គិតត្រឹមថ្ងៃសុក្រ វានឹងមានរយៈពេលមួយខែហើយចាប់តាំងពីលោកនាយករដ្ឋមន្ត្រី ហ៊ុន សែន បានឡើងថ្លែងសុន្ទរកថា អំឡុងពិធីសម្ពោធទីស្នាក់ការថ្មីរបស់ក្រសួងបរិស្ថាននៅក្នុងរាជធានីភ្នំពេញ ដើម្បីប្រកាសថា ដីទំហំ១លានហិកតាត្រូវបានដកហូតពីម្ចាស់ដីសម្បទានសេដ្ឋកិច្ច ហើយនឹងត្រូវយកទៅចែកជូនគ្រួសារក្រីក្ររួចមកនោះ។
ការពិនិត្យឡើងវិញរយៈពេលមួយឆ្នាំរបស់គណៈកម្មាធិការចំពោះកិច្ចដែលបង្កើតឡើងដោយលោកនាយករដ្ឋមន្ត្រីលើដីសម្បទានសេដ្ឋកិច្ចនៅទូទាំងប្រទេសដែលរងការរិះគន់ខ្លាំងដោយសារវាធ្វើឲ្យបាត់បង់ព្រៃឈើនិងមានការបណ្តេញចេញដោយបង្ខំនៅទូទាំងប្រទេសនោះ បានឈានដល់ទីបញ្ចាប់ហើយ។
ប៉ុន្តែរដ្ឋាភិបាលនៅមិនទាន់ពន្យល់ថា តើលោក ហ៊ុន សែន បានរកឃើញតួលេខសរុបមួយលានហិកតានេះតាមរបៀបណានៅឡើយទេ ព្រោះតួលេខនៃដីសម្បទានដែលត្រូវបានដកហូតមកទល់នឹងពេលនេះ មិនទាន់កៀកទៅនឹងតួលេខនេះឡើយ ហើយអង្គការសិទ្ធិដីធ្លីនៅតែមានមន្ទិលថា តើដីទាំងនេះបានមកពីណា។
លោកឧបនាយករដ្ឋមន្ត្រី ប៊ិន ឈិន ដែលដឹកនាំគណៈកម្មាធិការពិសេសនេះបានលើកឡើងថា លោកមិនដឹងឡើយ។
លោកបានមានប្រសាសន៍កាលពីម្សិលមិញមុនពេលដាក់ទូរស័ព្ទរបស់អ្នកយកព័ត៌មានម្នាក់ចុះថា “ហេតុអ្វីបានជាលោកឯងសួរខ្ញុំ? កុំសួរខ្ញុំ ខ្ញុំអត់ដឹងទេ”។
លោក វ៉ាន់ សំអឿន អនុប្រធានអាជ្ញាធរជាតិដោះស្រាយវិវាទដីធ្លីបានលើកឡើងថា លោកក៏មិនដឹងដែរ ហើយមិនទាន់ឃើញឯកសារពេញលេញនៃដីទំហំ១លានហិកតានេះនៅឡើយទេ។ ”ខ្ញុំគិតថា ឯកឧត្តមឧបនាយករដ្ឋមន្ត្រី ប៊ិន ឈិន ប្រហែលជាមានឯកសារនេះ ប៉ុន្តែខ្ញុំមិនដែលបានឃើញឯកសារនេះទេ។ អ្វីដែលខ្ញុំបានដឹង គឺត្រឹមតែថា ដីសម្បទានសេដ្ឋកិច្ចភាគច្រើនត្រូវបានក្រសួងបរិស្ថានលុបចោល”។
ក្រសួងបរិស្ថាននិងក្រសួងកសិកម្មជាអ្នកគ្រប់គ្រងដីសម្បទានសេដ្ឋកិច្ចទាំងអស់ដែលគ្របដណ្តប់លើផ្ទៃដីជាង២លានហិកតានៅទូទាំងប្រទេស រហូតដល់មានការពិនិត្យឡើងវិញដោយគណៈកម្មាធិការពិសេស។
កាលពីខែមករា ឆ្នាំ២០១៥ ក្រសួងបរិស្ថានបានប្រកាសថា ខ្លួនបានដកហូតមកវិញនូវដីសរុបទំហំ១២៧.០០០ហិកតាពីដីសម្បទានសេដ្ឋកិច្ចចំនួន២៨កន្លែង ដែលត្រូវបានលុបចោល ឬនៅក្នុងករណីខ្លះកាត់បន្ថយទំហំ។ កាលពីម្សិលមិញ លោក ស៊្រុន ដារិទ្ធ ទីប្រឹក្សាក្រសួង និងជានាយរងខុទ្ទកាល័យបានលើកឡើងថា តួលេខនេះនៅតែដដែល។
