ចម្ការកៅស៊ូមួយនៅក្នុងខេត្តមណ្ឌលគិរី ដែលត្រូវបានផ្តោតគោលដៅដោយក្រុមការងារពិសេសថ្មីរបស់រដ្ឋាភិបាលដែលបោសសម្អាតបណ្តាខេត្តភាគបូពា៌ដើម្បីរកការស្តុកឈើខុសច្បាប់បានបដិសេធថា មិនមានការជាប់ពាក់ព័ន្ធណាមួយនៅក្នុងអាជីវកម្មឈើខុសច្បាប់ឡើយ។
ក្រុមហ៊ុនចម្ការកៅស៊ូ យូនីគ្រីន រីសសស៍ (Unigreen Resources) គឺជាក្រុមហ៊ុនមួួយក្នុង ចំណោមក្រុមហ៊ុនជាច្រើនដែលអាជ្ញាធរបានចុះទៅពិនិត្យមើលទូទាំងបណ្តាខេត្តភាគបូពា៌ចាប់តាំងពីលោកនាយករដ្ឋមន្ត្រី ហ៊ុន សែន បានប្រកាសបង្កើតក្រុមការងារពិសេសនេះកាលពីពាក់កណ្តាលខែមករា ហើយបានឱ្យ
លោក សៅ សុខា មេបញ្ជាការកងរាជអាវុធហត្ថលើផ្ទៃប្រទេសទទួលបន្ទុកការងារនេះ។
ក្នុងលិខិតមួយច្បាប់ផ្ញើជូននាយឧត្តមសេនីយ៍ សៅ សុខា ដែលបានផ្សព្វផ្សាយតាមប្រព័ន្ធផ្សព្វផ្សាយកាលពីម្សិលមិញ លោក ឡាំ គីមជាន តំណាងក្រុមហ៊ុនយូនីគ្រីន បានបដិសេធថាមិនមានសកម្មភាពខុសច្បាប់ណាមួយឡើយ។
លោកបានថ្លែងថា ប្រព័ន្ធផ្សព្វផ្សាយក្នុងស្រុករាយការណ៍ថា ក្រុមហ៊ុននេះមានទំនាក់ទំនងជាមួយឧកញ៉ា ទ្រី ភាព ឈ្មួញឈើដ៏ល្បីឈ្មោះម្នាក់ ឬពាណិជ្ជករ តុប វីយ៉ាដា ឬថា ក្រុមការងារពិសេសនេះបានរកឃើញឈើខុសច្បាប់មួយចំនួនធំនៅលើដីនេះកាលពីថ្ងៃទី២៩ ខែមករា គឺមិនពិតឡើយ។
លោកបានលើកឡើងថា ”យើងជឿថា ពាក្យចចាមអារ៉ាមទាំងនេះបង្កើតឡើងដោយពិរុទ្ធជនយ៉ាងពិតប្រាកដដើម្បីផ្តោតការចាប់អារម្មណ៍មកលើក្រុមហុ៊ន យូនីគ្រីន ។ យើងមិនចាប់អារម្មណ៍ឈើនេះទេ ហើយក៏មិនជាប់ពាក់ព័ន្ធជាមួយក្រុមហ៊ុនឈើណាមួយដែរ។ យើងគ្រាន់តែចង់អភិវឌ្ឍចម្ការកៅស៊ូរបស់យើងតាមផែនការមេរបស់យើងប៉ុណ្ណោះហើយការចោទប្រកាន់មិនពិតទាំងនេះបានរារាំងដល់ការអភិវឌ្ឍរបស់យើង”។
លោក គីមជាន បានថ្លែងថា អាជ្ញាធរបានចុះពិនិត្យឈើមួយគំនរនៅក្បែរនោះ ប៉ុន្តែ មិនមែនឈើនៅលើចម្ការកៅស៊ូរបស់ខ្លួនទេ កាលពីថ្ងៃទី២៧ ខែមករា។
លោកបន្ថែមថា តាមពិតក្រុមហ៊ុននេះបានប្រាប់អាជ្ញាធរមូលដ្ឋានអំពីការកាប់ឈើខុសច្បាប់នៅជុំវិញចម្ការកៅស៊ូរយៈពេលពីរឆ្នាំកន្លងមក ប៉ុន្តែគ្មានប្រយោជន៍ឡើយ។
