សាលាបឋមសិក្សាមួយក្នុងក្រុងបាត់ដំបង និងផ្លូវមួយចំនួនជុំវិញនោះ នឹងត្រូវបិទរយៈពេល៤ថ្ងៃនៅសប្ដាហ៍ក្រោយសម្រាប់ការថតខ្សែភាពយន្តដែលមានចំណងជើងថា ”មុនដំបូង ខ្មែរក្រហមសម្លាប់ប៉ាខ្ញុំ” របស់លោកស្រី អ៊ែនជេលីណា ចូលី ភីត នេះបើយោងតាមមន្ត្រីខេត្តនេះលើកឡើងកាលពីម្សិលមិញ។
លោក ងី សេត ប្រធានមន្ទីរអប់រំខេត្តបាត់ដំបង បានមានប្រសាសន៍ថា មជ្ឈមណ្ឌលបុប្ផាណា បង្កើតឡើងដោយលោក ប៉ាន់ ឫទ្ធិ ដែលជាសហផលិតករនៃខ្សែភាពយន្តនេះ បានផ្ញើលិខិតមកមន្ទីរអប់រំដើម្បីស្នើសុំការអនុញ្ញាតថតខ្សែភាពយន្តនៅបឋមសិក្សា២ធ្នូ។
លោកមានប្រសាសន៍ថា “ខ្ញុំបានឆ្លើយតបទៅពួកគាត់វិញហើយដោយអនុម័តឲ្យពួកគាត់ប្រើប្រាស់បឋមសិក្សា២ធ្នូ សម្រាប់ការថតខ្សែភាពយន្ត” ហើយថា សិស្សនឹងខកខានម៉ោងរៀនរយៈពេល៣ថ្ងៃ ប៉ុន្តែទោះជាយ៉ាងណា លោកបានណែនាំនាយកសាលាឲ្យប៉ះប៉ូវម៉ោងរៀនដែលសិស្សខកខាន។ លោកបានបន្តថា “ខ្ញុំនឹងប្រាប់ឲ្យនាយកបឋមសិក្សា២ធ្នូ ប៉ះប៉ូវម៉ោងរៀនរបស់សិស្សវិញនៅរាល់ថ្ងៃព្រហស្បតិ៍ដែលជាធម្មតាសិស្សមិនរៀន។
លោកស្រី ឯម សារី ដែលជាមន្ត្រីសាលាសង្កាត់បានមានប្រសាសន៍ថា មជ្ឈមណ្ឌលបុប្ផាណា បានជូនដំណឹងទៅលោកស្រីថា ខ្លួនក៏នឹងជ្រើសរើសមនុស្សប្រមាណ១.០០០នាក់ផងដែរដើម្បីចូលរួមការថតខ្សែភាពយន្តនេះ។ “ក្រុមហ៊ុនបានប្រកាសថា ខ្លួនកំពុងស្វែងរកប្រជាពលរដ្ឋដែលរស់នៅបាត់ដំបង ដើម្បីចូលរួមការថតខ្សែភាពយន្ត”៕ សុខុម