កាលពីម្សិលមិញលោកនាយករដ្ឋមន្ត្រី ហ៊ុន សែន បានរិះគន់ខ្លាំងៗលើអ្នកដែលរិះគន់វិស័យសុខាភិបាល ដោយនិយាយថា ពួកគេ “កំពុងមើលស្រាលគ្រូពេទ្យ” នៅក្នុងប្រទេសកម្ពុជា និងបានលើកឡើងថា អ្នកដែលអំពាវនាវឲ្យធ្វើបដិវត្តប្រព័ន្ធសុខាភិបាល គឺចង់សម្លាប់គ្រូពេទ្យប្រមាណ២០.០០០ នាក់នៅក្នុងប្រទេសនេះ។
ពេលថ្លែងអំឡុងពិធីសម្ពោធដាក់ឲ្យប្រើប្រាស់អគារចំនួនប្រាំ ដែលសាងសង់ដោយរដ្ឋាភិបាលជប៉ុនសម្រាប់មន្ទីរពេទ្យបង្អែកខេត្តព្រះសីហនុ លោក ហ៊ុន សែន បានលើកឡើងថា លោកបានឮប្រជាពលរដ្ឋត្អូញត្អែរអំពីគុណភាពរបស់គ្រូពេទ្យនៅកម្ពុជា ក្នុងនោះរួមមានទាំងអ្នករិះគន់មិនបញ្ចេញឈ្មោះម្នាក់ដែលលោកលើកឡើងថា បានអំពាវនាវឲ្យមានការ “ធ្វើបដិវត្តនៅក្នុងគ្រូពេទ្យ” និងអ្នករិះគន់ម្នាក់ទៀតដែលនិយាយថា ៩៩ភាគរយនៃគ្រូពេទ្យនៅប្រទេសកម្ពុជាអសមត្ថភាព។
លោកបានមានប្រសាសន៍ថា “ពួកគេបានមើលស្រាលចំពោះគ្រូពេទ្យ និងមន្ត្រីសុខាភិបាលរបស់យើងប្រមាណ២០.០០០នាក់ រហូតមានអ្នកខ្លះអំពាវនាវឲ្យធ្វើបដិវត្តន៍ នៅក្នុងគ្រូពេទ្យ បើអីចឹងធ្វើបដិវត្តន៍មានយកគ្រូពេទ្យទៅវាយចោល”។
លោក ហ៊ុន សែន បានមានប្រសាសន៍ទៀតថា “យើងស្តាប់ឮ ឃើញមានសំឡេងត្អូញត្អែរ ពីសំណាក់ពលរដ្ឋរបស់យើងមួយចំនួន រហូតមានអ្នកធ្វើអត្ថាធិប្បាយ រហូតទៅដល់ប្រមាថម៉ាក់ងាយចំពោះគ្រូពេទ្យរបស់យើង”។
លោកបានបន្ថែមថា “ចំណុចនេះយើងត្រូវទទួលស្គាល់ថា នៅមានចំណុចខ្វះខាត ប៉ុន្តែមិនដល់ថ្នាក់១០០ខូចអស់៩៩នៅសល់តែមួយនោះទេ។ ភាគច្រើននៃគ្រូពេទ្យរបស់យើងមានក្រមសីលធម៌ មានវិជ្ជាជីវៈប្រកបដោយការទទួលខុសត្រូវ និងមានការលះបង់ដើម្បីជួយអ្នកជំងឺ។ ហើយពួកគេខិតខំធ្វើការដូចនគរបាល និងកងរាជអាវុធហត្ថអ៊ីចឹង សូម្បីតែនៅថ្ងៃបុណ្យជាតិក៏ដោយ”។
លោក កែម ឡី អ្នកវិភាគនយោបាយដែលជាស្ថាបនិកក្រុមតស៊ូមតិនយោបាយ “ខ្មែរដើម្បីខ្មែរ” ត្រូវបានដកស្រង់សម្តីចេញពីប្រព័ន្ធផ្សព្វផ្សាយក្នុងស្រុកក្នុងពេលថ្មីៗ ដោយប្រើពាក្យថា “បដិវត្ត” ដើម្បីអំពាវនាវឲ្យ មានការរុះរើទំាំងស្រុងនៃប្រព័ន្ធសុខាភិបាល នៅកម្ពុជា។ លោកបានលើកឡើងកាលពីម្សិលមិញថា លោកនាយករដ្ឋមន្ត្រីមានការយល់ច្រឡំចំពោះសម្ដីរបស់លោក។