លោក ទ្រី ភាព បានចេញសេចក្តីថ្លែងការណ៍ផ្ទាល់ខ្លួនកាលពីខែមុនបដិសេធរបាយការណ៍ដែលថា លោកជាប់ពាក់ព័ន្ធទៅនឹងក្រុមហុ៊ន យូនីគ្រីន ។
នៅពេលទាក់ទងកាលពីម្សិលមិញ លោក ស្វាយ សំអៀង អភិបាលរងខេត្តមណ្ឌលគិរីបានមានប្រសាសន៍ថា អាជ្ញាធរបានរកឃើញឈើនៅលើដីរបស់ក្រុមហ៊ុន យូនីគ្រីន កាលពីខែមុន តែលោកមិនចាំកាលបរិច្ឆេទជាក់លាក់ ឬចំនួនឈើឡើយ ហើយសង្ស័យថា ឈើទាំងនេះត្រូវបានកាប់ដោយក្រុមហ៊ុនមួយដែលក្រុមហ៊ុននេះបានជួលឲ្យរានដី។
លោកបានថ្លែងថា “បើទោះជាក្រុមហុ៊ន យូនីគ្រីន បដិសេធថា មិនជាប់ពាក់ព័ន្ធឈើនេះក៏ដោយ ក៏ក្រុមហ៊ុនត្រូវទទួលខុសត្រូវចំពោះឈើនេះដែរ ពីព្រោះក្រុមហ៊ុនបានអនុញ្ញាតឲ្យដៃគូអាជីវកម្មរបស់ខ្លួនប្រើប្រាស់ដីនេះដើម្បីស្តុកឈើ”។
លោក អេង ហីុ អ្នកនាំពាក្យរបស់ក្រុមការងារពិសេសថ្មីនេះបានថ្លែងថា អាជ្ញាធរកំពុងពិនិត្យមើលឈើដែលរកឃើញនៅចម្ការកៅស៊ូរបស់ក្រុមហុ៊នយូនីគ្រីននៅឡើយ។
លោកបានថ្លែងថា ”យើងមិនទាន់ហ៊ានសន្និដ្ឋានថា ឈើនេះស្របច្បាប់ ឬខុសច្បាប់ឡើយ ព្រោះក្រុមការងារពិសេសកំពុងសើុបអង្កេតនៅឡើយ”។
នៅក្នុងករណីដាច់ដោយឡែកមួយទៀតអាជ្ញាធរខេត្តស្ទឹងត្រែងលើកឡើងថា ពួកគេបានរកឃើញឈើធ្នង់ ជាប្រភេទឈើលេខ១ គ្មានឯកសារត្រឹមត្រូវចំនួន១៨ម៉ែត្រគូប ក្នុងរោងអារឈើរបស់ស្ត្រីម្នាក់ឈ្មោះ ហេង សំនៀង កាលពីថ្ងៃព្រហស្បតិ៍ និងឈើធ្នង់៤០២ដុំទៀតនៅក្បែរនោះ។
លោក ម៉ែន គង់ អនុប្រធានរដ្ឋបាលខេត្តបានមានប្រសាសន៍កាលពីម្សិលមិញថា ”យើងមិនទាន់ហ៊ានសន្និដ្ឋានថា ឈើនេះជារបស់ស្ត្រីរូបនេះទេ ពីព្រោះវាស្ថិតនៅក្រៅរោងអារឈើនៅឡើយ”។
លោក ម៉ែន គង់ បានថ្លែងថា ឈើដែលរកឃើញនៅក្នុងរោងអារឈើ គឺខុសច្បាប់ ហើយនឹងត្រូវរឹបអូសជាទ្រព្យសម្បត្តិរដ្ឋ ហើយថា វិធានការដដែលនេះនឹងធ្វើចំពោះឈើដែលរកឃើញនៅក្បែរនោះ ប្រសិនបើគ្មាននរណាម្នាក់អះអាងទេនោះ។
តាមបញ្ជារបស់ទីស្តីការគណៈរដ្ឋមន្ត្រី ឈើគ្មានការអះអាងទាំងអស់ដែលត្រូវរឹបអូសដោយរដ្ឋ ត្រូវលក់ទៅឲ្យលោក ទ្រី ភាព ដែលកន្លងមកបានទិញឈើរាប់ពាន់ម៉ែត្រគូបក្នុងតម្លៃថោក។ តាមច្បាប់ ឈើដែលរឹបអូសបានត្រូវដាក់លក់ដេញថ្លៃជាសាធារណៈ៕ សារុន