ការផ្លាស់ប្តូរផែនទីខ្នាត១លើ២៥០០០ រវាងកម្ពុជា-វៀតណាមនៅតែជាបញ្ហាចម្រូងចម្រាស់រវាងរដ្ឋាភិបាល និងអ្នកឃ្លាំមើលបញ្ហាព្រំដែន ដែលទាមទារឱ្យមានការបង្ហាញច្បាស់លាស់ ត្បិតជាប្រយោជន៍ជាតិនិងជារឿងប្រវត្តិសាស្ត្រសម្រាប់សម័យកាលនៃការដឹកនាំដោយលោក ហ៊ុន សែន ។
គណៈកម្មាធិការចម្រុះកិច្ចការព្រំដែនកាលពីថ្ងៃទី៤ ខែសីហានេះបានចេញ ប្រកាសច្រានចោលទាំងស្រុងចំពោះក្រុមអ្នករិះគន់ ជុំវិញការចោទប្រកាន់ថា ផែនទីខ្នាង ១លើ២៥ពាន់ (១/២៥ ០០០) ជាផែនទីដែលគូសវាងដោយប្រទេសវៀតណាម។ក្នុងសេចក្តីថ្លែងការណ៍របស់ស្ថាប័នជាតិទទួលបន្ទុករឿងព្រំដែនមួយនេះ បានហៅការរិះគន់រឿងប្តូរឯកសារផែនទីខ្នាត១លើ២៥ពាន់ រវាងភាគីកម្ពុជា-វៀតណាម ថាជាការប្រឌិត និងជាការផ្សព្វផ្សាយនូវព័ត៌មានមិនពិត ក្នុងចេតនាទុច្ចរិត ក្នុងគោលបំណងបំភ័ន្តសាធារណមតិជាតិ និងអន្តរជាតិតែប៉ុណ្ណោះ។
លើសពីនេះ គណៈកម្មាធិការជាតិដដែលហៅក្រុមអ្នករិះគន់ដែលចោទថាការប្តូរឯកសារផែនទីនេះ ធ្វើឱ្យបាត់បង់ទឹកដី និងបណ្ដោយឱ្យមានការរំលោភបំពានទឹកដីពីប្រទេសវៀតណាម បានចោទក្រុមអ្នករិះគន់ថា ជាក្រុមឧទ្ទាមក្រៅច្បាប់មានគំនិតពិលពុល។ការលើកឡើងរបស់គណៈកម្មាធិការចម្រុះកិច្ចការព្រំដែននេះ បន្ទាប់ពីចលនានិស្សិតដើម្បីលទ្ធិប្រជាធិបតេយ្យហៅកាត់ថា SMD បានចេញសេចក្តីថ្លែងការណ៍មួយកាលពីថ្ងៃម្សិលមិញ ដោយប្រកាសទាត់ចោលនូវការផែនការដោះដូរផែនទីខ្នាត ១លើ២៥ពាន់ រវាងកម្ពុជា និងវៀតណាម ព្រោះធ្វើឱ្យកម្ពុជាបាត់បង់ទឹកដី និងធ្វើឱ្យវៀតណាមទទួលបានទឹកដីដែលរំលោភបំពានកម្ពុជាកន្លងមកដោយស្របច្បាប់។លើសពីនេះ SMDថា ការដោះដូរផែនទីដោយប្រើមាត្រដ្ឋានខ្នាត ១លើ២៥ពាន់នេះ ជាការដើរផ្ទុយពីរដ្ឋធម្មនុញ្ញកម្ពុជា ត្បិតរដ្ឋធម្មនុញ្ញកម្ពុជាបានកំណត់រួចទៅហើយថាផែនទីដែលតម្កល់ទុក និងទទួលស្គាល់ដោយអង្គការសហប្រជាជាតិគឺផែនទីដែលមានខ្នាត ១លើ១រយ ពាន់ (1/100.000) ដោយមិនអាចរំលោភបំពានបាន។
យ៉ាងនេះក្តី គណៈកម្មាធិការចម្រុះកិច្ចការព្រំដែន បានគូសបញ្ជាក់ថា ការខណ្ឌសីមា និងបោះបង្គោលព្រំដែនគោករវាង កម្ពុជា និងវៀតណាម ជាការងារបច្ចេកទេសកម្រិតខ្ពស់ អនុវត្តដោយក្រុមជំនាញនៃប្រទេសទាំងពីរ ដោយយកគោលការណ៍ខ្សែព្រំដែនមិនកែប្រែ តាមផែនទីផ្លូវការ បោន ខ្នាត ១លើ១រយ ពាន់ បោះពុម្ពដោយ ក្រុមភូមិសាស្ត្រឥណ្ឌូចិន ស្របតាមមាត្រា២ នៃរដ្ឋធម្មនុញ្ញ កម្ពុជា ដែលធានាបាននូវបូរណភាពទឹកដីកម្ពុជា មិនឱ្យបាត់បង់ទឹកដីទៅប្រទេសវៀតណាម ដូចការចោទប្រកាន់ក្នុងសេចក្ដី ថ្លែងការណ៍របស់ក្រុមឧទ្ទាមក្រៅច្បាប់ និងគូកននោះឡើយ។
