថ្លែង​ថា លោក​បាន​លើក​ឡើង​ពី​បំណងរបស់លោក​​ចង់​ឃើញ​ប្រជាជន​កម្ពុជា​​ទទួល​បាន​ប្រយោជន៍​ពី​ប្រទេស​របស់​ខ្លួនដែល​​ក្លាយ​ជា​ប្រទេស ប្រជា​​​ធិបតេយ្យ​ពហុបក្ស និង​រីកចម្រើន​។

លោក​បាន​ថ្លែង​ថា “​​​ខ្ញុំ​បាន​បញ្ជាក់​យ៉ាង​ច្បាស់ផងដែរ​​នៅ​ក្នុង​ជំនួប​របស់​ខ្ញុំ​នៅ​ថ្ងៃ​នេះ​ថា វា​ជា​ក្ដី​សង្ឃឹម​របស់​យើង ហើយ​ខ្ញុំ​គិត​ថា វា​ជា​ក្ដី​សង្ឃឹម​របស់​ពិភព​លោក​ ដែល​ប្រទេស​​​​កម្ពុជា​នឹងដឹង​ច្បាស់ពី​​ផល​ប្រយោជន៍​ពេញ​​​លេញ​ជាប្រទេស​​​ប្រជាធិបតេយ្យ​ពហុបក្ស​និង​រីក​ចម្រើន​​”។

លោក​បាន​បន្ថែម​ថា “​យើង​​យក​ចិត្ត​ទុក​ដាក់យ៉ាង​ខ្លាំង​​អំពី​ការ​គោរព​សិទ្ធិ​មនុស្ស សេរីភាព​ជា​សាកល និង​អភិបាល​កិច្ច​ល្អ​។ ហើយ​​វឌ្ឍនភាព​នៅ​ក្នុង​វិស័យនីមួយ​ៗ​ក្នុង​ចំណោម​វិស័យ​​​​ទាំងនេះ​ពិត​ជា​សំខាន់​​​ក្នុង​​​ការ​អាច​បំពេញ​តាម​សក្តានុពល​នៃ​​ទំនាក់​ទំនង​​ទ្វេភាគី​​របស់​យើង​ ប៉ុន្តែ​សំខាន់​​​​ដែរ​នោះ ​សក្តានុពេល​ពេញ​លេញ​នៃ​​ក្ដី​សង្ឃឹម​ និង​បំណង​ប្រាថ្នា​របស់​​ប្រជាជន​កម្ពុជា​”។

​ទីភ្នាក់​ងារ​​​ព័ត៌មាន​រដ្ឋរបស់​កម្ពុជា​ AKP បាន​​ដក​ស្រង់​​ចំណុច​ផ្សេង​ៗគ្នា​នៃការ​ពិភាក្សា​​​​ របស់​លោក ចន ឃើរី ជាមួយ​លោក​នាយក​​​រដ្ឋមន្ត្រី​​​ ដោយ​លើក​ឡើង​ជាសាធារណៈអំពី​ការពិត​ដែល​ថា សិទ្ធិ​មនុស្សមិនត្រូវ​បាន​លើក​ ឡើង​​នៅ​ក្នុង​អត្ថបទ​មួយ​ចុះ​ផ្សាយ​​នៅ​ក្នុង​គេហទំព័រ​របស់​ខ្លួន​​​​ដែល​​មាន​ចំណង​ជើង​ថា ​”មិន​មាន​ការ​លើក​ឡើង​ពី​បញ្ហា​​សិទ្ធិ​មនុស្ស​​អំឡុង​ការ​ពិភាក្សា​​រវាង​​​នាយក​រដ្ឋមន្ត្រី​កម្ពុជា និង​រដ្ឋមន្ត្រី​ការ​បរទេស​អាមេរិក​​”។

