នគរបាលក្នុងខេត្តកំពង់ធំកំពុងស្វែងរកចាប់ខ្លួនបុរសបីនាក់ ដែលបានប្លន់ម្ចាស់ហាងវេរប្រាក់វីងជាច្រើននាក់នៅស្រុកស្វាយកំពង់កាលពីថ្ងៃយប់ច័ន្ទ ដែលជាហេតុការណ៍ចុងក្រោយក្នុងការប្លន់ជាច្រើនលើកស្រដៀងគ្នានេះ។
លោក ខាន់ ចាន់គ័រ អធិការនគរបាលស្រុក បាននិយាយកាលពីថ្ងៃអង្គារថា ពួកចោរបានចូលផ្ទះដែលបើកកន្លែងវេរប្រាក់នៅម៉ោងប្រហែល៨យប់ ប្រដាប់ដោយកាំភ្លើងអាកា៤៧ កាំភ្លើងខ្លី និងដែកគាស់ បន្ទាប់មកពួកវាបានគំរាមសម្លាប់ប្តីប្រពន្ធនិងកូនៗរបស់ពួកគាត់ ប្រសិនបើពួកគាត់មិនប្រគល់ប្រាក់ឲ្យពួកវាទេនោះ។
លោកអធិការបាននិយាយថា “ពួកចោរប្លន់មិនបានសម្លាប់ឬធ្វើឲ្យនរណាម្នាក់រងរបួសទេ ពីព្រោះជនរងគ្រោះបានយល់ព្រមប្រគល់ប្រាក់ឲ្យពួកគេ”។
លោក ចាន់គ័រ បាននិយាយថា ពួកចោរប្លន់យកបានប្រាក់ដុល្លារ ប្រាក់រៀល និងប្រាក់បាតថៃ ប្រហែល១៣.០០០ដុល្លារអាមេរិក ព្រមទាំងកងជើងប្លាទីន និងទូរស័ព្ទដៃមួយចំនួន។
លោក សិន លិង អធិការរងស្រុក បាននិយាយថា អាជ្ញាធរមូលដ្ឋានបានចាត់វិធានការជាច្រើនដើម្បីពង្រឹងសន្តិសុខក្នុងតំបន់ ក្នុងនោះមានទាំងការយាមល្បាតញឹកញាប់ថែមទៀតដោយមន្ត្រីនិងអ្នកស្ម័គ្រចិត្តឃុំ ហើយលោកបានចោទប្តីប្រពន្ធរងគ្រោះថាបានធ្វើឲ្យខកខានចាប់ខ្លួនពួកចោរប្លន់ ដោយយឺត១៥នាទី បន្ទាប់ពីពួកចោរប្លន់ចេញបាត់ ទើបហៅនគរបាល។
លោកបាននិយាយថា “ប្រសិនបើជនរងគ្រោះបានរាយការណ៍អំពីចោរប្លន់ភ្លាមក្រោយពីពួកវាចេញពីផ្ទះ យើងប្រហែលមកដល់ទាន់ពេលចាប់ខ្លួនពួកវាបាន”។ លោកបានបញ្ជាក់ថា ទីស្នាក់ការនគរបាលស្រុកស្ថិតនៅក្បែរនោះ។
លោក លិង បាននិយាយថា នគរបាលមានតម្រុយខ្លះអំពីភិនភាគរបស់ជនសង្ស័យ ដោយលោកលើកឡើងថា មានតែអ្នកកាន់កាំភ្លើងវែងទេពាក់ម៉ាស់មុខ។
ការប្លន់កាលពីថ្ងៃច័ន្ទជាការប្លន់ប្រដាប់អាវុធនៅកន្លែងវេរប្រាក់វីងយ៉ាងហោចណាស់បួនលើកបន្តបន្ទាប់ក្នុងពេលប៉ុន្មានខែថ្មីៗនេះ និងជាការប្លន់កើតឡើងដដែលៗនៅហាងនិងកន្លែងលក់គ្រឿងទេសតូចតាច។
កាលពីថ្ងៃសៅរ៍ អនុសេនីយ៍ទោកងកម្លាំងរាជអាវុធហត្ថម្នាក់ត្រូវបានចាប់ខ្លួនក្នុងខេត្តកំពង់ស្ពឺ ទាក់ទិនអំពើប្លន់មួយបែបនេះកាលពីថ្ងៃទី៣១ខែមករា។
ក្រុមហ៊ុនវីងបាននិយាយថា សាខារបស់ខ្លួនទទួលបានការបណ្តុះបណ្តាលសុវត្ថិភាព និងការណែនាំមិនឲ្យទុកប្រាក់ច្រើនទេ៕ និត