ប្រធានមន្ទីរកសិកម្មខេត្តរតនគិរីបានបញ្ជាក់កាលពីម្សិលមិញថា ចម្ការមួយក្នុងចំណោមចម្ការកៅស៊ូចំនួនបួនដែលប្រតិបត្តិការដោយកងទ័ពវៀតណាម នៅខេត្តរតនគិរី ត្រូវបានលុបចោលកិច្ចសន្យារបស់ខ្លួនជាមួយរដ្ឋាភិបាលកាលពីខែមុន ស្របពេលមានការចោទប្រកាន់អំពីការកាប់ឈើខុសច្បាប់ និងការអនុញ្ញាតឲ្យកសិករវៀតណាម ទន្ទ្រានចូលដីរបស់កម្ពុជា។
យោងតាមកំណត់ត្រារបស់ក្រសួងពាណិជ្ជកម្ម និងប្រព័ន្ធផ្សព្វផ្សាយរដ្ឋរបស់វៀតណាម បង្ហាញថា សម្បទានដីសេដ្ឋកិច្ចរបស់ក្រុមហ៊ុន ដាយ ដុង យឿង (Dai Dong Duong) គឺជាចម្ការមួយក្នុងចំណោមចម្ការចំនួនបួននៅខេត្តភាគឦសាននេះ ដែលចំណែករបស់វាត្រូវបានអង្គភាពផ្សេងៗនៃកងទ័ពវៀតណាម ទិញយកដោយស្ងាត់ៗក្នុងរយៈពេលពីរបីឆ្នាំមកនេះ។
ក្រុមអ្នកភូមិជនជាតិដើមភាគតិចចារ៉ាយ បានចោទប្រកាន់ចម្ការទាំងេនះម្ដងហើយម្ដងទៀតថាបានទន្ទ្រានចូលព្រៃដូនតារបស់ពួកគាត់។ កាលពីខែមិថុនាឆ្នាំមុន ក្រសួងការបរទេសបានធ្វើការតវ៉ាទៅរដ្ឋាភិបាលក្រុងហាណូយ ចំពោះស្រះទឹកមួយចំនួននៅលើដីចម្ការរបស់ក្រុមហ៊ុន ដៃ ដុង ដួង ជីកដោយកសិករវៀតណាម ដែលបានឆ្លងព្រំដែនក្បែរនោះដែលមិនទាន់បានកំណត់ពេញលេញនៅឡើយ។ ក្រសួងកសិកម្មបានលើកឡើងកាលពីខែវិច្ឆិកាថា នឹងពិនិត្យសើរើក្រុមហ៊ុននេះ។
កាលពីម្សិលមិញ លោក សូយ សូណា ប្រធានមន្ទីរកសិកម្មខេត្តរតនគិរី បានមានប្រសាសន៍ថា រដ្ឋាភិបាលបានលុបចោលសម្បទានរបស់ក្រុមហ៊ុន ដាយ ដុង យឿង កាលពីខែកុម្ភៈ ចំពោះការមិនអភិវឌ្ឍលើដីនោះ។
លោកមានប្រសាសន៍ទៀតថា “រដ្ឋាភិបាលបានលុបចោលគម្រោងវិនិយោគសម្បទានដីសេដ្ឋកិច្ចរបស់ក្រុមហ៊ុន ដាយ ដុង យឿង ពីព្រោះចាប់តាំងពីទទួលបានដីនេះ ពួកគេមិនទាន់បានធ្វើអ្វីលើដីនោះតាមលក្ខខណ្ឌដែលពួកគេបានចុះកិច្ចសន្យាជាមួយរដ្ឋាភិបាលនៅឡើយទេ។ ក្រុមហ៊ុននេះមិនបានធ្វើអ្វីលើដីនោះទេ ពីព្រោះគ្មានលុយគ្រប់គ្រាន់ដើម្បីវិនិយោគ”។
លោកបានលើកឡើងបន្ថែមទៀតថា ដីទំហំ៩.០០០ហិកតាដែលផ្ដល់ឲ្យក្រុមហ៊ុន ដាយ ដុង យឿង ជាលើកដំបូង ត្រូវបានកាត់មកនៅប្រហែល៥.០០០ហិកតាវិញកាលពីឆ្នាំ២០១២ ជាពេលដែលអាជ្ញាធរចាប់ផ្ដើមប្រគល់ដីខ្លះឲ្យទៅសហគមន៍ជនជាតិដើមភាគតិចក្នុងតំបន់នោះ។