​នៅក្នុង​ការ​សំដៅ​ចំៗ​ដល់​ការ​វាយ​ដំ​​លើ​តំណាង​រាស្ត្រ​គណបក្ស​ប្រឆាំងកាលពី​ខែ​តុលា​​ គឺ​លោក ញ៉យ ចំរើន និង​លោក គង់ សភា លោក ចន ឃើរី បាន​ថ្លែង​ថា ​ការ​ធានា​សុវត្ថិភាព​​របស់​តំណាង​រាស្ត្រ​ជា​ “ការ​ទទួល​ខុស​ត្រូវ​​​សំខាន់” ​របស់​រដ្ឋាភិបាល​។

​​លោក​បាន​ថ្លែង​ថា ​”​រដ្ឋាភិបាល​ប្រជាធិប​​​តេយ្យ​មាន​​ការ​​ទទួល​ខុស​ត្រូវ​​ដើម្បី​ធានា​ថា ​តំណាង​​​​រាស្ត្រ​ជាប់ឆ្នោត​ទាំង​អស់​​​មាន​សេរីភាព​​​ក្នុង​​​ការ​បំពេញ​ការ​ងារ​របស់ខ្លួន​ដោយ​គ្មាន​​ការ​ភ័យ​ខ្លាច​ពីការ​វាយ​ប្រហារ​ ឬ​ការ​ចាប់​ខ្លួន​”។

នៅ​ពេល​រសៀល​ផង​ដែរ​ លោក ចន ឃើរី បាន​ជួប​ជាមួយ​គណៈប្រតិភូ​មន្ត្រី​ជាន់​ខ្ពស់​គណ​បក្ស​ប្រឆាំង​​ រួម​មាន​​​លោក កឹម សុខា អនុប្រធាន​គណបក្ស​ប្រឆាំង ហើយ​​មាន​ជំនួប​​ដាច់​ដោយឡែក​​ជាមួយ​មេដឹកនាំ​សង្គម​ស៊ីវិល​ផង​ដែរ​។

លោក​បាន​ថ្លែង​ថា ​”​នៅ​​គ្រប់​ជំនួប​ទាំង​នោះ​ ខ្ញុំ​បាន​បញ្ជាក់​ច្បាស់​ថា យើង​មាន​ការ​ប្ដេជ្ញា​ចិត្ត​ យើង​​​សហរដ្ឋអាមេរិក​មាន​ការ​ប្ដេជ្ញាចិត្ត​​ចំពោះ​ទំនាក់​ទំនង​​រវាង​ប្រទេស​របស់​យើង និង​ប្រទេស​កម្ពុជា​”។

នៅ​ក្នុង​សារ​បង្ហោះ​​ក្នុង​​ទំព័រ​ហ្វេសប៊ុក លោក អ៊ូ វីរៈ ​ស្ថាបនិក​​វេទិកា​​អនាគត​​ដែល​បាន​ចូល​រួម​​ក្នុង​ជំនួប​ជាមួយ​លោក ចន ឃើរី ដែរ​បាន​មាន​ប្រសាសន៍​ថា ការ​ពិភាក្សា​យូរ​ជាង​ការ​​រំពឹង​ទុករបស់លោក​​ ប៉ុន្តែ​​មាន​ការ​ពិភាក្សា​​ពី​​ខ្លឹមសារ​​​ខ្លីៗ​ប៉ុណ្ណោះ​”។

លោក ចន ឃើរី រដ្ឋ​​​មន្ត្រី​​​ក្រសួង​​​ការបរទេស​​​សហ​​​រដ្ឋ​​​អាមេរិក ​​​​​​ថ្លែង​​​ទៅ​​​កាន់​​​ក្រុម​​​អ្នក​​​យក​​​ព័ត៌មាន​​​នៅ​​​សួន​​​ច្បារ​​​សណ្ឋាគារ Raffles ក្នុង​​​រាជ​​​ធានី​​​ភ្នំពេញ​​​ កាល​​​ពី​​​ម្សិល​​​មិញ។ រូបថតៈ ស៊ីវ ចាន់ណា/The Cambodia Daily
លោក ចន ឃើរី រដ្ឋ​​​មន្ត្រី​​​ក្រសួង​​​ការបរទេស​​​សហ​​​រដ្ឋ​​​អាមេរិក ​​​​​​ថ្លែង​​​ទៅ​​​កាន់​​​ក្រុម​​​អ្នក​​​យក​​​ព័ត៌មាន​​​នៅ​​​សួន​​​ច្បារ​​​សណ្ឋាគារ រ៉ាហ្វល (Raffles) ក្នុង​​​រាជ​​​ធានី​​​ភ្នំពេញ​​​ កាល​​​ពី​​​ម្សិល​​​មិញ។ រូបថតៈ ស៊ីវ ចាន់ណា/The Cambodia Daily

