គេហទំព័រផ្ទាល់ខ្លួនរបស់លោកនាយករដ្ឋមន្ត្រី ហ៊ុន សែន ត្រូវបានចូលប្លន់ដោយសមាជិកក្រុមអនាមិកកាលពីថ្ងៃសៅរ៍ ហើយគេហទំព័រនេះត្រូវបានជំនួសដោយរូបភាពវីដេអូបង្ហាញរូបថតអ្នកដែលបានស្លាប់ និងអំពើហិង្សាដែលគាំទ្រដោយរដ្ឋាភិបាលក្នុងប្រទេសកម្ពុជារយៈពេលជាង៣០ឆ្នាំកន្លងមក។
នៅក្នុងសារតាមហ្វេសប៊ុកកាលពីរសៀលថ្ងៃសៅរ៍ លោក ហ៊ុន សែន បានមានប្រសាសន៍ថា គេហទំព័រនេះត្រូវបានចូលប្លន់នៅម៉ោងប្រហែល៤និង១២នាទីទៀបភ្លឺក្នុងការខិតខំប្រឹងប្រែងដើម្បី ”បំផ្លាញកិត្តិយសរបស់លោក”។ គេហទំព័រនេះត្រូវបានជួសជុលឡើងវិញនៅល្ងាចថ្ងៃសៅរ៍ ហើយបានដំណើរការដូចធម្មតាកាលពីយប់មិញ។
លោកនាយករដ្ឋមន្ត្រីបានសរសេរនៅក្នុងទំព័រហ្វេសប៊ុករបស់លោកថា “ទង្វើនេះត្រូវបានប្រព្រឹត្តយ៉ាងជាក់ច្បាស់ និងមិនអាចប្រកែកបានដោយក្រុមប្រឆាំងដែលតែងតែងព្យាយាមស្វែងរកមធ្យោបាយបែបបញ្ឆេះដើម្បីវាយប្រហារលោកនាយករដ្ឋមន្ត្រី។ លោកមិនបានចេញឈ្មោះ “ក្រុមប្រឆាំងនោះទេ”។
ជាផ្នែកមួយនៃការចូលប្លន់នេះ ទំព័រដើមនៃគេហទំព័រដែលត្រូវបានចាប់ផ្តើមដំណើរការកាលពីខែមករា ហើយបានផ្សព្វផ្សាយពីសកម្មភាពផ្លូវការរបស់លោក ហ៊ុន សែន ត្រូវបានជំនួសដោយរូបថតលោកនាយករដ្ឋមន្ត្រីដែលគេយកទៅកែ ដោយពាក់មកុដធំ ពណ៌មាសមានរូបសញ្ញាហ្វេសប៊ុក និងអមដោយអក្សរសរសេរថា “អធិរាជហ្វេសប៊ុក” ជាការសំដៅច្បាស់ក្រឡែតចំពោះប្រជាប្រិយភាពតាមប្រព័ន្ធអីុនធឺណិតរបស់លោកនាយករដ្ឋមន្ត្រី ដែលប្រណាំងប្រជែងជាមួយលោក សម រង្ស៊ី មេដឹកនាំគណបក្សប្រឆាំងដែលនិរទេសខ្លួន។
វីដេអូនៅក្នុងយូធូបដែលបានបង្ហោះពីក្រោមរូបថតដែលត្រូវបានដាក់បញ្ចូលទៅក្នុងគេហទំព័រនេះជាបន្តបន្ទាប់កាលពីថ្ងៃព្រហស្បតិ៍ បង្ហាញអំពីទំព័រដើមត្រូវបានគេចូលប្លន់មួយផ្សេងទៀត ដែលបង្ហាញអំពីរូបថតនៃការវាយប្រហារ និងអំពើព្រៃផ្សៃ ក្នុងនោះមួយចំនួនភ្ជាប់ទៅលោក ហ៊ុន សែន អំឡុងរយៈពេលកាន់អំណាចបីទសវត្សរ៍របស់លោក។
