លោកហ៊ុន សែន អះអាងថារដ្ឋាភិបាលរបស់លោកនឹងចំណាយថវិការជាតិប្រមាណ២៥លានដុល្លារសហរដ្ឋអាមេរិក ដើម្បីជួយដល់ជីវភាពរស់នៅរបស់ពលរដ្ឋក្រីក្រ និងងាយរងគ្រោះក្នុងអំឡុងពេលវិបត្តិនៃជំងឺកូវីដ១៩។
ថ្លែងក្នុងពិធីពិនិត្យមើលដំណើរការសាងសង់អាកាសយានដ្ឋានអន្តរជាតិភ្នំពេញថ្មី ស្ថិតនៅឃុំព្រែកស្លែង ស្រុកកណ្តាលស្ទឹង ខេត្តកណ្តាល នៅព្រឹកថ្ងៃទី២២ ខែមិថុនា លោក ហ៊ុន សែន មានប្រសាសន៍ថា នៅអំឡុងវិបត្តិជំងឺកូវីដ១៩ រដ្ឋាភិបាលលោកគ្រោងនឹងចំណាយថវិការដ្ឋប្រមាណ ២៥លានដុល្លារជារៀងរាល់ខែ ដើម្បីជួយដល់ពលរដ្ឋជាង ៦០ម៉ឺនគ្រួសារ។លោកបន្តថា ថវិការដែលគ្រោងចំណាយនោះ គឺបានមកពីចំណូលចរន្តរបស់រដ្ឋប្រចាំខែដែលជាចំណូលធម្មតា។ លោកអះអាងថាចំណូលធម្មតានេះ ប្រមូលបានយ៉ាងហោចណាស់៤០០លានដុល្លារក្នុងមួយខែ ហើយត្រូវចំណាយលើប្រាក់បៀវត្សរ៍មន្ត្រីរាជការជាង២០០លានដុល្លារអាមេរិកប៉ុណ្ណោះក្នុងមួយខែ។លោកហ៊ុន សែន លើកឡើងថា ក្រុមអ្នកដែលមានមតិប្រឆាំង មិនត្រូវមើលស្រាលសមត្ថភាពរដ្ឋាភិបាល ពិសេសមិនត្រូវមើលស្រាលសមត្ថភាពរបស់លោកក្នុងការដោះស្រាយបញ្ហាប្រឈមនៃវិបត្តិជាសកលនេះឡើយ ត្បិតគ្មានពលរដ្ឋណាម្នាក់ស្លាប់ដោយការអត់បាយ ហើយ រដ្ឋាភិបាលមិនបានដឹង និងមិនបានដោះស្រាយក្នុងអំឡុងវិបត្តិកូវីដ១៩នោះឡើយ។
កាលពីថ្ងៃទី១២ ខែមិថុនា ឆ្នាំ២០២០ រាជរដ្ឋាភិបាលសម្រេចចេញអនុក្រឹត្យស្តីពីការអនុវត្តកម្មវិធីឧបត្ថម្ភសាច់ប្រាក់ជួយគ្រួសារក្រីក្រ និងជនងាយរងគ្រោះក្នុងអំឡុងពេលវិបត្តិជំងឺកូវីដ១៩។ក្នុងអនុក្រឹត្យនោះ សម្រេចឧបត្ថម្ភជូនពលរដ្ឋក្រីក្រ និងជនងាយរងគ្រោះ នៅរាជធានីភ្នំពេញ និងនៅតាមទីប្រជុំជនមិនមែនរាជធានីភ្នំពេញ សម្រាប់គ្រួសារមានប័ណ្ណសមធម៌ប្រភេទ១ និង២ ឬ ក្រប្រភេទ១ និងប្រភេទ២ នូវទឹកប្រាក់ ១២ម៉ឺនរៀល។ ចំណែកសមាជិកគ្រួសារម្នាក់ៗ រួមទាំងជនងាយរងគ្រោះ ដូចជា កុមារ ជនពិការ អ្នកផ្ទុកមេរោគអេដស៍ និងមនុស្សចាស់អាយុចាប់ពី ៦០ឆ្នាំឡើង រដ្ឋាភិបាលចំណាយថវិកាចន្លោះពី ២ម៉ឺន ៨ពាន់រៀល ទៅ ៥ម៉ឺន ២ពាន់រៀល។ដោយឡែក សម្រាប់ពលរដ្ឋក្រីក្រទាំងពីរប្រភេទ និងជនងាយរងគ្រោះនៅតាមទីជនបទ នឹងទទួលបាន ៨ម៉ឺនរៀលក្នុង១ខែ ហើយសមាជិកគ្រួសារម្នាក់ និងប្រភេទជនងាយរងគ្រោះផ្សេងទៀត នឹងទទួលបានថវិកាចន្លោះពី ១ម៉ឺន ៦ពាន់រៀល ទៅ ២ម៉ឺន ៤ពាន់រៀល។
ទោះបីជាយ៉ាងនេះក្តី លោក ហ៊ុន សែន មិនបានប្រកាសលម្អិតអំពីវិធីអនុវត្ត និងពេលវេលាអនុវត្តកម្មវិធីផ្តល់ប្រាក់ឧបត្ថម្ភដល់ពលរដ្ឋក្រីក្រ និងងាយរងគ្រោះនេះនៅឡើយទេ ដោយលោកថានឹងប្រកាសនៅថ្ងៃទី២៤ ខែមិថុនា។ក្រោយរកឃើញអ្នកជំងឺកូវីដ១៩ នៅកម្ពុជាតាំងពីខែមករា មក គឺរយៈពេលប្រមាណ៦ខែមកហើយ ដែលជំងឺនេះបានបង្កផលប៉ះពាល់ដល់ពលរដ្ឋ ពិសេសធ្វើឱ្យកម្មករ បុគ្គលក្រុមហ៊ុន ទាំងក្នុងប្រព័ន្ធ និងក្រៅប្រព័ន្ធ ព្រមទាំងពលករខ្មែរដែលត្រឡប់មកពីក្រៅប្រទេសពិសេសប្រទេសថៃ រាប់សិបម៉ឺននាក់ កំពុងបាត់បង់ការងារធ្វើ បាត់បង់ប្រាក់ចំណូល និងត្រូវប្រឈមបញ្ហាសងបំណុលធនាគារ ឬ មីក្រូហិរញ្ញវត្ថុថែមទៀតផង។
រីឯវិធានការដោះស្រាយបញ្ហាប្រឈមទាំងនេះ ពីសំណាក់រដ្ឋាភិបាលវិញ ត្រូវបានក្រុមអ្នកឃ្លាំមើល យល់ឃើញថាមិនទាន់មានភាពច្បាស់លាស់ និងចេះតែអូសបន្លាយពេលក្នុងការដោះស្រាយថែមទៀតផង ដែលខុសពីរដ្ឋាភិបាលប្រទេសជិតខាង ជាពិសេសថៃ វៀតណាម និងសិង្ហបុរីជាដើម។ ពួកគេនិយាយថា រដ្ឋាភិបាលនៃប្រទេសទាំងនោះ បានបញ្ចេញកញ្ចប់ថវិការជាតិរាប់សិបពាន់លានដុល្លារ ព្រមទាំងមានកម្មវិធីពិសេសៗ ដើម្បីជួយដល់ពលរដ្ឋរបស់គេ ដូចជាផ្តល់កញ្ចប់ថវិការដល់ពលរដ្ឋក្រីក្រដោយត្រង់ៗ បញ្ចុះឬ មិនយកថ្លៃទឹក ភ្លើង ចែកចាយស្បៀងអាហារជូនពលរដ្ឋនៅតាមមូលដ្ឋាន ក្នុងស្ថានភាពជំងឺកូវីដ១៩នេះ ជាដើម៕