នៅក្នុងឱកាសប្រារព្ធទិវាសិទ្ធិមនុស្សអន្តរជាតិ១០ធ្នូ លើកទី៧០ កាលពីម្សិលមិញស្ថានទូតសហរដ្ឋអាមេរិកប្រចាំនៅកម្ពុជា បានអំពាវនាវឲ្យមានការទម្លាក់បទចោទប្រកាន់ទៅលើអ្នកទោសនយោបាយទាំងអស់ដែលកំពុងជាប់ឃុំឃាំងក្នុងប្រទេសកម្ពុជា។
ស្ថានទូតសហរដ្ឋអាមេរិកបានជំរុញឲ្យរបបក្រុងភ្នំពេញដោះលែង លោកកឹម សុខាពីការឃុំឃាំងក្នុងផ្ទះដើម្បីឲ្យលោកមានសេរីភាពក្នុង ការចូលរួមសកម្មភាពនយោបាយឡើងវិញ។
ទំព័រហ្វេសបុករបស់ស្ថានទូតសហរដ្ឋអាមេរិកប្រចាំនៅកម្ពុជា បានដកស្រង់សម្តីលោកMartin Luther’s King Jrចុះផ្សាយថា អយុត្តិធម៌នៅកន្លែងណាមួយគឺជាការគំរាមកំហែងគ្រប់ទីកន្លែង។
ក្រុមអ្នកប្រើប្រាស់បណ្តាញសង្គមជាច្រើនបានបញ្ចេញទស្សនៈថាពួកគេចង់បានសិទ្ធិសេរីភាពក្នុងនាមជាមនុស្សលោកហើយអរគុណដល់សហរដ្ឋអាមេរិកដែលតែងតែនៅជាមួយពលរដ្ឋខ្មែរក្នុងការនាំមកនូវការគោរពសិទ្ធិមនុស្ស និងលទ្ធិប្រជាធិបតេយ្យនៅកម្ពុជា។
ពួកគេសង្ឃឹមថា ប្រធានគណបក្សសង្គ្រោះជាតិលោកកឹម សុខា នឹងត្រូវបានទម្លាក់ចោលការចោទប្រកាន់ ហើយមឹងត្រូវដោះលែងឱ្យមានសេរីភាពឡើងវិញក្នុងពេលឆាប់ៗខាងមុខនេះ។
ចំណែកអគ្គលេខាធិការអង្គការសហប្រជាជាតិលោកAntonio Guterres វិញបានអំពាវនាវឲ្យ«ពលរដ្ឋទាំងអស់នៅលើពិភពលោករួមគ្នាក្រោកឈរឡើងដើម្បីសិទ្ធិមនុស្ស សម្រាប់មនុស្សគ្រប់គ្នា និងនៅគ្រប់ទីកន្លែងទាំងអស់»៕