រូបថតទាំងនោះរួមមានរូបភាពការប្រយុទ្ធគ្នាក្នុងឆ្នាំ១៩៩៧ ការវាយប្រហារលើកម្មករបន្ទាប់ពីការបោះឆ្នោតឆ្នាំ២០១៣ដ៏ចម្រូងចម្រាស ការបាញ់ត្រូវក្រុមបាតុករស្លាប់កាលពីដើមឆ្នាំ២០១៤ និងការវាយដំតំណាងរាស្ត្របក្សប្រឆាំងនៅក្រៅរដ្ឋសភាកាលពីឆ្នាំមុន។
រូបថតផ្សេងទៀតបង្ហាញពីការបណ្ដេញចេញពីដីធ្លីដ៏ហិង្សា រថយន្តធុនធំដឹកឈើខុសច្បាប់ពេញៗ និងសពលោក ជា វិជ្ជា មេដឹកនាំសហជីពដែលត្រូវបានធ្វើឃាត និងលោក ឈុត វុទ្ធី សកម្មជនបរិស្ថានដែលត្រូវបានបាញ់ស្លាប់ជាដើម។
សំឡេងដែលបានរៀបរាប់ពីការចូលប្លន់នោះថា ជា “ការទះកំផ្លៀងដំបូង” ក្នុងយុទ្ធនាការប្រឆាំងលោក ហ៊ុន សែន ដោយព្រមានថា នឹងមានការចូលប្លន់ពីរទៀត ប្រសិនបើលោកមិនបោះបង់អំពើហិង្សា ដែលក្នុងនោះអ្នករៀបរាប់បានអះអាងថា លោកនាយករដ្ឋមន្ត្រីមានជាប់ពាក់ព័ន្ធ។
បើទោះជារូបសញ្ញាអនាមិក គឺស្រោមមុខ Guy Fawkes បានលេចឡើងពីរដងក្នុងវីដេអូនោះក៏៏ដោយ ក៏គ្មានអ្វីត្រូវបានបង្ហោះនៅក្នុងគណនីហ្វេសប៊ុក ឬទ្វីតធើនៃបណ្តាញកម្ពុជារបស់ក្រុមចូលប្លន់នេះ ដែលល្បីឈ្មោះ នៅពេលសមាជិករបស់ពួកគេបានចូលប្លន់់់គេហទំព័ររបស់រដ្ឋាភិបាលនិងវិស័យឯកជនជាង៣០បន្ទាប់ពីការបោះឆ្នោតឆ្នាំ២០១៣។
លោក Niklas Femerstrand អ្នកប្លន់វេបសាយដែលមានមូលដ្ឋាននៅរាជធានីភ្នំពេញ និងជាអ្នកស្រាវជ្រាវសន្តិសុខអីុនធឺណិតបាននិយាយថា សមាជិកភាពដែលតែងតែផ្លាស់ប្តូររបស់ក្រុមនេះធ្វើឲ្យមានការលំបាកក្នុងការកំណត់អត្តសញ្ញាណអ្នកនៅពីក្រោយការចូលប្លន់កាលពីថ្ងៃសៅរ៍ ដែលកាន់តែមានភាពងាយស្រួល ពីព្រោះសូហ្វវែដែលដំណើរការគេហទំព័រឈ្មោះ Hoolahoop មិនត្រូវបានធ្វើបច្ចុប្បន្នភាពទេបន្ទាប់ពីការរកឃើញបញ្ហាសន្តិសុខនៅក្នុងកម្មវិធីនេះកាលពីខែធ្នូ។
លោក Niklas Femerstrand បាននិយាយថា “ខ្ញុំសង្ស័យថា ពួកគេប្រើកម្មវិធីមិនទំនើប ឬងាយរងគ្រោះ។ រដ្ឋាភិបាលគួរជាអ្នកត្រូវបន្ទោសចំពោះការមិនធ្វើបច្ចុប្បន្នភាពសូហ្វវែរបស់ ខ្លួន”៕សារុន