នៅឯក្រសួងកសិកម្មឯណោះវិញ លោក អៀង សុផាល្លែត អ្នកនាំពាក្យក្រសួងនេះ និងជាជំនួយការផ្ទាល់របស់លោក ហ៊ុន សែន ក៏បានលើកឡើងផងដែរថា លោកក៏មិនបានឃើញឯកសារនៃដីទំហំ១លានហិកតានេះដែរ ហើយបានចាត់ទុកតួលេខនេះថា ជា”តួលេខប្រហែលប្រហែល”។
លោក អៀង សុផាល្លែត បានសន្យាជាច្រើនសប្តាហ៍មកហើយថា នឹងរៀបចំសន្និសីទកាសែតមួយដែលលោក អ៊ុក រ៉ាប៊ុន រដ្ឋមន្ត្រីក្រសួងកសិកម្មនឹងពន្យល់អំពីចម្ងល់នៅពីក្រោយដីទំហំ១លានហិកតានេះ ប៉ុន្តែកាលពីម្សិលមិញ លោកបានលើកឡើងថា ក្រសួងរបស់លោកជាប់រវល់ខ្លាំងនឹងរឿងផ្សេងជាច្រើនដែលត្រូវដោះស្រាយបន្ទាន់។
លោកមានប្រសាសន៍ថា “ខ្ញុំគ្មានទិន្នន័យគ្រប់គ្រាន់ទេ ដោយសារតែជាប់រវល់ខ្លាំងនឹងគ្រោះរាំងស្ងួត និងបញ្ហាផ្សេងៗទៀត ព្រោះវាសំខាន់ជាង”។
កាលពីខែមករា ឆ្នាំ២០១៥ ក្រសួងកសិកម្មបានលើកឡើងថា ខ្លួនដកហូតបានត្រឹមតែប្រហែល៥០.០០០ហិកតាប៉ុណ្ណោះពីដីសម្បទានសេដ្ឋកិច្ចចំនួន៨កន្លែង។ ប្រសិនបើក្រសួងបរិស្ថានមិនបានដកហូតយកដីបន្ថែមណាមួយដូចលោក ស្រ៊ុន ដារិទ្ធ បានលើកឡើងនោះ អុីចឹងក្រសួងកសិកម្មដាច់ខាតត្រូវដកហូតដីទំហំ៨២៣.០០០ហិកតាបន្ថែមនាឆ្នាំកន្លងមក ទើបតួលេខសរុបរបស់លោក ហ៊ុន សែន ត្រឹមត្រូវ។
អង្គការសិទ្ធិមនុស្សនៅតែមានមន្ទិល។លោក ឡាត់ គី ដែលជាអ្នកឃ្លាំមើលដីសម្បទានប្រចាំអង្គការអាដហុកបានលើកឡើងថា “ខ្ញុំមិនបានឃើញទិន្នន័យ[ដែល] បង្ហាញថា តើខេត្តណាខ្លះ និងថាតើដីសម្បទានសេដ្ឋកិច្ចណាខ្លះនោះឡើយ។វាមិនច្បាស់លាស់សោះ ហេតុដូច្នេះ វាមានការលំបាកណាស់សម្រាប់អង្គការក្នុងការវាយតម្លៃ”។
ចំណែកឯ អង្គការសិទ្ធិមនុស្សលីកាដូបានលើកឡើងថា រដ្ឋាភិបាលអាចរកឃើញតួលេខ១លានហិកតា ប្រសិនបើរាប់បញ្ចូលដីសម្បទានកាប់ឈើចាស់។ ប៉ុន្តែដីសម្បទានទាំងនោះ ត្រូវបានផ្អាកជាងមួយទសវត្សរ៍កន្លងមកហើយ ហើយនៅក្នុងសុន្ទរកថារបស់ខ្លួនកាលពីខែមុន លោក ហ៊ុន សែន បានសំដៅដល់ដីសម្បទានសេដ្ឋកិច្ចដែលត្រូវបានលុបចោល។
ទោះយ៉ាងណា លោក សៅ សុភាព នាយខុទ្ទកាល័យក្រសួងបរិស្ថានបានលើកឡើងថា គ្មានហេតុផលអ្វីត្រូវមានមន្ទិលចំពោះការអះអាងរបស់លោកនាយករដ្ឋមន្ត្រីឡើយ។
លោកបានលើកឡើងថា “ខ្ញុំគិតថា មិនគួរមានការសង្ស័យណាមួយនោះទេ ព្រោះយើងមានឯកសារទាំងអស់”។ លោកបានបន្ថែមថា លោកក៏មិនដឹងថា តើដីទំហំ១លានហិកតានោះបានមកពីទីណានោះដែរ៕ស៊ុយឈាង