ពេលលោក សុខ ប៊ុន ឧកញ៉ាខាងអចលនទ្រព្យម្នាក់បានទាត់ធាក់ និងអូសកញ្ញា ឯក សុជាតា អតីតពិធីការិនីទូរទស្សន៍ល្បីឈ្មោះម្នាក់ក្នុងភោជនីយដ្ឋានមួយក្នុងរាជធានីភ្នំពេញកាលពីខែកក្កដា អង្គរក្សផ្ទាល់របស់ពាណិជ្ជកររូបេនះបានដកកាំភ្លើងខ្លីរបស់ខ្លួន ហើយភ្ជង់អតីតពិធីការិនីរូបនេះ។
លោក សុខ ប៊ុន ត្រូវបានរកឃើញមានពិរុទ្ធភាពពីបទប្រើអំពើហិង្សាដោយចេតនាមានស្ថានទម្ងន់ទោសកាលពីថ្ងៃច័ន្ទ ហើយត្រូវបានផ្ដន្ទាទោសឲ្យជាប់ពន្ធនាគារ៣ឆ្នាំ ប៉ុន្តែបានព្យួរទោសដោយអនុវត្តទោសតែ១០ខែប៉ុណ្ណោះ។
ប៉ុន្តែអង្គរក្សរបស់លោកកំពុងរត់គេច ខ្លួននៅឡើយ ហើយមន្ត្រីនគរបាលដែលកំពុងតែធ្វើការស៊ើបអង្កេតបាននិយាយថា អាជ្ញាធរមិនបានស្វែងរកជននេះឲ្យបាន សកម្មឡើយ។
កញ្ញា សុជាតា ដែលគេស្គាល់ថា សាសា បានដាក់ពាក្យបណ្ដឹងពីបទប៉ុនប៉ងមនុស្សឃាតប្ដឹងលោក សុខ ប៊ុន និងអង្គរក្សរបស់លោកបន្ទាប់ពីការវាយដំកាលពីថ្ងៃទី២ ខែកក្កដា ដែលត្រូវបានថតជាប់ដោយកាមេរ៉ាសុវត្ថិភាពនៅភោជនីយដ្ឋាននេះ។
នៅក្នុងរូបភាពវីដេអូដែលបានបង្កឲ្យមានការថ្កោលទោសជាសាធារណៈបន្ទាប់ពីត្រូវបានបង្ហោះតាមអុីនធឺណិតដោយកញ្ញា សុជាតា ខ្លួនឯង គេឃើញអង្គរក្សរូបនេះរារាំងអ្នកបម្រើម្នាក់មិនឲ្យជួយអន្តរាគមន៍ ហើយក៏បានដកកាំភ្លើងខ្លីភ្ជង់ក្បាលអតីតពិធីការិនីរូបនេះទៀតផង បន្ទាប់ពីលោក សុខ ប៊ុន បានគ្រវែងនាងឲ្យដួលលើឥដ្ឋ។
យោងតាមកញ្ញា សុជាតា បានឲ្យដឹងថា ជននេះបានព្យាយាមបាញ់នាង តែបាញ់មិនផ្ទុះ។ បើទោះជាបុរសទាំងពីរនាក់នេះបានគេចខ្លួនបន្ទាប់ពីរូបភាពវីដេអូត្រូវបានផ្សព្វផ្សាយតាមប្រព័ន្ធអុីនធឺណិតក៏ដោយ ក៏លោក សុខ ប៊ុន បានត្រឡប់មកប្រឈមការផ្ដន្ទាទោសវិញតាមការជំរុញជាសាធារណៈរបស់លោកនាយករដ្ឋមន្ត្រី ហ៊ុន សែន។
អំឡុងពេលបើកសវនាការជំនុំជម្រះរឿងក្តីរបស់លោក សុខ ប៊ុន នៅសាលាដំបូង រាជធានីភ្នំពេញកាលពីខែមុន លោក សុខ ប៊ុន បានផ្ញើសារជាលាយលក្ខណ៍អក្សរប្រាប់ថា អង្គរក្សរូបនេះឈ្មោះ “វី” ។
លោក ពុធ ធាវី មេធាវីកញ្ញា សុជាតា មានប្រសាសន៍កាលពីម្សិលមិញថា តុលាការក៏បានចោទប្រកាន់អង្គរក្សរូបនេះពីបទប៉ុនប៉ងមនុស្សឃាតផងដែរ ហើយថា លោកមិនដឹងថា ហេតុអ្វីបានជាជនសង្ស័យរូបនេះមិនត្រូវបានបើកសវនាការជាមួយលោក សុខ ប៊ុន ទេ។
លោក ពុធ ធាវី ថ្លែងថា “អង្គរក្សរូបនេះក៏ត្រូវទទួលទោសទណ្ឌផងដែរ…ប៉ុន្តែចៅក្រមមិនបានផ្ដន្ទាទោសជននេះទេ ហើយយើងមិនដឹងថា ដោយមូលហេតុអ្វីឡើយ”។ លោកបានបន្ថែមថា លោកគ្មានគម្រោងចាត់វិធានការបន្ថែមទេ ពីព្រោះកូនក្ដីរបស់លោកចង់បំភ្លេចរឿងនេះ។
លោក សុខ ខេមរិន្ទ ប្រធាននាយកដ្ឋាននគរបាលព្រហ្មទណ្ឌក្រសួងមហាផ្ទៃដែលបានដឹកនាំការស្វែងរកចាប់ខ្លួនលោក សុខ ប៊ុន ដំបូងបានមានប្រសាសន៍កាលពីខែកក្កដាថា ក្រុមស៊ើបអង្កេតក៏កំពុងតាមស្វែងរកអង្គរក្សរូបនេះដែរ។
នៅពេលទាក់ទងកាលពីម្សិលមិញ ឧត្ដមសេនីយ៍ទោ សុខ ខេមរិន្ទ បានព្យាយាមឆ្លើយពង្វាង។ ដោយបដិសេធមិននិយាយលម្អិត លោកបានថ្លែងថា “ប្រសិនបើជននេះប្រព្រឹត្តបទល្មើសមែន នោះយើងនឹងស្វែងរកចាប់ខ្លួន ហើយនឹងមិនទុកឱកាសឲ្យជននេះរត់គេចខ្លួនបានឡើយ…។ ប៉ុន្តែករណីនេះមិនស្ថិតក្នុងដៃនគរបាលទេ”។
ចៅក្រមស៊ើបសួរ លាង សំណាត និងចៅក្រមប្រធានក្រុមប្រឹក្សាជំនុំជម្រះ សោ លីនណា ដែលឃ្លាំមើលរឿងក្ដីនេះ មិនអាចទាក់ទងបានទេ៕ សារុន