​គណនី​ទ្វីតទ័រ​របស់​លោក ចន ឃើរី ​បាន​​រៀប​​​រាប់​ពី​កំណត់​ប្រចាំថ្ងៃនៃ​ព្រឹត្តិការណ៍​របស់​លោក​អំឡុង​ថ្ងៃ​នោះ​ រួម​ទាំង​​ដំណើរ​ទស្សន​​​​​​កិច្ច​នៅ​ពេល​ព្រឹក​​ទៅ​កាន់​សារមន្ទីរ​​​ជាត​​​ិ​​​ផង​​​ដែរ​​​ ប៉ុន្តែ​​គួរ​ឲ្យ​កត់​សម្គាល់មិនបាន​រាប់បញ្ចូល​ជំនួប​របស់​លោក​ជាមួយ​មន្ត្រី​​គណបក្ស​​ប្រឆាំង​​​​ទេ។ នៅ​ក្នុង​ជំនួប​ជាមួយ​​មេដឹកនាំ​រដ្ឋាភិបាល​ លោក​បាន​សរសេរ​ថា លោក​បាន​ “ពិភាក្សា​​អំពី​បញ្ហា​សេដ្ឋកិច្ច​​ និង​បញ្ហា​អាស៊ាន​ ការ​ពង្រឹង​​​​លទ្ធិប្រជាធិបតេយ្យ និង​ទំនាក់​ទំនង​​ទ្វេភាគី​​”។

រដ្ឋមន្ត្រី​ការ​បរទេស​រូប​េនះ​​ដែល​បាន​​មក​បំពេញ​ទស្សនកិច្ច​នៅ​ប្រទេស​កម្ពុជា​​​ជា​ច្រើន​​​​លើក​​​ក្នុង​នាមជា​សមាជិក​ព្រឹទ្ធសភា​អាមេរិក​ក្នុង​ទសវត្សរ៍​ឆ្នាំ​១៩៩០នោះ​​ បាន​កត់​សម្គាល់ ​អំឡុង​សុន្ទរកថា​​នា​ពេល​រសៀល​របស់​លោក​ថា ​ប្រទេស​កម្ពុជា​​មាន​ការ​​អភិវឌ្ឍ​ឆាប់​ រហ័ស​ចាប់​​តាំងពី​លោក​មក​កាន់​ទីនេះ​កាលពី​លើក​មុន ​និង​​បំណង​ប្រាថ្នា​របស់​​សហរដ្ឋ​​​អាមេរិក​​​ដើម្បី​ពង្រឹង​ទំនាក់ទំនង​សេដ្ឋកិច្ច​។

លោក​បាន​ថ្លែង​ថា “​​​ការ​រីក​ចម្រើន​ដែល​​​​អ្នក​​បាន​ធ្វើ​​នៅ​ក្នុង​ប្រទេស​កម្ពុជា​​គួរ​ឲ្យ​កត់​សម្គាល់​បំផុត​។ នៅ​ពេល​ខ្ញុំ​មក​ទីនេះ​ដំបូង ទីក្រុង​មាន​ប្រជាជន​តែ​​៣៥០​.០០០​នាក់​ប៉ុណ្ណោះ ហើយ​​សេដ្ឋកិច្ច​​​ដុន​ដាបមែនទែន ហើយ​​ ឥឡូវ​នេះ​ទីក្រុង​មាន​ប្រជាជន​​ដល់​ទៅ​ ២,២​លាន​នាក់​ ​ដោយមាន​មន្ទីរ​ពេទ្យ​ទំនើបៗ ​​​អគារ​ខ្ពស់ៗ មាន​ថាមពល​និង​មាន​​ភ្ញៀវ​ទេសចរ ​ដ៏ច្រើន​។ ​លោក ចន ឃើរី បាន​​លើក​ឡើង​ថា វា​​ពិត​ “ជា​គួរ​​ឲ្យ​កត់​សម្គាល់បំផុត​” ​ដែល​​អាមេរិក​នៅ​ តែ​ជា​ទីផ្សារ​នាំ​ចេញ​​ដ៏​សំខាន់​របស់​ប្រទេស​កម្ពុជា”។

