នគរបាលបាននិយាយកាលពីម្សិលមិញថា ក្មេងស្រីអាយុ១៤ឆ្នាំម្នាក់ដែលបានបាត់ខ្លួនពីផ្ទះរបស់នាងនៅខេត្តកំពតកាលពីថ្ងៃសុក្រ ត្រូវបានប្រទះឃើញរំលោភសម្លាប់កាលពីថ្ងៃសៅរ៍ ហើយពេលនេះខ្លួនមិនទាន់កំណត់អត្តសញ្ញាណជនសង្ស័យណាម្នាក់បាននៅឡើយទេ ខណៈកំពុងបន្តការស៊ើបអង្កេត។
លោក ណុប ចាន់ភាព អធិការរងស្រុកទឹកឈូរបានមានប្រសាសន៍ថា ក្មេងស្រី ចុង ស្រីលក្ខណ៍ បានជិះកង់ចេញពីផ្ទះរបស់នាងនៅម៉ោង៦និង៣០នាទីព្រឹកថ្ងៃសុក្រ ដើម្បីទៅរៀននៅអនុវិទ្យាល័យរោងចក្រស៊ីម៉ង់ត៍ក្នុងឃុំកណ្ដោល។ យោងតាមសិស្សផ្សេងទៀតបានឲ្យដឹងថា ក្មេងស្រីរងគ្រោះបានចេញពីសាលានៅម៉ោងប្រហែល៨ព្រឹក ដោយសារតែគ្រូរបស់នាងអវត្តមាន។
អធិការរងស្រុកទឹកឈូររូបនេះបានរៀបរាប់ថា “នៅម៉ោងប្រហែល៩ព្រឹក នៅពេលយាយរបស់នាងត្រឡប់ពីលក់នំបញ្ចុកនៅក្នុងភូមិមកដល់ផ្ទះវិញ គាត់មិនឃើញចៅស្រីរបស់ខ្លួនទេ គាត់ឃើញតែកាតាប កង់ និងឯកសណ្ឋានសិស្សរបស់នាងនៅក្រោមផ្ទះប៉ុណ្ណោះ”។
លោកបានមានប្រសាសន៍បន្ថែមថា ជីដូនរបស់ជនរងគ្រោះបានប្ដឹងទៅនគរបាលភ្លាមៗ និងសុំឲ្យអ្នកជិតខាងជួយស្វែងរកក្មេងស្រីរងគ្រោះ។ ការតាមរកបានបញ្ចប់នៅថ្ងៃបន្ទាប់នៅម៉ោង១និង៣០នាទីរសៀល នៅពេលអ្នកភូមិរកឃើញសពក្មេងស្រីរងគ្រោះក្នុងស្ថានភាពអាក្រាតកាយក្នុងព្រៃ នៅចម្ងាយប្រមាណ៥០០ម៉ែត្រពីផ្ទះរបស់នាង៕ សុខុម