គ្រូបង្រៀនចំនួនជាង១០នាក់ បានសម្រេចដាក់ពាក្យប្តឹងទៅសាលាដំបូងរាជធានីភ្នំពេញ កាលពីព្រឹកមិញនេះប្តឹងរដ្ឋមន្ត្រីក្រសួងអប់រំ យុវជន និងកីឡាគឺលោកហង់ ជួនណារ៉ុន ក្រោយពេលពួកគេត្រូវបានរដ្ឋមន្ត្រីរូបនេះ លុបឈ្មោះចេញពីក្របខ័ណ្ឌក្រសួងកាលពីឆ្នាំមុន។
ក្រុមគ្រូបង្រៀនទាំងនោះអះអាងថា ប្រសិនបើគ្មានសម្ពាធនយោបាយទេ ពួកគាត់ក៏មិនត្រូវបានក្រសួងអប់រំលុបឈ្មោះចេញពីក្របខណ្ឌរបស់រដ្ឋកាលពីឆ្នាំមុននោះដែរ។
លោករ៉ុង ឈុន ដែលជាបុគ្គលិកក្រសួងអប់រំម្នាក់ក្នុងចំណោមគ្រូបង្រៀនជាង១០នាក់ទៀត ដែលត្រូវបានក្រសួងអប់រំលុបឈ្មោះចេញពីក្របខណ្ឌរដ្ឋដែរនោះ បានប្រាប់ក្រុមអ្នកសារព័ត៌មានថា តុលាការបានទទួលពាក្យបណ្តឹងរបស់គ្រូបង្រៀនទាំង១០នាក់នេះរួចហើយ។ លោកមានជំនឿថា ប្រសិនបើតុលាការមិនទទួលរងសម្ពាធនយោបាយទេ នោះតុលាការនឹងផ្តល់យុត្តិធម៌ជូនពួកគាត់ទាំង១១ នាក់មិនខាន ព្រោះគាត់មិនបានព្រឹត្តខុសដូចការចោទប្រកាន់របស់ក្រសួងអប់រំទេ។
នៅក្នុងពាក្យបណ្តឹងនោះ ពួកគេស្នើឱ្យតុលាការចេញសាលក្រមបដិសេធចោលសេចក្តីប្រកាសរបស់ក្រសួងអប់រំកាលពីថ្ងៃទី៣០ ខែមករាឆ្នាំ២០១៨។ លើសពីនេះ ពួកគេស្នើសុំឱ្យតុលាការផ្តល់ក្របខណ្ឌជាគ្រូបង្រៀននៅក្រសួងអប់រំ ដល់ពួកគេឡើងវិញ។
កាលពីដើមឆ្នាំ២០១៨ រដ្ឋមន្ត្រីក្រសួងអប់រំ យុវជន និងកីឡាលោកហង់ ជួនណារ៉ុន បានសម្រេចលុបឈ្មោះគ្រូបង្រៀននិងបុគ្គលិកអប់រំចំនួន១៣នាក់ ដែលជាអតីតមន្ត្រីជាប់ឆ្នោត និងមន្ត្រីគ.ជ.ប.ពីខាងបក្សប្រឆាំង ចេញពីក្របខណ្ឌក្រសួងអប់រំ ក្រោមហេតុផលថា គ្រូបង្រៀនទាំងនោះអវត្តមានពីការងារដោយគ្មានច្បាប់អនុញ្ញាត៕