បុរសជនជាតិហូឡង់ម្នាក់ត្រូវបានដោះលែងដោយគ្មានការចោទប្រកាន់កាលពីម្សិលមិញ បន្ទាប់ពីព្យាយាមរត់ចេញពីបន្ទប់ឃុំខ្លួននៅស្នងការដ្ឋាននគរបាលរាជធានី ភ្នំពេញទីដែលជននេះត្រូវបានឃុំខ្លួនកាលពីយប់ថ្ងៃពុធ ពីបទបើកបរដោយមានជាតិស្រវឹង។
យោងតាមលោក ទិន វ៉ាន់ស៊ី មន្ត្រីនគរ បាលចរាចររាជធានីដែលបានពិន័យជនជាតិហូឡង់រូបនេះបានឲ្យដឹងថា Niels van Klooster អាយុ២៨ឆ្នាំត្រូវបានឃាត់ពេលកំពុងជិះម៉ូតូហុងដាឌ្រីមក្នុងខណ្ឌឫស្សីកែវនៅម៉ោងប្រហែល១០យប់ថ្ងៃពុធ ហើយត្រូវបានបញ្ជូនទៅប៉ុស្តិ៍នគរបាលបន្ទាប់ពីមន្ត្រីនគរបាលបានកំណត់ថា ជននេះស្រវឹងស្រា។
លោក វ៉ាន់ស៊ី បានមានប្រសាសន៍ថា បន្ទាប់ពីត្រូវបាននាំទៅកាន់បន្ទប់ឃុំខ្លួនដោយ មានអ្នកជាប់ឃុំប្រាំនាក់ទៀត van Kloosterដំបូងបានប្រើបំពង់ទីបជ័រ ដែលសល់ពីការជួសជុលបន្ទប់នេះកាលពីពេលថ្មីៗទៅបុកទម្លុះពិដានធ្លុះប្រវែង១ម៉ែត្រ។
លោកបានថ្លែងថា “ជននេះបានព្យាយាមរត់គេចខ្លួនដោយយកបំពង់ទីបជ័រគាស់ពិដាននោះ។ លោកបន្ថែមថា នៅពេល van Klooster ព្យាយាមឡើងចូលក្នុងប្រហោងដែលខ្លួនបានទម្លុះ ស្រាប់តែធ្លាក់មកលើអ្នកជាប់ឃុំជាច្រើននាក់ទៀត ហើយគ្រេចកជើង”។
លោក វ៉ាន់ស៊ី បានថ្លែងថា “បន្ទាប់ពីធ្លាក់ពីលើពិដានមក ជននេះបានធាក់ទ្វារ ប៉ុន្តែ យើងបានប្រាប់គាត់ឲ្យឈប់”។ លោកបាននិយាយថា van Klooster ត្រូវបានបញ្ជូនទៅសាលាដំបូងរាជធានីភ្នំពេញកាលពីព្រឹកម្សិលមិញ ប៉ុន្តែ ត្រូវបានដោះលែងវិញដោយមិនធ្វើការចោទប្រកាន់អ្វីឡើយ បន្ទាប់ពីបង់ប្រាក់សុំនៅក្រៅឃុំ។
លោកបាននិយាយថា “យើងមិនបានចោទប្រកាន់ជននេះពីបទបំផ្លាញទ្រព្យសម្បត្តិទេ ពីព្រោះគាត់បានសុំអភ័យទោស ហើយនិយាយថា ក្រុមគ្រួសាររបស់គាត់នឹងធានាជួសជុលជូនយើងវិញ”៕សារុន