សាលាដំបូងរាជធានីភ្នំពេញបានចោទប្រកាន់លោក សម រង្ស៊ី ប្រធានគណបក្សប្រឆាំងសាជាថ្មីីពីបទបរិហារកេរ្តិ៍ បន្ទាប់ពីប្រធានគណបក្សប្រឆាំងរូបនេះបានដាក់ពាក្យប្តឹងលោក ហេង សំរិន ប្រធានរដ្ឋសភា ដោយអះអាងថា រដ្ឋាភិបាលដែលលោកដឹកនាំនៅក្នុងទសវត្សរ៍ឆ្នាំ១៩៨០ បានផ្តន្ទាទោស ប្រហារជីវិតព្រះមហាក្សត្រ នរោត្តម សីហនុ។
លោក តាំង ស៊ុនឡាយ ប្រធានសាលាដំបូងរាជធានីបានមានប្រសាសន៍កាលពី ម្សិលមិញថា “តុលាការបានចោទប្រកាន់គាត់ [លោក សម រង្ស៊ី] ពីបទបរិហារកេរ្តិ៍។ សំណុំរឿងនេះត្រូវបានបញ្ជូូនរួចហើយដើម្បីទុកសម្រាប់បើកសវនាការ”។
ទោះជាយ៉ាងណា ចៅក្រម តាំង ស៊ុនឡាយ បានលើកឡើងថា លោកមិនចាំពេលដែលមានដាក់ការចោទប្រកាន់ឬកាលបរិច្ឆេទសម្រាប់ការបើកសវនាការឡើយ ហើយបានបង្វែរសំណួរបន្ថែមទៅចៅក្រមដែលត្រូវបានចាត់តាំងឲ្យទទួលបន្ទុុកសំណុំរឿងនេះ គឺលោក រស់ ពិសិដ្ឋ ដែលមិនអាចទាក់ទងបាន។
លោក គី តិច មេធាវី របស់លោក ហេង សំរិន បានលើកឡើងថា ការបើកសវនាការនឹងចាប់ផ្តើមក្នុងរយៈពេលបីខែទៀត។
លោកបានមានប្រសាសន៍ថា “តុលាការបានដាក់ការចោទប្រកាន់ប្រហែលពីរសប្តាហ៍ កន្លងមកហើយ ហើយសំណុំរឿងនេះគ្រោងនឹងបើកសវនាការនៅខែមិថុនា។ ខ្ញុំទទួលបានការជូនដំណឹងពីតុលាការហើយ ប៉ុន្តែខ្ញុំមិនអាចប្រាប់ព័ត៌មានលម្អិតបានទេ”។
លោក សម រង្ស៊ី ដែលនិរទេសខ្លួនឯងទៅរស់នៅក្រៅប្រទេសដើម្បីគេចពីការផ្តន្ទាទោសឲ្យជាប់ពន្ធនាគារពីបទបរិហារកេរ្តិ៍លោក ហោ ណាំហុង រដ្ឋមន្ត្រីក្រសួងការបរទេសនោះ មិនបានឆ្លើយតបនឹងសំណើសុំការធ្វើអត្ថាធិប្បាយឡើយ។
លោក យឹម សុវណ្ណ ជាអ្នកនាំពាក្យនិងជាតំណាងរាស្ត្រគណបក្សសង្គ្រោះជាតិ បានច្រានចោលការចោទប្រកាន់នេះ។
លោកបានថ្លែងថា “វាមានជាប់ពាក់ព័ន្ធនឹងរឿងនយោបាយ ខ្ញុំមិនភ្ញាក់ផ្អើលទេ។ តាមគំនិតរបស់ខ្ញុំ វាក្លាយជាកញ្ចាប់បញ្ហានយោបាយទៅហើយ”។
