លោក ខឹម វាសនា​ លើក​សរសើរ​លោកនាយក​រដ្ឋមន្ត្រី ហ៊ុន សែន​

លោក ខឹម វាសនា​​​ មេដឹកនាំ​​​គណបក្ស​​​សម្ព័ន្ធ​​​ដើម្បី​​​ប្រជា​​​ធិបតេយ្យ (LDP) ​​​ត្រូវ​​​បាន​​បោះ​​​​​​ឆ្នោត​​​ជ្រើស​​​រើស​​​សាជា​​​ថ្មី​​​ឲ្យ​​​កាន់​​​​​​តួនាទី​​​របស់​​​ខ្លួន​​​នៅ​​​សន្និបាត​បក្ស​​​ក្នុង​​​រាជ​​​ធានី​​​ភ្នំពេញ ​​​កាល​​​ពី​ម្សិល មិញ ដោយ​​​ឆ្លៀត​យក​​​ឱកាស​​​​​​នោះ​​​ ស្តី​​​​បន្ទោស​​​​​​​​​អនុប្រធាន​​​គណបក្ស​​​ប្រឆាំង​​​ ហើយ​​​លើក​​​សរសើរ​​​លោក​​​នាយក​​​រដ្ឋ​​​មន្ត្រី​​​។

នៅ​​​ក្នុង​​​សុន្ទរកថា​​​បញ្ចប់​​​បន្ទាប់​​​ពី​​​លោក​​​ត្រូវ​​​បាន​​ជ្រើស​​​​តាំង​​​ឡើង​វិញ​​​ជា​​​ប្រធាន​​​គណ​​​បក្ស​​​ LDP ជា​គណបក្ស​​​ដែល​​​លោក​​​បាន​​​បង្កើត​​​ឡើង​​​បន្ទាប់​​​ពី​​​ត្រូវ​​​បាន​​​បណ្តេញ​​​ចេញ​​​ពី​​​តំណាង​​​​​​រាស្ត្រ​​​គណបក្ស​​​ សម រង្ស៊ី កាល​​​ពីខែ​​​កក្កដា ​​​ឆ្នាំ ​​​២០០៥ លោក ខឹម វាសនា​​​ បាន​​​ចំអក​​​លោក​​​កឹម សុខា អនុប្រធាន​​​គណបក្ស​​​សង្គ្រោះ​​​ជាតិ​​​ជុំ​​​វិញ​​​ការ​​​អះអាង​​​ជា​​​សាធារណៈ​​​កាល​​​ពី​​​ពេល​​​​​​ថ្មី​​​ៗ​​​នេះ​ថា លោក​​​មាន​​​ស្រី​​​កំណាន់​​​។

លោក​​​ កឹម សុខា បាន​​​អនុវត្ត​​​គោល​​​នយោ​​​បាយ​​​ “មិន​​​ឆ្លើយ​​​ មិន​​​ឆ្លង មិន​​​ឈ្លោះ”ឆ្លើយ​​​តប​​​ទៅ​​​នឹង​​​ការ​​​អះអាង​ពី​​​ស្នេហា​​​ក្រៅ​​​អាពាហ៍​​​ពិពាហ៍​​​ដែល​​​បាន​​​លេច​​​ឡើង​​​បន្ទាប់​​​ពី​​​ការ​​​សន្ទនា ​​​តាម​​​ទូរស័ព្ទ​​​ជា​​​ច្រើន​​​ភាគ​​​រវាង​​​លោក កឹម ​​​សុខា ​​​និង​​​ស្រី​​​កំណាន់​​​របស់​​​លោក​​​បាន​​​លេច​​​ធ្លាយ​​​តាម​​​ប្រព័ន្ធ​​​អីុនធឺណិត​​​។

លោក ខឹម វាសនា បាន​​​មាន​​​ប្រសាសន៍​​​ថា​​​”​​​បង​​​ប្អូន​​​​​​​​​ ‘​​​មិន​​​ឆ្លើយ​​​’ និង ‘​​​មិន​​​ឆ្លង​​​’ គឺ​​​មិន​​​ហ៊ាន​​​ប្រឈម​​​មុខ​​​ [បញ្ហា] ​​​ដោយ​​​សា​រ​​​តែ​​​ខ្លាច​​​ហ្នឹង​​​ឯង​​​”។