លោក​បាន​ថ្លែង​ថា “​ហើយ​យើង​នឹង​បន្ត​​រិះរក​មធ្យោបាយ​ដើម្បី​​បង្កើនពាណិជ្ជកម្ម និង​ទំនាក់​ទំនង​វិនិយោគ​ រួម​ទាំង​​ការ​ជួយ​ដោះ​ស្រាយ​អំពើ​ពុក​រលួយ​​​ និង​ការ​ស្វែង​រក​មធ្យោ​ បាយ​​​ដើម្បី​ពង្រឹង​ស្ថាប័ន​ច្បាប់​​​​នៅ​ក្នុង​ប្រទេស ​កម្ពុជា​ជា​ដើម​។ ​មិនដូច​លោក​ស្រី ហ៊ីឡារី គ្លីន​​​តុន អតីត​​រដ្ឋមន្ត្រី​ក្រសួង​ការ​បរទេស​​​​អាមេរិក​​​ដែល​បាន​​​ធ្វើ​ការ​ពិភាក្សា​ជា​សាធារណៈ ​ជាមួយ​និស្សិត​រាប់​រយ​នាក់​​​អំឡុង​ដំណើរ​ទស្សនកិច្ច​របស់​លោកស្រី​មក​កាន់​ប្រទេស​កម្ពុជា​​កាល​ពី​ឆ្នាំ​២០១០ លោក ចន ឃើរី មិន​មាន​ពេល​ឲ្យ​មាន​ការចោទសួរ​ជា​​​សាធារណៈ ណាមួយ​ទេ ហើយ​​​ជំនួប​របស់​លោក​​​ ​​​​​​​​គឺ​​​​ជា​ជំនួប​បិទ​ទ្វារ​មិន​ឲ្យ​អ្នក​សារព័ត៌​​​មាន​ចូល​។

លោក ហោ ណាំហុង រដ្ឋមន្ត្រី​ការ​បរទេស​​​​​ក៏​បាន​លើក​ឡើង​អំពី​សារៈសំខាន់​នៃ​កិច្ច​សហ​ប្រតិបត្តិការ​​ក្នុង​ការ​ប្រយុទ្ធប្រឆាំង​រដ្ឋ​​​អុីស្លាម​នៅ​ក្នុង​សុន្ទរកថា​បន្ទាប់ពី​ជំនួប​របស់​លោក​ជាមួយ​លោក ចន​ ឃើរី ផង​ដែរ​។

លោក​បាន​ថ្លែង​ថា “ខ​្ញុំ​មិន​ជឿ​ថា ការ​បោស​ សម្អាត​​​​ក្រុម​ I.S ​អាច​ធ្វើបាន​ដោយ​ប្រទេស​មួយ ​​ឬ​យោធា​​របស់​ប្រទេស​មួយ​នោះ​ទេ។ ពីព្រោះ​ទង្វើ​​ឃោរឃៅ​របស់​រដ្ឋ​អុិស្លាម​​ វា​មិន​មែន​ជា​ការ​គំរាម​កំហែង​​សម្រាប់​ប្រទេស ​​​​អុីរ៉ាក់​ និង​ប្រទេស​ស៊ីរី​ប៉ុណ្ណោះ​ទេ វា​​​​គំរាម​កំហែង​ដល់​តំបន់​អាហ្វ្រិក និង​អាស៊ី​ផងដែរ​”។