លោកបានមានប្រសាសន៍ថា “ខ្ញុំនិយាយអំពីបដិវត្តនៅក្នុងវិស័យសុខាភិបាល មិនមែនបដិវត្តនៅក្នុងគ្រូពេទ្យទេ។ នេះមានន័យថា យើងចាំបាច់ត្រូវតែមានការធ្វើកំណែទម្រង់ទ្រង់ទ្រាយធំ មិនមែនទ្រង់ទ្រាយតូចទេ គឺមានន័យថា រចនាសម្ព័ន្ធនៃភាពជាអ្នកដឹកនាំគួរតែធ្វើកំណែទម្រង់ស៊ីជម្រៅដើម្បីដាក់មនុស្សឲ្យត្រូវចំកន្លែងដោយមានប្រាក់ខែសមរម្យ”។
លោក កែម ឡី បានលើកឡើងចំៗចំពោះ ការដែលថា គ្រូពេទ្យភាគច្រើនដែលត្រូវធ្វើការងារពេញម៉ោងនៅមន្ទីរពេទ្យរដ្ឋក៏ធ្វើការនៅគ្លីនិកឯកជនដែរ ដោយនិយាយថា តួលេខនេះអាចមានរហូតដល់ទៅ៨៥ភាគរយ។
លោកបានមានប្រសាសន៍ថា “គ្មានវិជ្ជាជីវៈទេ ហើយក៏គ្មានក្រមសីលធម៌ដែរ”។
លោក គួច ម៉េងលី អ្នករិះគន់វិស័យសុខាភិបាលឥតសំចៃមាត់ម្នាក់ទៀត ដែលជាវិជ្ជបណ្ឌិត និងពាណិជ្ជករទទួលបានការអប់រំនៅសហរដ្ឋអាមេរិកបានលើកឡើងជាសាធារណៈ កាលពីខែមករាថា ក្នុងចំណោមគ្រូពេទ្យ១០នាក់នៅកម្ពុជាមាន៩នាក់ទៅហើយដែលគ្មានក្រមសិលធម៌ ហើយព្យាបាលអ្នកជំងឺមិនត្រឹមត្រូវ។ ការលើកឡើងរបស់លោកបានធ្វើឲ្យគណៈវិជ្ជាជីវៈសុខាភិបាលកម្ពុជាដែលមានទំនាក់ទំនងជាមួយរដ្ឋាភិបាលទាមទារឲ្យមានការសូម អភ័យទោសភ្លាមៗ។
លោក គួច ម៉េងលី បានលើកឡើងកាលពីម្សិលមិញថា ទោះបីជាលោកនាយករដ្ឋមន្ត្រីព្យាយាមធ្វើឲ្យការរិះគន់សាបរលាបទៅវិញក៏ដោយ តែមិនប្រាកដថាជោគជ័យទេ។
លោកវេជ្ជបណ្ឌិត គួច ម៉េងលី បានមានប្រសាសន៍ថា “ខណៈលោកលើកឡើងថា មានគ្រូពេទ្យតែមួយចំនួនតូចដែលខូចនោះ ពលរដ្ឋដែលធ្លាប់ជួបបញ្ហានេះលើកឡើងថា មានមួយចំនួនធំ”។
លោកបានមានប្រសាសន៍បន្ថែមថា “ប៉ុន្តែ យើងត្រូវតែទទួលស្គាល់ថា បញ្ហាមិននៅត្រង់ថា ចំនួនតិច ឬច្រើនទេ ប៉ុន្តែជាក់ស្តែងគ្រូពេទ្យនៅកម្ពុជាគ្មានក្រមសីលធម៌ និងវិជ្ជាជីវៈទេ បើផ្អែកលើការវិនិច្ឆ័យផ្ទាល់ខ្លួន។ សម្រាប់ខ្ញុំ ខ្ញុំសូម និយាយថា មានច្រើន”៕ ស៊ុយឈាង