ចៅក្រមម្នាក់នៅសាលាដំបូងខេត្តសៀមរាបដែលបានអនុញ្ញាតឱ្យមេភូមិមកពីគណបក្សប្រជាជនកម្ពុជាម្នាក់ដើរហើរដោយសេរីបន្ទាប់ពីលោកត្រូវបានសាកសួរជុំវិញការចោទប្រកាន់ពីបទឆបោកកាលពីខែមុន បានមានប្រសាសន៍កាលពីម្សិលមិញថា ចាប់តាំងពីពេលនោះមក លោកបានចោទប្រកាន់ និងបានចេញដីកាចាប់ខ្លួនបុរសរូបនេះ ដែលឥឡូវនេះកំពុងរត់គេចខ្លួន។
កាលពីដើមខែមុន លោក ឈុន ចាន់សិលា ចៅក្រមស៊ើបសួរបានសាកសួរលោក ប៉ាត កឹក មេភូមិព្រៃគុយ និងជាសមាជិកគណបក្សប្រជាជនកម្ពុជាកាន់អំណាច និងលោក ហ៊ាង សារី ចៅសង្កាត់អម្ពិល និងជាសមាជិកគណបក្ស សម រង្ស៊ី ជុំវិញឯកសារដែលពួកគាត់ទាំងពីរនាក់បានចុះហត្ថលេខា អនុញ្ញាតឱ្យអ្នកភូមិបញ្ចាំ ដីដែលត្រូវបានអះអាងសិទ្ធិកាន់កាប់ដោយអាជ្ញាធរអប្សរាដែលគ្រប់គ្រងដោយរដ្ឋ។
ចៅក្រម ចាន់សិលា បានចោទប្រកាន់លោក ហ៊ាង សារី ពីបទឆបោក និងឃុបឃិតរំលោភយកដីរដ្ឋនៅថ្ងៃដដែល ហើយបានបញ្ជូនគាត់ទៅឃុំខ្លួននៅពន្ធនាគារដើម្បីរង់ចាំការជំនុំជម្រះ ប៉ុន្តែបានអនុញ្ញាតឱ្យលោក ប៉ាត កឹក រួចខ្លួនទៅវិញ។ នៅពេលនោះ ចៅក្រមរូបនេះបានបដិសេធមិនធ្វើអត្ថាធិប្បាយអំពីករណីនេះទេ។
កាលពីម្សិលមិញ លោកបានលើកឡើងថា លោកបានចោទប្រកាន់លោក ប៉ាត កឹក ពីបទឧក្រិដ្ឋដូចគ្នានេះកាលពីខែមុន ហើយបានចេញដីកាចាប់ខ្លួនបន្ទាប់ពីមេភូមិរូបនេះមិនបានបង្ហាញខ្លួននៅតុលាការ។
ចៅក្រម ចាន់សិលា បានមានប្រសាសន៍ថា “តុលាការបានចេញដីការបង្គាប់ឱ្យអាជ្ញាធរ នាំខ្លួនមេភូមិរូបនេះមកកាន់តុលាការ បន្ទាប់ពីគាត់មិនបានមកបង្ហាញខ្លួន”។
ប៉ុន្តែ លោកបានបដិសេធមិនពន្យល់ពីមូលហេតុដែលលោកបានចោទប្រកាន់ និងដាក់ពន្ធនាគារតែមន្ត្រីគណបក្សប្រឆាំង នៅពេលបុរសទាំងពីរមានវត្តមាននៅតុលាការ កាលពីខែមុន។
លោកបានថ្លែងថា “ខ្ញុំបានអនុវត្តតាមនីតិវិធីច្បាប់។ សរុបមក នេះគឺជាអ្វីដែលខ្ញុំអាចនិយាយ”។
នៅពេលសួរអំពីការចោទប្រកាន់របស់គណបក្សប្រឆាំងដែលថា លោកបានដោះលែងលោក ប៉ាត កឹក កាលពីខែមុនដោយហេតុផលនយោបាយនោះ លោកបានឆ្លើយតបថា “ខ្ញុំគ្មានអ្វីត្រូវនិយាយទេ ពួកគេគិតម៉េចគិតទៅ”។
លោក ទិត្យ ណារ៉ុង អធិការនគរបាលក្រុងសៀមរាប និងលោក នួនសាក់ ចំរើនរិទ្ធ អធិការរងបាននិយាយថា ពួកគាត់មិនបានឃើញដីកាចាប់ខ្លួនលោក ប៉ាត កឹក ទេ។
ទោះយ៉ាងណា លោក ឆេង សី សមាជិកក្រុមប្រឹក្សាសង្កាត់ បានមានប្រសាសន៍ថា លោកបានឃើញដីកាចាប់ខ្លួនលោក ប៉ាត កឹក ហើយបានឃើញនគរបាលស្វែងរកគាត់នៅក្នុងតំបន់នេះ”។លោកបានថ្លែងថា “ខ្ញុំតែងតែឃើញនគរបាលមកទីនេះស្វែងរកគាត់”។
លោក កឹក ម៉ៅ កូនប្រុសរបស់មេភូមិរូបនេះបាននិយាយថា គាត់បានឃើញឪពុកគាត់ចុងក្រោយពីរបីថ្ងៃមុនពេលមានការចេញដីកាចាប់ខ្លួន។ គាត់បាននិយាយថា ឪពុករបស់គាត់បានទៅខេត្តសុរិន្ទ ប្រទេសថៃ គ្រាន់តែឆ្លងព្រំដែនខេត្តឧត្តរមានជ័យតែប៉ុណ្ណោះ។
កូនប្រុសរូបនេះបាននិយាយថា “គាត់បានគេចខ្លួន ហើយកំពុងលាក់ខ្លួនចាប់តាំងពីមានការចេញដីកាចាប់ខ្លួនគាត់។ លើកចុងក្រោយដែលខ្ញុំបានជួបគាត់ គាត់បានប្រាប់ខ្ញុំថា គាត់ទៅសួរសុខទុក្ខសាច់ថ្លៃមានជំងឺនៅខេត្តសុរិន្ទ។ គាត់មិនបានត្រឡប់មកវិញទេតាំងពីពេលនោះមក”។
លោក សុខ គឹមសេង អនុប្រធានប្រចាំខេត្តនេះរបស់គណបក្សសង្គ្រោះជាតិដែលបានបង្កើតឡើងក្នុងឆ្នាំ២០១២ ដោយមានការច្របាច់បញ្ចូលគ្នារវាងគណបក្ស សម រង្ស៊ី និងគណបក្សសិទ្ធិមនុស្សបានអះអាងថា ចៅក្រម ចាន់សិលា បានសម្រេចលម្អៀងពាក់ព័ន្ធនយោបាយនៅពេលលោកបានអនុញ្ញាតឱ្យលោក ប៉ាត កឹក រួចខ្លួនកាលពីខែមុន។
លោកថ្លែងថា “ខ្ញុំនិយាយថា វាជាសេចក្តី សម្រេចដោយហេតុផលនយោបាយក្នុងការចាប់ចៅសង្កាត់រូបនេះដាក់ពន្ធនាគារ។ មេភូមិគណបក្សប្រជាជនកម្ពុជាដែលបានចុះហត្ថលេខា និងបោះត្រាលើឯកសារទាំងនោះដំបូង មិនដែលត្រូវបានចាប់ខ្លួនទេ”៕សារុន