មន្ត្រីតុលាការមួយរូបបាននិយាយកាលពីម្សិលមិញថា អនុសេនីយ៍ទោនគរបាលរាជធានីភ្នំពេញម្នាក់ ដែលបានបាញ់លើមេប៉ុស្តិ៍វត្តភ្នំបណ្តាលឲ្យរបួសធ្ងន់ ក្នុងពេលប្រើថ្នាំញៀនហួសកម្រិតរហូតវង្វេងលែងដឹងខុសត្រូវកាលពីយប់ថ្ងៃសុក្រនោះ ត្រូវជាប់ចោទពីបទប៉ុនប៉ងឃាតកម្ម។
យោងតាមនគរបាលបានឲ្យដឹងថា ទាំងជនសង្ស័យ គឺអនុសេនីយ៍ទោ ស៊ិន សុធារិទ្ធ និងជនរងគ្រោះ ប៊ន សំអាត កំពុងទទួលការព្យាបាលរបួសត្រូវគ្រាប់កាំភ្លើងនៅមន្ទីរពេទ្យ កាល់ម៉ែតនៅឡើយ។ លោក សុធារិទ្ធ អាយុ៣២ឆ្នាំ បានត្រូវគ្រាប់កាំភ្លើងពីរគ្រាប់ដែលបាញ់ដោយកងកម្លាំងរាជអាវុធហត្ថ មិនយូរប៉ុន្មាន បន្ទាប់ពីគាត់បានបាញ់លោក សំអាត ត្រូវចំទ្រូង ពីរសង់ទីម៉ែត្រពីបេះដូង ហើយបន្ទាប់មកបានទាត់មេបុស្តិ៍រូបនេះចំកទៀត។
លោក ជា ពេជ្រ ព្រះរាជអាជ្ញារងសាលាដំបូងរាជធានីភ្នំពេញ បាននិយាយថា “យើងបានចោទគាត់ចំនួន៣បទល្មើស គឺទី១បទប៉ុនប៉ងឃាតកម្ម ទី២ បទប្រើប្រាស់អាវុធខុសច្បាប់ និងទី៣ បទរក្សាទុកដោយខុសច្បាប់នូវសារធាតុញៀន”។ លោកបាននិយាយបន្ថែមថា លោក សុធារិទ្ធ នឹងត្រូវបញ្ជូនទៅពន្ធនាគារព្រៃសរង់ចាំសវនាការនៅពេលរបួសរបស់គាត់បានជាសះស្បើយ។
លោក សុធារិទ្ធ មន្ត្រីនគរបាលព្រហ្មទណ្ឌកម្រិតធ្ងន់នៃស្នងការដ្ឋាននគរបាល រាជធានីភ្នំពេញ បានបាញ់លោក សំអាត នៅពេលមេប៉ុស្តិ៍រូបនេះបានធ្វើអន្តរាគមន៍ឃាត់មន្ត្រីញៀនមេតំហ្វេតាមីនមិនឲ្យបំផ្លាញទ្រព្យសម្បត្តិម្តាយរបស់ខ្លួននៅផ្ទះរបស់ម្តាយក្នុងសង្កាត់វត្តភ្នំ នៅម៉ោងប្រហែល១១យប់ថ្ងៃសុក្រ។
ក្រោយពីគេចខ្លួនពីក្រុមកម្លាំងរាជអាវុធហត្ថដែលបានតាមលោក សំអាត ទៅកន្លែងកើតហេតុគាត់ត្រូវបង្ក្រាបបានដោយសារត្រូវគ្រាប់កាំភ្លើងពីរគ្រាប់ គឺមួយគ្រាប់ចំគូទ មួយគ្រាប់ទៀតចំស្មា ហើយត្រូវចាប់ឃុំខ្លួន។ ក្រោយមកសមត្ថកិច្ចបានរកឃើញមេតំហ្វេតាមីនបីកញ្ចប់តូចលើខ្លួនគាត់។
ក្នុងបទសម្ភាសមួយកាលពីដើមសប្ដាហ៍នេះ អ្នកនៅក្បែរកន្លែងកើតហេតុម្នាក់បានរៀបរាប់ឲ្យដឹងថាបានជាប់ក្នុងការបាញ់តដៃគ្នានោះ។ លោក អៀម ប៊ុនថេត អាយុ៣៤ឆ្នាំ កំពុងជិះរថយន្តហុងដា CRV របស់លោកទៅផ្ទះ ស្រាប់តែពេលនោះលោក សុធារិទ្ធ បានរត់សំដៅមករថយន្តរបស់លោក ហើយបានយកកាំភ្លើងគោះកញ្ចក់បង្អួចរថយន្ត។
លោក ប៊ុនថេត បានរៀបរាប់ថា “ខ្ញុំមិនដឹងថាមានរឿងអ្វីកើតឡើងទេ។ គាត់បានព្យាយាមបំបែកបង្អួច ប៉ុន្តែវាមិនបែក ហើយបន្ទាប់មកទៀត គាត់បានភ្ជង់ខ្ញុំ រកបាញ់ខ្ញុំ”។
លោកបាននិយាយថា “ខ្ញុំបានបើកបង្អួចនិងសួរថា មានរឿងអី? ហើយពេលនោះ គាត់បានឲ្យខ្ញុំចេញពីរថយន្ត ហើយប្រគល់រថយន្តឲ្យគាត់”។ លោកបាននិយាយបន្ថែមថា កម្លាំងរាជអាវុធហត្ថនៅពេលនោះបានចាប់ផ្តើមបាញ់លើលោក សុធារិទ្ធ ប៉ុន្តែដំបូងបាញ់មិនចំគាត់ ហើយត្រូវធ្លុះរថយន្ត CRV របស់លោកជាច្រើនគ្រាប់ទៅវិញ។
លោកបាននិយាយថា “កម្លាំងរាជអាវុធហត្ថបានបាញ់ជាច្រើនគ្រាប់ពីក្រោយ និងចំរថយន្តរបស់ខ្ញុំប្រាំគ្រាប់”។ លោកបានពន្យល់ថា ពីរគ្រាប់ធ្វើឲ្យបែកបង្អួចខាងក្រោយ ហើយបីគ្រាប់ទៀតធ្លុះកាងខាងក្រោយ។
លោក ប៊ុនថេត បាននិយាយថា លោកនឹងមិនប្តឹងអំពីការខូចខាតនេះទេ ជាការប្តឹងដែលលោកចាត់ទុកថា “ខាតពេលវេលានិងការងារ”៕មានិត