លោក​​​បាន​​​និយាយ​​​​​​ដល់​​​លោក ​​​កឹម ​​​សុខា​​​ ថា “គាត់​​​មាន​​​ស្រី​​​ច្រើន​​​។ សំឡេង​​​នេះត្រូវ​​​បាន​​​គេ​​​ថត​​​ទុក​​​រួច​​​ហើយ​​​ ហើយ​​​គាត់​​​ធ្វើ​​​ពុធ​​​ដូច​​​​​​ជា​​​អ្នក​​​ដទៃ​​​​មិន​​​ដឹង​​​អ៊ីចឹង​​​”។

លោក ខឹម វាសនា​​​ ដែល​​​គណបក្ស​​​របស់​​​លោក​​​មិន​​​ដែល​​​ទទួល​​​បាន​​​១​​​អាសនៈ​​​ក្នុ​​​ងការ​​​បោះ​​​ឆ្នោត​​​ជ្រើ​​​សតាំង​​​តំណាង​​​រាស្ត្រ​​​ ប៉ុន្តែ​​មាន​​​​​​អាសនៈ​​​ក្រុម​​​ប្រឹក្សាឃុំ​​​មួយ​​​ចំនួន​​​តូច និង​​​អាសនៈ​​​​​​ក្រុម​​​ប្រឹក្សា​​​ស្រុក​​​១ ក៏​​​បាន​​​លើក​​​សរសើរ​​​​​​ពី​​​ការ​​​វាយ​​​តម្លៃ​​​អត្តចរិត​​​​របស់​​​លោក​​​នាយក​​​រដ្ឋ​​​មន្ត្រី ហ៊ុន សែន ច្រើន​​​ឆ្នាំ​​​មក​​នេះ​​​ផង​​​ដែរ​​​​​​​។

លោក​​​បាន​​​ថ្លែង​​​ថា “ត្រង់​​​ចំណុច​​​េនះ គាត់​​​ល្អ។ អ្នក​​​ដែល​​​គាត់​​​បាន​​​វាយ​​​ប្រហារ​​​ពី​​​មុន​​​មក​​​គឺ​​​ដោយ​សារ​​​ពួក​​​គេ​​​ជា​​​មនុស្ស​​​អាក្រក់​​​។ ខ្ញុំ​​​​​​ចាប់​អារម្មណ៍​យ៉ាងខ្លាំង​ពី​អត្តចរិត​​​​ប្រភេទ​​​នេះ​​​។ ខ្ញុំ​​ចូល​ចិត្ត​​​​គាត់​​​យ៉ាង​​​ខ្លាំង​​​”។

លោក ខឹម វាសនា ត្រូវ​​​បាន​​​បណ្តេញ​​​ចេញ​​​​​​ពី​​​​​​គណបក្ស សម រង្ស៊ី ជុំ​​​វិញ​​​អ្វី​​​ដែល​​​គណបក្ស​​​ចាត់​​​ទុក​​​ថា ជា​​​ការ​​​រិះគន់​ដល់សមាជិក​​​​រាជ​​​វង្សា​​​នុវង្ស​​​ក្នុង​​​ខែ​​​មិថុនា ឆ្នាំ​​​២០០៥ ដោយ​​​ចោទ​​​​​​សមា​​​ជិក​​​រាជ​​​វង្ស​​​ថា “ជញ្ជក់​​​ឈាម​​​ប្រជា​​​ពល​​​រដ្ឋ​​​” ។

