មហាសន្និបាតលើកទី៤១ រយៈពេលបីថ្ងៃរបស់គណបក្សប្រជាជានកម្ពុជាដែលបានបិទបញ្ចប់នៅថ្ងៃព្រហស្បតិ៍ទី២០ ខែធ្នូ នេះបានសម្រេចបញ្ចូលលោកហ៊ុន ម៉ាណែតកូនប្រុសរបស់លោកហ៊ុន សែន ប្រធានបក្សកាន់អំណាចនោះ ទៅជាសមាជិកគណៈអចិន្ត្រៃយ៍ នៃគណៈកម្មាធិការកណ្ដាលរបស់គណបក្សប្រជាជនកម្ពុជា។
លោកកឹម សុខាអះអាងថា លោកហ៊ុន សែន កំពុងពង្រឹងឥទ្ធិពលគ្រួសាររបស់លោក ក្នុងជួរបក្ស។ លោកបន្តថាការប្រឹងលើកលោកហ៊ុន ម៉ាណែត ទៅជាសមាជិកគណៈអចិន្រ្តៃយ៍នៅពេលនេះ គឺជាការជាន់ពន្លិចសា្មរតីរបស់អ្នកតស៊ូរបស់មន្រ្តីគណបក្សប្រជាជនកម្ពុជាពីដើមមក។ លោកបន្តថា ការតែងតាំងលោកហ៊ុន ម៉ាណែត នៅពេលនេះគឺដោយសារសុខភាពរបស់លោកហ៊ុន សែន កាន់តែទ្រុឌទ្រោម។
កាលពីមហាសន្និបាតលើកទី៤០នៅដើមខែមករាឆ្នាំ២០១៨ គណបក្សប្រជាជនកម្ពុជា បានសម្រេចបញ្ចូលសមាជិកថ្មីនៃគណៈកម្មាធិការកណ្ដាលចំនួន៣៤២នាក់ ដែលភាគច្រើនជាកូនរបស់មន្ត្រីជាន់ខ្ពស់ក្នុងជួររដ្ឋាភិបាល ខ្លះជាមន្រ្តីនគបាល មន្រ្តីយោធា ចៅក្រម និងព្រះរាជអាជ្ញា។ រហូតមកទល់ពេលនេះ គណៈកម្មាធិការកណ្ដាលនៃគណបក្សប្រជាជនកម្ពុជាមានសមាជិក ជិត១ពាន់នាក់ហើយ។
នាយកប្រតិបត្តិទទួលបន្ទុកកិច្ចការតំបន់ អាស៊ីរបស់អង្គការឃ្លាំមើលសិទ្ធិមនុស្ស Human Rights Watch លោកBrad Adams ធ្លាប់អះអាងថា លោកហ៊ុន សែនកំពុងដឹកនាំតាមបែបឯកបក្ស និងផ្ដាច់ការតាមរយៈការច្របាច់បញ្ចូលស្ថាប័នតុលាការ និងស្ថាប័នយោធាជាដើមទៅក្នុងការគ្រប់គ្រងរបស់បក្សកាន់អំណាចតែមួយនោះ។