យោងតាមស្ថានទូតឥណ្ឌូណេស៊ី និងរបាយការណ៍សារព័ត៌មានឲ្យដឹងថា ក្រុមហ៊ុនឥណ្ឌូណេស៊ីឈ្មោះ ស្រ៊ី រីចេគី បានចុះហត្ថលេខាក្នុងទឹកប្រាក់៥០លានដុល្លារជាមួយក្រសួងមហាផ្ទៃកាលពីសប្តាហ៍មុន ដើម្បីផ្គត់ផ្គង់ឯកសណ្ឋានថ្មីដល់នគរបាល និងកងប្រដាប់អាវុធកម្ពុជា។
យោងតាមអ្នកស្រី មឺរ៉ាទី អ៊ីរ៉ាវ៉ាទី ប្រធានកិច្ចការសេដ្ឋកិច្ចស្ថានទូតឥណ្ឌូណេស៊ីឲ្យដឹងថា តំណាងម្នាក់របស់ក្រុមហ៊ុនស្រ៊ី រីចេគី ដែលគេហៅឈ្មោះថា ស្រ៊ីតិច បានចុះហត្ថលេខាលើកិច្ចព្រមព្រៀងនៅក្រុងភ្នំពេញកាលពីថ្ងៃពុធជាមួយឧត្តមសេនីយ៍ ម៉ៅ ប៊ុណ្ណារិទ្ធ អគ្គនាយកភ័ស្តុភារ និងហិរញ្ញវត្ថុនៃក្រសួងមហាផ្ទៃ។
អ្នកស្រីបាននិយាយកាលពីថ្ងៃអាទិត្យថា “គេមានកិច្ចព្រមព្រៀង។ ក្រុមហ៊ុនស្រ៊ីតិច គេនឹងចាប់ផ្តើមមានក្រុមហ៊ុនថ្មីមួួយនៅទីនេះដែលមានឈ្មោះស្រ៊ីតិច កម្ពុជា ហើយក្រុមហ៊ុននេះនឹងទិញឯកសណ្ឋានពីស្រ៊ីតិច ឥណ្ឌូណេស៊ី។ ទន្ទឹមនឹងនេះគេនឹងសង់រោងចក្រមួយនៅទីនេះ”។
អ្នកស្រី អ៊ីរ៉ាវ៉ាទី បានមានប្រសាសន៍ថា ក្រុមហ៊ុនមានគម្រោងសាងសង់រោងចក្រមួយនៅក្នុងខេត្តកណ្តាល ហើយរោងចក្រនេះនឹងផ្តល់ការងារដល់មនុស្ស៤០០នាក់ និងផ្គត់ផ្គង់ឯកសណ្ឋានដល់នគរបាល និងកងកម្លាំងប្រដាប់អាវុធនៅពេលដែលរោងចក្រមានដំណើរការ។
កាលពីថ្ងៃសៅរ៍ កាសែត ហ្សាការតា គ្លូប បានរាយការណ៍ថា កិច្ចព្រមព្រៀងនោះមានតម្លៃជាទឹកប្រាក់៥០លានដុល្លារ។
ក្រុមហ៊ុនស្រ៊ីតិចមិនអាចទាក់ទងបានទេ ប៉ុន្តែមានសេចក្តីថ្លែងការណ៍មួយដែលបង្ហោះតាមវិបសាយរបស់ខ្លួនកាលពីខែកញ្ញាបាននិយាយថា ក្រុមហ៊ុនរំពឹងថា ប្រទេសកម្ពុជានឹងទិញឯកសណ្ឋានប្រហែល១០០.០០០កំផ្លេសម្រាប់យោធា។ ក្រុមហ៊ុនអះអាងថាផលិតឯកសណ្ឋានយោធាឲ្យប្រទេសជាង៣០។
នាពេលថ្មីៗនេះ ឯកសណ្ឋានដែលប្រើដោយកងយោធពលខេមរភូមិន្ទ ក៏ដូចជាសម្ភារផ្សេងទៀតគឺធ្វើអំណោយដោយប្រទេសចិន។ ក្រុងប៉េកាំងបានធ្វើអំណោយជាឯកសណ្ឋានប្រហែល៥០.០០០កំផ្លេក្នុងឆ្នាំ២០១១ និងឯកសណ្ឋាន៣០.០០០កំផ្លេក្នុងឆ្នាំ២០១៤។
លោក ខៀវ សុភ័គ អ្នកនាំពាក្យក្រសួងមហាផ្ទៃបានមានប្រសាសន៍ថា លោកមិនបានដឹងអំពីកិច្ចព្រមព្រៀងជាមួយក្រុមហ៊ុន ស្រ៊ីតិចទេ។អ្នកនាំពាក្យក្រសួងមហាផ្ទៃបានមានប្រសាសន៍ថានាពេលបច្ចុប្បន្ននេះ នគរបាលបានទទួលឯកសណ្ឋានពីក្រុមហ៊ុនក្នុងស្រុកមួយ ប៉ុន្តែលោកមិនដឹងឈ្មោះក្រុមហ៊ុនទេ ហើយក៏បានបង្វែរសំណួរទៅឧត្តមសេនីយ៍ ប៊ុណ្ណារិទ្ធ ដែលមិនអាចទាក់ទងបានទេ។
សមាគមរោងចក្រកាត់ដេរនៅកម្ពុជាដែលតំណាងរោងចក្រកាត់ដេរភាគច្រើនបាននិយាយថា ខ្លួនក៏មិនបានដឹងអំពីកិច្ចព្រមព្រៀងនោះដែរ។ អ្នកនាំពាក្យនគរបាលជាតិ និងយោធាមិនអាចទាក់ទងបានទេ៕រើន