អតីតសង្ឃពីរអង្គដែលគេចាប់ផ្សឹក និងដែលចោទពីបទស្លៀកស្បង់ចីពរដោយខុសច្បាប់ រក្សាទុកគ្រឿងញៀន និងគំរាមសម្លាប់ក្មេងវត្តម្នាក់នោះត្រូវបានតុលាការក្រុងភ្នំពេញផ្តន្ទាទោសឲ្យជាប់ពន្ធនាគាររយៈពេលបីខែម្នាក់ និងម្នាក់ទៀត២ឆ្នាំ។
ក្នុងសវនាការនៅតុលាការក្រុងភ្នំពេញកាលពីថ្ងៃទី២២ ខែមីនា លោក ដាវ ទេព អាយុ៣២ឆ្នាំ និង ជា វណ្ណដា អាយុ៣០ឆ្នាំបានបដិសេធការចោទប្រកាន់ទាំងនេះ ដោយពួកគាត់អះអាងថាវាជាហេតុផលនយោបាយ។
លោក អឹុម វណ្ណៈ ប្រធានក្រុមប្រឹក្សាជំនុំជម្រះបាននិយាយថា តុលាការក្រុងបានសម្រេចឲ្យ ជា វណ្ណដា រួចផុតពីបទរក្សាទុកគ្រឿងញៀនខុសច្បាប់ និងគំរាមសម្លាប់ និងឲ្យ ដាវ ទេព រួចផុតពីបទប្រើប្រាស់លិខិតក្លែង ហើយកែប្រែបទចោទ ជា វណ្ណដា ពីបទប្រើលិខិតក្លែងទៅជាបទស្លៀកដណ្តប់ស្បង់ចីពរដោយខុសច្បាប់។
លោក អឹុម វណ្ណៈ បានប្រកាសសាលក្រមថ្ងៃនេះថា “តុលាការសម្រេចផ្តន្ទាទោស ជា វណ្ណដា ឲ្យជាប់ពន្ធនាគារ៣ខែ ពីបទស្លៀកស្បង់ចីពរដោយខុសច្បាប់ ហើយផ្តន្ទាទោស ដាវ ទេព ឲ្យជាប់ពន្ធនាគារ២ឆ្នាំពីបទរក្សាទុកគ្រឿងញៀនខុសច្បាប់ និងបទគំរាមសម្លាប់”។
ក្រោយពីបណ្តើរចេញពីបន្ទប់តុលាការ ដាវ ទេព បាននិយាយថា វាអយុត្តិធម៌ណាស់សម្រាប់រូបលោក។
ដាវ ទេព បាននិយាយថា “អយុត្តិធម៌ណាស់សម្រាប់អាត្មា។ អាត្មាមិនបានធ្វើទេ”។
ដាវ ទេព និង ជា វណ្ណដា បាននិយាយថា ការចាប់ខ្លួនពួកគាត់ដែលធ្វើឡើងកាលពីខែសីហា នៅឯវត្តអង្គតាមិញ ក្នុងខណ្ឌពោធិ័សែនជ័យ ក្រុងភ្នំពេញ ដែលនៅទីនោះនគរបាលបាននិយាយថា ពួកគេបានរកឃើញម៉ាទឹកកក០,០២ក្រាមនៅក្នុងបន្ទប់របស់ពួកគាត់ ជាមួយនឹងដាវ កូនកាំបិត និងពូថៅ គឺជាភ័ស្តុតាងដែលគេយកទៅដាក់ និងដែលធ្វើឡើងដើម្បីតបតចំពោះសកម្មភាពគាំទ្រគណបក្សសង្គ្រោះជាតិរបស់ពួកគាត់៕