លោក សម រង្ស៊ី ប្រឈមនឹងការផ្តន្ទាទោសឲ្យជាប់ពន្ធនាគាររយៈពេលពីរឆ្នាំរួចទៅហើយកាលពីឆ្នាំ២០១១ពីបទបរិហារកេរ្តិ៍ លោក ហោ ណាំហុង និងការដែលអាចជាប់ពន្ធនាគាររយៈពេល១៧ឆ្នាំបន្ថែមទៀតទាក់ទិនវីដេអូមួយដែលត្រូវបានបង្ហោះលើទំព័រហ្វេសប៊ុករបស់លោក ដែលក្នុងនោះ សមាជិកព្រឹទ្ធសភាគណបក្សប្រឆាំងមួយរូបបានបង្ហាញសន្ធិសញ្ញាក្លែងក្លាយដោយអះអាងថា របបរបស់លោក ហេង សំរិន បានព្រមព្រៀងជាមួយប្រទេសវៀតណាមរម្លាយព្រំដែនភាគខាងកើតចោល។
លោក ហុង សុខហួរ ដែលជាសមាជិកព្រឹទ្ធសភាគណបក្សប្រឆាំង ត្រូវបានចាប់ខ្លួនកាលពីខែសីហា ក្រោមការចោទប្រកាន់ពីបទក្លែងឯកសារសាធារណៈ និងញុះញង់ឲ្យមានភាពចលាចលនៅក្នុងសង្គម ដោយលោក សម រង្ស៊ី ត្រូវបានចោទប្រកាន់ទាក់ទិននឹងវីដេអូនេះកាលពីខែវិច្ឆិកា បន្ទាប់ពីនិរទេសខ្លួនរួច។
លោក ហេង សំរិនបានដាក់ពាក្យប្តឹងពីបទបរិហារកេរ្តិ៍នៅក្នុងខែធ្នូូ ដើម្បីជាការឆ្លើយតបទៅនឹងការបង្ហោះតាមហ្វេសប៊ុករបស់លោក សម រង្ស៊ី មួយខែមុនមានការដាក់ពាក្យបណ្តឹងដោយក្នុងនោះប្រធានគណបក្សប្រឆាំងរូបនេះបានអះអាងថា របបគាំទ្រដោយវៀតណាមដែលជំនួសរបបខ្មែរក្រហមនៅក្នុងឆ្នាំ១៩៧៩ បានបង្កើតសាលាក្តីមួយដែលផ្តន្ទាទោសប្រហារជីវិតព្រះបហាក្សត្រ នរោត្តម សីហនុ ពីបទក្បត់ជាតិ។
ទោះបីជា លោក សម រង្ស៊ី មិនបានបញ្ចេញ ឈ្មោះលោក ហេង សំរិននៅក្នុងការបង្ហោះនោះក៏ដោយ តែប្រធានរដ្ឋសភារូបនេះ គឺជាប្រមុខរដ្ឋមានតែឈ្មោះដែលដឹកនាំរដ្ឋាភិបាលកម្ពុជា អស់រយៈពេលជាច្រើនឆ្នាំ បន្ទាប់ពី ប៉ុល ពត ត្រូវបានផ្តួលរំលំ។ តាមពិត របបរបស់លោក ហេង សំរិន មិនដែលផ្តន្ទាទោសប្រហារជីវិតព្រះមហាក្សត្រ ដែលពេលនោះនៅជាព្រះអង្គម្ចាស់នៅឡើយ។ការបើកសវនាការដែលគ្រាន់តែជាឆាកល្ខោន និងដែលបង្កើតឡើងដោយរបបនោះ ផ្តន្ទាទោសប្រហារជីវិតតែ ប៉ុល ពត និង អៀង សារី ដែលជារដ្ឋមន្ត្រីក្រសួងការបរទេសនៅសម័យនោះប៉ុណ្ណោះ។
ព្រះអង្គម្ចាស់ត្រូវបានផ្តន្ទាទោសប្រហារ ជីវិតកំបាំងមុខដោយរបប លន់ នល់ នៅក្នុងឆ្នាំ១៩៧០ពីបទឧក្រិដ្ឋមួយចំនួន រួមមានដូចជា អំពើក្បត់ជាតិជាដើម៕ស៊ុយឈាង