លោកនាយករដ្ឋមន្ត្រី ហ៊ុន សែន នៅថ្ងៃព្រហស្បតិ៍នេះ បានបញ្ជាឱ្យ កងទ័ពដែលស្មោះស្ម័គ្រនឹងរបបរបស់លោកត្រូវត្រៀមខ្លួនកម្ទេចចោលកងកម្លាំងទាំងឡាយណាដែលប្រឆាំងនឹងរដ្ឋាភិបាលរបស់ លោកដែលកើតចេញពីការបោះឆ្នោត។ ប៉ុន្តែសហគមន៍អន្តរជាតិចាត់ទុកការបោះឆ្នោតកន្លងទៅ ជាការបោះឆ្នោតក្លែងក្លាយ។
បទបញ្ជារបស់លោកហ៊ុន សែនធ្វើឡើងក្នុងពិធីប្រារព្ធខួប ២០ឆ្នាំនៃថ្ងៃបង្កើតបញ្ជាការដ្ឋានកងទ័ពជើងគោកនៃកងយោធពលខេមរភូមិន្ទ ក្នុងរាជធានីភ្នំពេញកាលពីព្រឹកមិញនេះ។
លោកហ៊ុន សែនបានបញ្ជាក់ថា ក្រុមកងទ័ពទាំងឡាយដែលប្រឆាំងរដ្ឋាភិបាលរបស់លោកបច្ចុប្បន្នគឺជាមុខសញ្ញាដែលកម្ចេចចោល ដោយមិនអនុញ្ញាតឱ្យមានកម្លាំងណាមួយធ្វើរដ្ឋប្រហារទម្លាក់លោកដូចកាលពីសម័យសង្គមរាស្ត្រនិយម របស់ព្រះបាទនរោត្តមសីហនុ ដែលត្រូវបានកម្លាំងកងទ័ពសេនាប្រមុខលន់ នល់ធ្វើរដ្ឋប្រហារ កាលពីថ្ងៃទី១៨មីនាឆ្នាំ១៩៧០។
មិនតែប៉ុណ្ណោះលោកហ៊ុន សែនបានទទួលស្គាល់ថា លោកពិតជាបានរៀបចំពង្រឹងអំណាច និងកម្លាំងទ័ពក្នុងដៃរបស់លោកដើម្បីបន្តអំណាចតទៅទៀតផងដែរ ដោយមិនខ្វល់ពីអ្នករិះគន់ឡើយ។
ក្នុងក្បួនត្រួតពល នៅព្រឹកនេះ លោកហ៊ុន សែន និង កូនប្រុសច្បងរបស់លោកគឺលោកហ៊ុន ម៉ាណែត ហាក់បង្ហាញពីឥទ្ធិពលអំណាចរបស់គ្រួសារត្រកូលហ៊ុនផងដែរ។
ស្ថាបនិកអង្គការមាតាធម្មជាតិ លោកAlejandro Gonzalez Davidsonបានយករូបថតឪពុកផ្កាយមាសប្រាំ និងកូនផ្កាយមាសបី ទៅបង្ហោះលើបណ្តាញសង្គម ដោយថា សូមស្វាគមន៍របបកុម្មុនីស្តកូរ៉េខាងជើង។
នេះជាលើកទី១ដែលលោកហ៊ុន សែនព្រមានកម្ចេកកម្លាំងទ័ពដែលប្រឆាំងនឹងរដ្ឋាភិបាលលោកស្របពេលស្ថានភាពនយោបាយក្នុងប្រទេសកំពុងឡើងកម្តៅខ្លាំង ហើយហាក់បង្ហាញថា កម្លាំងទ័ពផ្ទៃក្នុង នៃរបបលោកហ៊ុន សែនមានអ្នកមិនពេញចិត្តចំពោះការដឹកនាំរបស់លោក។ កាលពីពេលកន្លងមក លោកហ៊ុន សែនធ្លាប់បានព្រមានកម្ចេចបក្សប្រឆាំងចោល ព្រមានកម្ចេកសង្គមស៊ីវិល ក្រោមការចោទពីបទគម្រោងធ្វើបដិវត្តន៍ពណ៌៕