សមាគមរោងចក្រកាត់ដេរនៅកម្ពុជាហៅកាត់ថា GMAC រួមនឹងសមាគមចំនួន២ទៀត របស់ក្រុមថៅកែរោងចក្រ និងអ្នកជំនួញធំៗនៅកម្ពុជា បានស្នើទៅសហភាពអឺរ៉ុបជាថ្មីទៀតឲ្យពន្យារការដកប្រព័ន្ធអនុគ្រោះពន្ធ (EBA) ដើម្បីជួយសង្គ្រោះការងាររបស់ពលរដ្ឋខ្មែរដែលកំពុងបាត់បង់ដោយសារឥទ្ធិពលធ្ងន់ធ្ងរពីវិបត្តិកូវីដ១៩។
សមាគមរោងចក្រកាត់ដេរ GMAC សមាគមរោងចក្រស្បែកជើង CFA និងសភាពាណិជ្ជកម្មអឺរ៉ុបនៅកម្ពុជា កាលពីថ្ងៃម្សិលមិញបានចេញ លិខិតរួមគ្នាមួយ ស្នើទៅអឺរ៉ុបពន្យារពេលដក EBA ដោយសារវិបត្តិ កូវីដ១៩ កំពុងប៉ះទង្គិចធ្ងន់ធ្ងរដល់រោងចក្រផលិតទំនិញធ្វើដំណើរ សម្លៀកបំពាក់ និងស្បែកជើង រួមទាំងកម្មករធ្វើការនៅតាមរោងចក្រទាំងនោះ។
សមាគមទាំង៣លើកឡើងទៀតថា រោងចក្រនៅកម្ពុជាប្រមាណ២៥០ដែលផលិតទំនិញទាំងនោះ បានបង្ខំចិត្តផ្អាកប្រតិបត្តិការទាំងស្រុង ខណៈរោងចក្រភាគច្រើនផ្សេងទៀត កំពុងកាត់បន្ថយសង្វាក់ផលិតកម្ម ដោយសារការធ្លាក់ចុះនៃការបញ្ជាទិញ។លិខិតដដែលលើកឡើងទៀតថា កម្មករជាង១សែន ៣ម៉ឺននាក់ ក្នុងវិស័យទាំងនេះ ដែលភាគច្រើនជាស្រ្តីបានបាត់បង់ការងារ ហើយតួលេខនេះ នឹងកើនឡើងខ្លាំងនៅប៉ុន្មានសប្តាហ៍ និងប៉ុន្មានខែខាងមុខទៀត។
កាលពីខែកុម្ភៈ គណៈកម្មការអឺរ៉ុប សម្រេចព្យួរប្រព័ន្ធអនុគ្រោះពន្ធ EBA ២០ភាគរយ ពីកម្ពុជា លើផលិតផល៤០ប្រភេទ ហើយនីតិវិធីនេះនឹងអនុវត្តចាប់ពីខែសីហាខាងមុខ ដែលនឹងធ្វើឱ្យកម្ពុជាត្រូវខាតបង់ប្រាក់បង់ពន្ធប្រមាណ១០០លានដុល្លារក្នុងមួយឆ្នាំៗ។
ការសម្រេចនេះ ដោយអឺរ៉ុបរកឃើញពីការរំលោភសិទ្ធិមនុស្សជាប្រព័ន្ធ សិទ្ធិការងារ សហជីព សង្គមស៊ីវិល ប្រព័ន្ធផ្សព្វផ្សាយឯករាជ្យ ពិសេសការងាកឆ្ងាយពីគន្លងលទ្ធិប្រជាធិបតេយ្យ ហើយរដ្ឋាភិបាលលោកហ៊ុន សែន នៅមិនទាន់ធ្វើឱ្យប្រសើរនូវស្ថានភាពទាំងនេះឡើងវិញនៅឡើយទេ បើទោះបីជាអឺរ៉ុបបានទុកពេលឱ្យរដ្ឋាភិបាលកែប្រែស្ថានភាពទាំងនេះយ៉ាងណាក្តីនោះ។
កាលពីថ្ងៃទី១មិថុនា លោកហ៊ុន សែន បានប្រកាសពីខេត្តព្រះសីហនុថាគិតត្រឹមថ្ងៃទី២៩ ឧសភាឆ្នាំ២០២០ រោងចក្រកាត់ដេរ និងសហគ្រាសក្នុងវិស័យទេសចរណ៍ចំនួន ៤២៥ ទីតាំង បានព្យួរការងារ ដែលប៉ះពាល់កម្មករជាង១៤ម៉ឺននាក់។លោកថា ការព្យួរការងារនៅពេលនេះ ដោយសារគ្មានអ្នកបញ្ជាទិញ ខណៈ បណ្ដាប្រទេសបញ្ជាទិញទាំងនោះ កំពុងរងការរីករាលដាលនៃជំងឺកូវីដ-១៩ ធ្ងន់ធ្ងរ។
យ៉ាងនេះក្តី ប្រមុខរដ្ឋាភិបាលរូបនេះអះអាងថា សម្រាប់កម្មករព្យួរការងារទាំងនោះនឹងទទួលបានប្រាក់ឧបត្ថម្ភចំនួន៧០ដុល្លារ ដោយរដ្ឋចេញ៤០ដុល្លារ វិស័យឯកជនចេញ៣០ដុល្លារ ប៉ុន្តែក្រុមអ្នកតាមដានសង្គមនៅតែមើលឃើញថារដ្ឋាភិបាលមិនទាន់បង្ហាញភាពជាក់លាក់ក្នុងការជួយដល់កម្មករ ព្រមទាំងពលរដ្ឋដែលរងផលប៉ះពាល់ដោយវិបត្តិកូវីដ១៩នៅឡើយទេ៕