មន្ត្រីម្នាក់បានលើកឡើងកាលពីម្សិលមិញថា នគរបាលបានចាប់ជនជាតិចិន៤នាក់បន្ថែមទៀតពាក់ព័ន្ធនឹងការជួញដូរគ្រឿងញៀន ដែលមានទីតាំងចេញពីសណ្ឋាគារសុខា ក្នុងក្រុងភ្នំពេញ ក្នុងនោះមានបុរស៣នាក់ដែលត្រូវចាប់ខ្លួនបានពេលពួកគេប្រុងប្រៀបឡើងយន្តហោះទៅប្រទេសចិន។
យោងតាមនគរបាលបានឲ្យដឹងថា សមាជិកដែលជាប់សង្ស័យ៤នាក់នៃក្រុមជួញដូរគ្រឿងញៀនមេតំហ្វេតាមីន ដែលមានបុរសជនជាតិចិនពីរនាក់ ស្រ្តីចិនម្នាក់ និងស្រ្តីវៀតណាមម្នាក់នោះ ត្រូវបានចាប់ខ្លួនដោយសារមានថ្នាំញៀនទម្ងន់កន្លះគីឡូក្រាមជាប់ខ្លួន នៅសណ្ឋាគារដ៏ប្រណិតនេះក្នុងខណ្ឌជ្រោយចង្វាកាលពីយប់ថ្ងៃពុធ ហើយក្រោយមកពួកគេបានសារភាពថា បានបើកទឹកបង្ហូរថ្នាំញៀនចោលចំនួនប្រាំគីឡូក្រាមតាមបង្គន់ក្នុងបន្ទប់របស់ខ្លួន។
យោងតាមលោក អីុវ ភារិទ្ធ នាយការិយាល័យប្រឆាំងគ្រឿងញៀន ដែលបានដឹកនាំការឆ្មក់ចាប់នេះ បានឲ្យដឹងថា កាលពីរសៀលថ្ងៃសុក្រ បុរសជនជាតិចិនម្នាក់ទៀតត្រូវបានចាប់ខ្លួនក្នុងការឆ្មក់ចូលសណ្ឋាគារនេះ ដែលនៅអំឡុងពេលនោះនគរបាលរឹបអូសបានសារធាតុពណ៌សស្អិតៗក្នុងចានលាយ និងថង់ប្លាស្ទិកតូចៗមានសារធាតុម្សៅស។
លោក អីុវ ភារិទ្ធ បាននិយាយថា “ខ្ញុំបានបញ្ជូនវាទៅអាជ្ញាធរជាតិប្រឆាំងគ្រឿងញៀន ដើម្បីពិសោធ ថាតើវាជាគ្រឿងញៀនឬយ៉ាងណា”។ លោកបន្ថែមថា មន្ត្រីរបស់លោកក៏បានរឹបអូសកាំភ្លើងខ្លីមួយដើមនិងឧបករណ៍បម្រើផ្លូវភេទជាច្រើន ដែលបុរសជនជាតិចិននេះបានអះអាងថា គឺសម្រាប់ការប្រើប្រាស់ផ្ទាល់ខ្លួនផងដែរ។
លោកបានលើកឡើងថា កាលពីថ្ងៃសៅរ៍ នគរបាលបានចាប់បុរសជនជាតិចិនបីនាក់ទៀតនៅអាកាសយានដ្ឋានអន្តរជាតិភ្នំពេញ។
លោកបន្តថា ”ពួកគេឈរនៅក្នុងអាកាសយានដ្ឋានត្រៀមឡើងយន្តហោះទៅប្រទេសចិនដើម្បីចូលឆ្នាំថ្មី”។ លោកបានពន្យល់ថា ៣នាក់នេះបានបង្ហាញលិខិតនៅច្រកចូលរួចហើយ និងកំពុងរង់ចាំទទួលទិដ្ឋាការចេញ នៅពេលពួកគេត្រូវបានចាប់ខ្លួនបាននោះ។
នាយការិយាល័យប្រឆាំងគ្រឿងញៀនរូបនេះបាននិយាយថា ជនសង្ស័យទាំង៨នាក់ដែលត្រូវគេចាប់ខ្លួនបាន ហើយលោកមិនព្រមប្រាប់ឈ្មោះនោះ ស្ថិតនៅក្រោមការតាមដានឃ្លាំមើលមុនពេលឈានដល់ការចាប់ខ្លួនហើយត្រូវបានគេឃើញនៅជាមួយគ្នាជាច្រើនលើក។ លោកបាននិយាយថា ពួកគេមួយចំនួនត្រូវបានសាកសួរនៅសាលាដំបូងរាជធានីភ្នំពេញកាលពីម្សិលមិញ ហើយត្រូវបានឃំុខ្លួននៅស្នងការដ្ឋាននគរបាលរាជធានី ខណៈដែលអ្នកសើុបអង្កេតព្យាយាមកំណត់ទំហំនៃការជួញដូរមេតំហ្វេតាមីន និងតាមចាប់មេខ្លោងរបស់ពួកគេ។
លោកបាននិយាយថា “ពួកគេមិនមែនជាមេខ្លោងទេ។ យើងចាំបាច់ត្រូវរកឲ្យឃើញអ្នកសមគំនិតថែមទៀតក្នុងប្រទេសរបស់យើង ដូច្នេះយើងអាចតាមចាប់មេខ្លោងបាន”។
លោក មាស វិរិទ្ធ អគ្គលេខាធិការនៃអាជ្ញាធរជាតិប្រឆាំងគ្រឿងញៀន និយាយថា លោកមិនទាន់បានទទួលសារធាតុសនោះពីលោក ភារិទ្ធ នៅឡើយទេ ហើយថា លោកបានដឹងតិចតួចអំពីករណីនេះ៕ និត