បន្ទាប់ពីប្រជាពលរដ្ឋ៧៣គ្រួសារផ្សេងទៀតក្នុងខេត្តស្ទឹងត្រែងបានទទួលយកការផ្តល់ឲ្យដីថ្មី ជាថ្នូរនឹងដីស្រែចម្ការដែលពួកគាត់នឹងបាត់បង់ទៅលើទំនប់វារីអគ្គិសនីសេសានក្រោម២ដែលកំពុងសាងសង់សព្វថ្ងៃ ក្រុមទី២នឹងទទួលយកការព្រមព្រៀងនេះ។
ប្រជាពលរដ្ឋ៧០គ្រួសារបានទទួលយកការដោះដូរដីកាលពីខែឧសភា ដើម្បីបើកផ្លូវធ្វើទំនប់មានថាមពល៤០០មេហ្គាវ៉ាត់ដែលកំពុងសាងសង់ក្នុងការបណ្តាក់ទុនរួមរវាងក្រុមហ៊ុនរ៉ូយ៉ាល់គ្រុប និងក្រុមហ៊ុនហាយដ្រូឡានកាង អិុនធឺណាស្យូណាល់ អិណឺជី របស់ប្រទេសចិន កាត់ទន្លេសេសាននិងទន្លេស្រែពក ជាដៃទន្លេមេគង្គ។
លោក វឿន សម្បត្តិ មេឃុំក្បាលរមាស ស្រុកសេសាន បានមានប្រសាសន៍ថា ប្រជាពលរដ្ឋ៧៣គ្រួសារថ្មីបានទទួលយកក្បាលដីនៅកន្លែងតាំងលំនៅថ្មី ចម្ងាយប្រហែល៥០គីឡូម៉ែត្រពីកន្លែងដែលពួកគាត់រស់នៅបច្ចុប្បន្ន ប៉ុន្តែនៅក្នុងឃុំតែមួយ ដោយចាប់ឆ្នោតកាលពីថ្ងៃសុក្រ។ លោកបាននិយាយថា ៤៦គ្រួសារក្នុងចំណោមនោះក៏បានជ្រើសរើសយកផ្ទះថ្ម ឬផ្ទះឈើ ដែលត្រូវសង់នៅកន្លែងថ្មីសម្រាប់ពួកគាត់ ឬក៏ទទួលយកប្រាក់ដើម្បីសង់ផ្ទះដោយខ្លួនឯង ក៏ប៉ុន្តែ លោកមិនអាចចាំបាននូវចំនួនប្រាក់ផ្តល់ឲ្យទេ។
លោកបាននិយាយថា “ស្ថានភាពនៅទីតាំងថ្មីនោះគឺល្អ ជាពិសេសដោយសារការផ្គត់ផ្គង់ទឹកកំពុងត្រូវរៀបចំ ដូច្នេះប្រជាពលរដ្ឋអាចប្រើប្រាស់ទឹកក្នុងការរស់នៅនិងស្រោចស្រពស្រែចម្ការបាន”។
លោក សម្បត្តិ បាននិយាយថា គ្រួសារទាំងនោះនឹងត្រូវរើចេញនៅខែមេសា ហើយ៣៣គ្រួសារផ្សេងទៀតក្នុងឃុំនោះមិនទាន់ទទួលយកសំណងផ្តល់ឲ្យនេះនៅឡើយ ដោយបន្ទោសឥទ្ធិពលរបស់អង្គការក្រៅរដ្ឋាភិបាលមិនបញ្ចេញឈ្មោះមួយចំនួន ដែលធ្វើឲ្យអ្នកភូមិស្ទាក់ស្ទើរក្នុងចិត្ត។
លោកបាននិយាយថា “ប្រជាពលរដ្ឋនៅសេសសល់មិនព្រមផ្លាស់ទៅទីតាំងថ្មីទេ ពីព្រោះអង្គការក្រៅរដ្ឋាភិបាលបានបញ្ចុះបញ្ចូលពួកគាត់កុំឲ្យគាំទ្រគម្រោងនេះ និងឲ្យធ្វើការតវ៉ា ទាមទារនិងជំរុញឲ្យលុបចោលគម្រោងនេះ”។
មេឃុំរូបនេះបាននិយាយថា រដ្ឋាភិបាលនិងក្រុមហ៊ុនដែលសង់ទំនប់នេះនឹងបន្តព្យាយាមបញ្ចុះបញ្ចូលគ្រួសារនៅសេសសល់ឲ្យទទួលយកសំណងនេះ។
លោក មៀច មាន ទីប្រឹក្សាបណ្តាញការពារទន្លេ៣ ជាអង្គការក្រៅរដ្ឋាភិបាលក្នុងស្រុក បានមានប្រសាសន៍ថា រដ្ឋាភិបាលអាចដាក់សម្ពាធលើគ្រួសារទាំងនោះឲ្យទទួលយកសំណងតិចជាងអ្វីដែលពួកគាត់សមនឹងទទួលបាន។
លោកបានមានប្រសាសន៍ថា “យើងមិនទទួលយកទាំងស្រុង ពីព្រោះតម្លៃសំណងមិនធៀបទៅនឹង[តម្លៃដី]ទីផ្សារ ចំណែកឯក្រុមហ៊ុនធ្វើការជាមួយតែរដ្ឋាភិបាលដើម្បីបង្កើតគោលនយោបាយដោយគ្មានការពិគ្រោះយោបល់ ឬការចរចាជាមួយសហគមន៍ទេ”៕ និត