លោក ញ៉ែម សំអឿន អភិបាលរងខេត្តមានប្រសាសន៍ថា ក្រុមហ៊ុននេះបានដាំដើមកៅស៊ូលើដីនោះប្រហែល៨០០ហិកតា ហើយនឹងទទួលបានសំណងចំពោះការខូចខាតនេះ។ លោកបញ្ជាក់ថា សម្បទាននេះត្រូវបានលុបចោលរួចហើយ ប៉ុន្តែសេចក្ដីសម្រេចនេះធ្វើឡើងដើម្បីរារាំងក្រុមហ៊ុននេះកុំឲ្យអនុញ្ញាតកសិករវៀតណាម បន្ថែមទៀតឆ្លងព្រំដែនដ៏ចម្រូងសម្រាសដែលស្ថិតនៅក្បែរព្រំប្រទល់ភាគខាងកើតនៃសម្បទានដីសេដ្ឋកិច្ចនេះចូលមកទីតាំងនេះ។
លោកមានប្រសាសន៍ថា “យើងលុបចោលសម្បទានដីសេដ្ឋកិច្ចនេះដោយសារតែដីនេះនៅកៀកព្រំដែន ហើយរដ្ឋាភិបាលព្រួយបារម្ភខ្លាចបញ្ហាព្រំដែនកើតឡើងនៅថ្ងៃអនាគត”។
លោក សូយ សូណា បានថ្លែងថា ជម្លោះព្រំដែនគ្មានអ្វីពាក់ព័ន្ធសេចក្ដីសម្រេចនេះទេ។ ចំណែកឯចម្ការបីផ្សេងទៀតដែលគ្រប់គ្រងដោយយោធាវៀតណាម មិនទាន់មានការពិនិត្យសើរើទេ ហើយនៅបន្តដំណើរការធម្មតា។
លោក អៀង សុផាល្លែត អ្នកនាំពាក្យក្រសួងកសិកម្មដែលមានប្រសាសន៍កាលពីខែវិច្ឆិកាថា ក្រុមហ៊ុន ដាយ ដុង យឿង នឹងត្រូវពិនិត្យសើរើបានលើកឡើងកាលពីម្សិលមិញថា លោកមិនដឹងពីជោគវាសនារបស់ចម្ការនេះទេ ហើយក៏មិនដឹងពីជោគវាសនារបស់ចម្ការទាំងបីផ្សេងទៀតដែរ ដោយសារលោកកំពុងប្រមូលលទ្ធផលពិនិត្យសើរើសម្បទានដីសេដ្ឋកិច្ចដែលបានបញ្ចប់កាលពីពីរបីខែមុន។ លោកបានធ្វើការកត់សម្គាល់ថា “ខ្ញុំគ្មានយោបល់ទេ ពីព្រោះខ្ញុំមិនទាន់រៀបចំអ្វីៗរួចរាល់”។
លោក រម៉ាស់ ស្វាត ជាអ្នកភូមិជនជាតិដើមភាគតិចចារ៉ាយ ដែលរស់នៅជិតចម្ការរបស់ក្រុមហ៊ុន ដាយ ដុង យឿង និយាយថា គាត់មិនបានដឹងថាសម្បទាននេះត្រូវបានលុបចោលទេ ប៉ុន្តែគាត់សប្បាយចិត្តពេលឮបែបនេះ។
គាត់និយាយទៀតថា “អ្នកភូមិបានប្រឈមការលំបាកច្រើន ព្រោះពេលយើងព្យាយាមឈូសឆាយដីរបស់យើងដើម្បីធ្វើចម្ការប្តូរវេន ឬទៅបរបាញ់ក្នុងព្រៃ ក្រុមហ៊ុនបានឃាត់ពួកយើង ហើយប្រាប់យើងថា ព្រៃជាកម្មសិទ្ធិរបស់ពួកគេ ពីព្រោះពួកគេបានទិញពីរដ្ឋាភិបាល។ ខ្ញុំគិតថា ប្រជាជនក្នុងភូមិនឹងសប្បាយចិត្តខ្លាំងដែលសម្បទានដីសេដ្ឋកិច្ចត្រូវបានលុបចោល ពីព្រោះជីវភាពរបស់អ្នកភូមិពឹងផ្អែកលើអនុផលព្រៃឈើ”៕ សុខុម