នគរបាលក្រុងភ្នំពេញបាននិយាយថា ខ្លួនមានអត្តសញ្ញាណជនសង្ស័យម្នាក់ជាប់ពាក់ព័ន្ធនឹងការរំលោភសម្លាប់ក្មេងស្រីអាយុ១៥ឆ្នាំម្នាក់ដែលសាកសពនាងត្រូវបានរកឃើញនៅតាមមាត់ទន្លេកាលពីយប់ថ្ងៃអាទិត្យក្នុងក្រុងភ្នំពេញ។
លោក ហួរ ម៉េងវ៉ាង អធិការរងខណ្ឌបាននិយាយថា ក្មេងស្រីជនជាតិវៀតណាមឈ្មោះ ជួប ស្រីពៅ រស់នៅខេត្តព្រៃវែង ហើយបានមកក្រុងភ្នំពេញជួយលក់ផ្កាឲ្យម្តាយនាងមុននឹងចូលឆ្នាំចិន។
លោក ហួរ ម៉េងវ៉ាង បាននិយាយថា ជនរងគ្រោះអបអរបុណ្យចូលឆ្នាំកាលពីថ្ងៃអាទិត្យជាមួយសាច់ញាតិរបស់នាងនៅក្នុងសង្កាត់ចាក់អង្រែក្រោម ខណ្ឌមានជ័យ ហើយបានចាកចេញពីទីនោះនៅម៉ោងប្រហែល៣រសៀល ដើម្បីវិលត្រឡប់មកផ្ទះសមាជិកគ្រួសារម្នាក់ទៀតដែលនាងស្នាក់នៅជាមួយនៅក្នុងសង្កាត់ចាក់អង្រែក្រោម រហូតដល់ម៉ោង៩យប់ទើបមានគេរាយការណ៍ឲ្យនគរបាលថានាងបានបាត់ខ្លួន។
លោក ហួរ ម៉េងវ៉ាង បាននិយាយថា “ជនល្មើសបានចាប់នាងរំលោភ បន្ទាប់មកចាប់នាងជ្រមុជទឹកទន្លេ”។ មន្ត្រីនគរបាលរូបនេះបាននិយាយថា នគរបាលបានសន្និដ្ឋានបែបហ្នឹង ពីព្រោះជនរងគ្រោះត្រូវបានគេរកឃើញលិចទឹកបាក់កណ្តាលខ្លួន ដោយដៃម្ខាងស្រវាចាប់ដើមបបុសនៅមាត់ច្រាំង។
លោក តេង ស៊ីណូ អធិការខណ្ឌ បាននិយាយថា ជនរងគ្រោះត្រូវបាននគរបាលរកឃើញនៅតាមច្រាំងទន្លេបាសាក់នៅម៉ោងប្រហែល៩កន្លះយប់ ប៉ុន្តែបាននិយាយអំពីហេតុការណ៍ខុសគ្នាខ្លះៗ ដោយរៀបរាប់ថា សាកសពនាងត្រូវបានឃាតករបោះចោលទៅក្នុងទឹកបន្ទាប់ពីស្លាប់ហើយ។ លោកអធិការខណ្ឌរូបនេះបាននិយាយថា កោសល្យវិច័យបង្ហាញថានាងត្រូវគេចាប់រំលោភ។
លោក អេង សោភា នាយការិយាល័យព្រហ្មទណ្ឌនគរបាលក្រុងភ្នំពេញ បាននិយាយថា នគរបាលបានមានឈ្មោះជនល្មើសរួចហើយ ហើយកំពុងធ្វើការដើម្បីចាប់ខ្លួនជនសង្ស័យ ប៉ុន្តែបានបដិសេធមិនផ្តល់ព័ត៌មានបន្ថែម។
លោក សុខ ផល ជាឪពុកមារបស់ជនរងគ្រោះ បាននិយាយថាហេតុការណ៍នេះបានធ្វើឲ្យលោក និងគ្រួសារលោករន្ធត់យ៉ាងខ្លាំង។
លោក សុខ ផល បាននិយាយថា “ខ្ញុំសោកស្តាយក្មួយស្រីខ្ញុំណាស់។វាជាក្មេងស្រីគួរឲ្យស្រឡាញ់។ ខ្ញុំសូមឲ្យប៉ូលិសចាប់ខ្លួន និងផ្តន្ទាទោសជនល្មើសចំពោះមុខច្បាប់”៕រើន