ប្រភពដដែលបន្តថា ខ្សែព្រំដែនដែលមាននៅលើផែនទី ខ្នាត ១លើ២៥ពាន់ មិនត្រឹមត្រូវតាមខ្សែព្រំដែនដូចមាននៅលើផែនទីបោន ខ្នាត ១លើ១រយ ពាន់ បោះពុម្ពដោយក្រុមភូមិសាស្ត្រឥណ្ឌូចិន លើកលែងតែតំបន់មួយចំនួនដែលពលរដ្ឋនៃប្រទេសទាំងពីរ កម្ពុជា-វៀតណាម បាន និងកំពុងរស់នៅដាំដុះ អាស្រ័យផលមិនស្របតាមខ្សែព្រំដែនផែនទីបោន ខ្នាត ១លើ១រយ ពាន់ តែប៉ុណ្ណោះ។
ម៉្យាងវិញទៀត ដើម្បីរក្សាទុកដីទាំងនោះជូនពលរដ្ឋ រដ្ឋាភិបាលនៃប្រទេសទាំងពីរ កម្ពុជា និងវៀតណាម បានព្រមព្រៀងគ្នារក្សាទុកដីទាំងនោះជូនពលរដ្ឋឱ្យបន្តរស់នៅ និងកាន់កាប់ជាបន្តទៀត ដោយយកគោលការណ៍ ដោះដូរដីដោយ ឈរលើស្មារតីគោរពផលប្រយោជន៍គ្នាទៅវិញទៅមក និងសុខដុមរមនារបស់ពលរដ្ឋនៅតាមតំបន់ព្រំដែននៃប្រទេសទាំងពីរ។
រដ្ឋាភិបាលកម្ពុជាអះអាងថា ផែនទីព្រំដែន ខ្នាត ១លើ២៥ពាន់ ត្រូវបានធ្វើឡើងដោយកម្ពុជា និងវៀតណាម ដែលត្រូវបានគណៈកម្មការចម្រុះខណ្ឌសីមា និងបោះបង្គោលព្រំដែនគោកនៃប្រទេសទាំងពីរ ប្រគល់ឱ្យប្រទេសទី៣ ជាអ្នកបោះពុម្ព គឺក្រុមហ៊ុន BLOMINFO A/S នៃប្រទេសដាណឺម៉ាក បន្ទាប់ពីការប្រកាសដេញថ្លៃជាអន្តរជាតិ តាមកិច្ចព្រមព្រៀងចុះថ្ងៃទី១៣ ខែមករា ឆ្នាំ២០១១។
ក្រោយមកត្រូវបានផ្ទេរបន្តទៅឱ្យក្រុមហ៊ុន NIRAS Mapping A/S ប្រទេសដាណឺម៉ាក ដូចមាននៅក្នុង លិខិតប្រគល់សិទ្ធិ ចុះថ្ងៃទី៣០ ខែឧសភា ឆ្នាំ២០១៣។ ផែនទីខ្នាត ១លើ២៥ ពាន់ ជាផែនទីបង្ហាញពីលទ្ធផលប្រមាណជា ៨៤% ដែលកម្ពុជា និងវៀតណាមសម្រេចបានលើការងារបោះបង្គោលព្រំដែន និងជាផែនទីដែលផលិតឡើងតាមរយៈការថតរូបភាពពីលើអាកាស តាមបែបបច្ចេកវិទ្យាថ្មីទំនើប មានភាពជាក់លាស់ ដែលបង្ហាញយ៉ាង ច្បាស់នូវទីតាំងបង្គោលព្រំដែន និងខ្សែព្រំដែន ដែលមានទាំងនិយាមកា និងឋានលេខាជាក់លាក់។
ទោះបីជាយ៉ាងនេះក្តី អនុប្រធានសមាជិកក្រុមប្រឹក្សាភិបាលនៃចលនានិស្សិតដើម្បីលទ្ធិប្រជាធិបតេយ្យលោក គឹម សុខ ឆ្លើយតបថា SMD មិនមែនជាក្រុមឧទ្ទាមក្រៅច្បាប់អ្វីនោះទេ ប៉ុន្តែជាក្រុមបញ្ញវន្តខ្មែរដែលតែងតែឈឺឆ្អើលអំពីបញ្ហាព្រំដែនជាតិខ្មែរ និងធ្វើពលិកម្មដើម្បីរួមចំណែកការពារទឹកដីកម្ពុជាក្នុងនាមកាតព្វកិច្ចជាពលរដ្ឋល្អរស់នៅក្នុងសង្គមកម្ពុជា។លោកបន្តថា SMD ធ្វើការងារតាមគោលការណ៍ច្បាប់ដោយជមរុញឱ្យភាគីពាក់ព័ន្ធទាំងរដ្ឋាភិបាលកម្ពុជា និងប្រទេសជិតខាង ត្រូវគោរពតាមច្បាប់អន្តរជាតិក្នុងការដោះស្រាយបញ្ហាព្រំដែន ដូចជាអនុសញ្ញាអង្គការសហប្រជាជាតិស្តីពីច្បាប់សមុទ្រ ឆ្នាំ១៩៨២ និងកិច្ចព្រមព្រៀងសន្តិភាពទីក្រុងប៉ារីសឆ្នាំ១៩៩១ ព្រមទាំងផែនទីគោលរបស់កម្ពុជាដែលតម្កល់នៅអង្គការសហប្រជាជាតិជាតិ។
លោក គឹម សុខ បន្តថារដ្ឋាភិបាលលោកហ៊ុន សែន មិនត្រូវបម្លែងមាត្រដ្ឋានផែនទី ទៅជាខ្នាង១លើ២៥ពាន់ ជាមួយវៀតណាមដោយស្ងាត់ៗ ហើយថែមទាំងចេញបកស្រាយបោកប្រាស់ពលរដ្ឋនោះឡើយ។ លោកបន្តថា ប្រសិនបើរដ្ឋាភិបាលអះអាងថាខ្លួនពិតជាធ្វើការងារនេះដោយត្រឹមត្រូវមែននោះ គឺមិនមានហេតុផលណាត្រូលាក់បាំង និងបង្ក្រាបទៅលើសំឡេងអ្នករិះគន់រឿងព្រំដែនឥតឈប់ឈរនោះឡើយ។បន្ថែមពីនេះ លោកថា រដ្ឋាភិបាលត្រូវបង្ហាញការពិតអំពីការដោះដូរផែនទីដោយបម្លែងខ្នាត១លើ២៥ពាន់នេះ ឱ្យបានច្បាស់លាស់ និងមានតម្លាភាព ត្បិតមានរឿងលាក់បាំងជាច្រើនដែលរដ្ឋាភិបាលមិនបានបង្ហាញ ដូចជាថាតើការបម្លែងខ្នាតផែនទីនោះ មានក្រុមអ្នកជំនាញអន្តរជាតិចូលរួមឬអត់? ហើយផែនទីបម្លែងនេះពិតជាបម្លែងចេញពីផែនទីដែលតម្កល់នៅអង្គការសហប្រជាជាតិពិតដែរឬទេ? ការបោះពុម្ភនៅប្រទេសដាណឺម៉ាក់ ដោយមានក្រុមហ៊ុនដេញថ្លៃ ហេតុអ្វីបានជាគ្មានការផ្សព្វផ្សាយឱ្យពលរដ្ឋបានដឹងកន្លងមកនេះ?ប្រភពដដែលបន្ថែមថា គោលការណ៍ដោះដូរដីមួយស្មើមួយ ដែលធ្វើឡើងកន្លងមករវាងភាគីទាំងពីរគឺជារឿងស្ងាត់ដ៏ចម្លែកបំផុត ព្រោះ នៅពេលរដ្ឋាភិបាលនិយាយដល់ការដោះដូរដីភូមិពេលណា គឺពេលនោះហើយតែងឃើញពលរដ្ឋខ្មែរនៅតាមព្រំដែន ស្រែកយំបាត់ដីស្រែចំការរបស់គាត់ ព្រមទាំងលើកឡើងពីការទន្ទ្រានយកពីសំណាក់កងទ័ព វៀតណាមឥតល្ហែរ។
ដោយឡែករដ្ឋាភិបាលវិញ ក៏មិនបានធ្វើរបាយការណ៍ត្រឹមត្រូវប្រាប់ពលរដ្ឋកម្ពុជា ថាតើភូមិក្នុងទឹកដីវៀតណាមណាខ្លះ ដែលប្រទេស កម្ពុជាទទួលបានពីការដោះដូរនោះ ប៉ុន្តែរឿងទាំងអស់នេះនៅតែស្ថិតនៅក្នុងភាពលាក់បាំងរហូតមកទល់ពេលនេះ។វិវាទព្រំដែនកម្ពុជា-វៀតណាម នៅពេលនេះ ខណៈរដ្ឋាភិបាលកម្ពុជាដឹកនាំដោយគណបក្សតែមួយ និងជាគណបក្សដែលត្រូវបានវៀត ណាមលើកបណ្តុបឱ្យឡើងកាន់អំណាចពីអតីតកាលគឺគណបក្សប្រជាជនកម្ពុជា។ ជាមួយគ្នានេះដែរ ការជំរុញឱ្យមានសន្ធិសញ្ញាបំពេញបន្ថែមកាលពីឆ្នាំ២០១៩ ដោយទទួលស្គាល់ការបោះបង្គោលខណ្ឌសីមាសម្រេចបាន៨៤% រវាងរដ្ឋាភិបាលទាំងពីរ ន