​បើ​ទោះ​ជា​មាន​ភាព​តាន​តឹង​រវាង​អាមេរិក​ ​​​និង​ចិន​ជុំវិញ​ការ​អះអាង​​​​​ការ​កាន់​កាប់​​សមុទ្រ​ចិន​ខាង​ត្បូង និង​ការ​ប្រកួត​ប្រជែង​​​កាន់​​​តែខ្លាំងឡើង​​រវាង​ប្រទេស​មហាអំណាច​​​ចំពោះ​​​​​ឥទ្ធិពល​នៅ​ក្នុង​តំបន់​​ក៏ដោយ ក៏​លោក​ ហោ ណាំហុង បាន​ថ្លែង​ថា លោក ចន ឃើរី ​មិន​បាន​ជំរុញ​ប្រទេស​កម្ពុជា​​​ស្តីពី​បញ្ហានេះ​ពាក់​ព័ន្ធ​​ប្រទេស​ចិនឡើយ​។

លោក​បាន​ថ្លែង​ថា “​ឯក​ឧត្ដម​ ចន ឃើរី ក៏​បាន​លើក​ឡើង​ផង​ដែរ​ថា លោក​មិន​បាន​ស្នើ​ឲ្យ​ប្រទេស​កម្ពុជា​គាំទ្រ​អាមេរិក ឬ​​គាំទ្រ​ចិន​ឡើយ​។ ខ្ញុំ​បាន​ពន្យល់​ប្រាប់​​​លោក​ថា ការ​ពិត​ កម្ពុជា​ជា​ប្រទេស​តូច​មួយ​ និង​ជា​ប្រទេស​ក្រីក្រ​​ ប៉ុន្តែ​យើង​ឯករាជ្យ”។

ប្រទេស​កម្ពុជា​​បាន​រង​ការ​រិះគន់​​យ៉ាង​ខ្លាំង​ថា បាន​គាំទ្រ​ប្រទេស​​ចិន​នៅ​ក្នុង​ជម្លោះ​អធិបតេយ្យ​របស់​ខ្លួន​ជាមួយ​ប្រទេស​​អាស៊ាន​​​​មួយ​ចំនួន​ទាក់ទិន​សមុទ្រ​ចិន​ខាង​ត្បូង។

យោង​តាម​លោក អៀង សុផា​​​ល្លែត ​​ជំនួយ​ការ​ផ្ទាល់​របស់​លោក​​ ហ៊ុន សែន ដែល​​បាន​និយាយ​ទៅ​កាន់​​អ្នក​យក​ព័ត៌មាន​បន្ទាប់ពី​ជំនួប​​​ឲ្យដឹងថា អំឡុង​​ការ​ពិភាក្សា​របស់​លោក ចន ឃើរី ​ជាមួយ​លោក ហ៊ុន សែន ​​​លោក​នាយក​រដ្ឋ​​​មន្ត្រី​ក៏​បាន​ស្នើ​ឲ្យ​​អាមេរិក​បន្ត​គាំទ្រ​ក្នុង​ “វិស័យ​សុខាភិបាល អប់រំ និង​ការ​បោស​សម្អាត​ មីន​”។

លោក អៀង សុផាល្លែត បាន​ថ្លែង​ថា លោក ហ៊ុន សែន ក៏​បាន​សម្ដែង​​​​ពី​បំណង​ប្រាថ្នា​របស់​លោក​​សុំ​ឲ្យ​សហរដ្ឋអាមេរិក​ពិចារណា​ “​អនុញ្ញាត​ឲ្យ​ប្រទេស​កម្ពុជា​នាំ​ចេញ​ទំនិញ​ទៅ​កាន់​សហរដ្ឋ​អាមេរិក​ដោយ​គ្មាន​កូតា​​​ ឬ​ការ​លើក​លែង​ពន្ធ​​ ជា​​​​កត្តា​ដែល​នឹង​​ជួយ​ជំរុញ​​ឲ្យ​មាន​ការ​​​អភិវឌ្ឍ​របស់​​​ប្រទេស​កម្ពុជា​”៕ សារុន​​​​

© 2016, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.