កាល​​​ពី​​​មួយ​​​ខែ​​​មុន​​​ គាត់​​​បានរំលោភការ​​​​ធ្វើ​​​ពហិការ​​​មិនចូល​​​សភា​​​ដោយ​​​​​​គណបក្ស​​​ សម រង្ស៊ី ដើម្បី​​​បដិសេធ​​​​​​​​​មិន​​​ឲ្យ​​​​​​តំណាង​រាស្ត្រ​គណបក្ស​​​ប្រជាជនកម្ពុជា និង​​​គណបក្ស​​​ហ្វុនស៊ិនបិុច​​​ដែលពេលនោះ​ចាំបាច់ត្រូវ​មាន​កូរ៉ុម​​តំណាង​​​​រាស្ត្រ​៨៧រូប​ដើម្បី​អនុម័ត​ច្បាប់​។ គណបក្ស​​​សម រង្ស៊ី បាន​​​ធ្វើ​​​ការ​​​តវ៉ា​​​ពី​​​ការ​​​ដក​​​អភ័យ​​​ឯក​​​សិទ្ធិ​​​សភា​​​សមាជិក​​​របស់​​​ខ្លួន​​​បី​​​រូប​​​។

លោក សុខ ឥសាន អ្នក​​​នាំ​​​ពាក្យ​​​គណបក្ស​​​កាន់​​​អំណាច​​​បាន​​​មាន​​​ប្រសាសន៍​​​កាល​​​ពី​​​ម្សិលមិញ​​​ថា លោក​​​រីក​​​រាយ​​​ដែល​​​បាន​​​ឮព័ត៌​​​មាន​​​ថា លោក ខឹម វាសនា ដែល​ទទួល​​​រង​​​ការ​រិះគន់​យ៉ាង​​​ខ្លាំង​​​ពី​គណៈសង្ឃ​ដែលគាំទ្រ​​​​គណបក្ស​ប្រជាជន​កម្ពុជា​នៅ​ឆ្នាំ​នេះ ចំពោះ​យុទ្ធនាការ​របស់លោក​ប្រឆាំង​​អំពើ​ពុករលួយ​ក្នុង​ជួរ​ព្រះ​សង្ឃនោះ បាន​លើក​​​សរសើរ​​​លោក ហ៊ុន សែន ។

លោក សុខ ឥសាន បាន​​​ថ្លែង​​​ថា “អ្វី​​​ដែល​​​លោក ខឹម វាសនា​​​ និយាយ​​​គឺ​​​ពិត​​​ ហើយ​ស្មោះ​​​​​​​ត្រង់​​​” ដោយ​​​លោក​​​បដិសេធថា គណ​​​បក្ស​​​ប្រជាជនកម្ពុជា និង​​​គណបក្ស​​​ LDP មិន​​​មែន​​​ល្អូក​​​ល្អិន​​​នឹង​​​គ្នា​​​នោះ​​​ទេ​​​​​​​​​។ ប្រសិន​​​បើ​​​គាត់​​​មិន​​​វាយ​​​ប្រហារ​​​យើង​​​ តើ​​​មាន​​​ប្រយោជន៍​​​អ្វី​​​ដែល​​​យើង​​​ត្រូវ​​​វាយ​​​ប្រហារ​​​គាត់​​​នោះ​​​?”។

លោក អេង ឆៃអ៊ាង សមាជិក​​​សភា​​​គណ​​​បក្ស​​​សង្គ្រោះ​​​ជាតិ បាន​​​មាន​​​ប្រសាសន៍​​​ថា ​​​លោក​​​នឹង​​រក្សា​​​​ជំហរ​​​របស់​​​គណបក្ស​​​ “មិន​​​ឆ្លើយ​​​” ចំពោះ​​​លោក ខឹម វាសនា ដដែល​​​។

លោក​​​​​​ថ្លែង​​​ថា “រឿង​​​េនះ​​​គ្មាន​​​ប្រយោជន៍​​​ ឡើយ​​​។ អ្វី​​​ដែល​​​សំខាន់​​​គឺ​​​ថា យើង​​​កំពុង​​​គិត​​​អំពី​​​ការ​​​បោះ​​​ឆ្នោត​​​។ យើង​​​នឹង​​​មិន​​​ឆ្លើយ​​​តប​​​ចំពោះ​​​បញ្ហា​​​ដែល​​​គ្មាន​​​ប្រយោជន៍​​​ឡើយ​​​”៕​​​ សារុន​