គណៈកម្មាធិការជាតិប្រឆាំងនឹងអំពើធ្វើទារុណកម្មនៃក្រសួងមហាផ្ទៃ រកឃើញថា បុរសម្នាក់ដែលស្លាប់នៅស្រុកសង្កែ ខេត្តបាត់ដំបង កាលពីថ្ងៃទី៣ ខែមេសា ឆ្នាំ២០២១ គឺបណ្ដាលមកពីការធ្វើទារុណកម្មធ្ងន់ធ្ងរ។
កាលពីថ្ងៃទី៧ ខែមេសា ឆ្នាំ២០២១ សាច់ញាតិសពឈ្មោះ ពេជ្រ ធារ៉េត បានដាក់ពាក្យបណ្ដឹងទៅក្រសួងមហាផ្ទៃ ដើម្បីស្នើសុំឱ្យបើកការស៊ើបអង្កេតឡើងវិញលើករណីប្អូនប្រុសរបស់ខ្លួន ដោយថាការស្លាប់របស់ប្អូនប្រុសខ្លួនបណ្ដាលមកពីការធ្វើទារុណកម្ម មិនមែនដោយសារគាំងបេះដូងដូចក្នុងកំណត់ហេតុរបស់សមត្ថកិច្ចឡើយ។
ក្នុងពាក្យបណ្ដឹងដែលសាច់ញាតិបានដាក់ទៅក្រសួង បញ្ជាក់ថា ការស្លាប់របស់ជនរងគ្រោះក្រោយពីសមត្ថកិច្ចចាប់ និងបញ្ជូនខ្លួនទៅអធិការស្រុកសង្កែ ដើម្បីធ្វើការសាកសួរ ហើយរយៈពេល ៣ម៉ោងក្រោយមក ជនរងគ្រោះក៏បានស្លាប់ ដោយនៅលើខ្លួនរបស់សាកសពមានស្នាមជាំពេញខ្លួន ហូរឈាមតាមច្រមុះ ត្រចៀក និងស្នាមនៅផ្នែកខាងខ្នង រួមទាំងកន្លែងដាក់ខ្នោះដៃ ជាដើម។
របាយការណ៍ស៊ើបអង្កេតរបស់គណៈកម្មាធិការជាតិប្រឆាំងនឹងការធ្វើទារុណកម្មនៃក្រសួងមហាផ្ទៃ ចេញផ្សាយកាលពីថ្ងៃទី១៦ ខែមិថុនា ឆ្នាំ២០២១ ហើយដែល The Cambodia Daily ទើបទទួលបាន ឱ្យដឹងថា បន្ទាប់ពីចុះអង្កេត ស្រាវជ្រាវ សម្ភាស និងពិនិត្យលើឯកសារនោះ ក្រុមការងារគណៈកម្មាធិការនេះរកឃើញរបាយការណ៍ និងកំណត់ហេតុមួយចំនួនពាក់ព័ន្ធនឹងការស្លាប់របស់ឈ្មោះ ពេជ្រ ធារ៉េត មានភាពមិនប្រក្រតី។
ភាពមិនប្រក្រតីមួយចំនួនដែលគណៈកម្មាធិការនោះរកឃើញ គឺការបកស្រាយរបស់មន្ត្រីនៃអធិការដ្ឋាននគរបាលស្រុកសង្កែ មានភាពមិនច្បាស់លាស់ ដោយលើកឡើងថា ពេលឃាត់ខ្លួនឈ្មោះ ពេជ្រ ធារ៉េត មានពលរដ្ឋប្រតាយប្រតប់គ្នា ប៉ុន្តែបើតាមមេប៉ុស្តិ៍នគរបាលឃុំអូរដំបង១ ដែលជាអ្នកឃាត់ខ្លួនឈ្មោះ ពេជ្រ ធារ៉េត បញ្ជាក់ថាពេលឃាត់ខ្លួនឈ្មោះ ពេជ្រ ធារ៉េត ពុំមានរបួសស្នាម ឬត្រូវពលរដ្ឋវាយដំឡើយ ហើយរូបថតពេលឃាត់ខ្លួននៅកន្លែងកើតហេតុ ក៏មិនមានរបួសស្នាមដែរ។
លើសពីនេះទៀត តាមការបំភ្លឺរបស់មន្ត្រីស្នងការដ្ឋាននគរបាលខេត្តបាត់ដំបង ក៏មានភាពមិនច្បាស់ ដោយថាស្លាកស្នាមនៅលើខ្លួនសពបណ្ដាលមកពីគ្រោះថ្នាក់ចរាចរណ៍ ប៉ុន្តែនៅពេលក្រុមការងារចុះដល់អធិការស្រុកសង្កែ នោះ ម៉ូតូជនសង្ស័យឈ្មោះ ពេជ្រ ធារ៉េត មានសភាពធម្មតា មិនមានអ្វីគួរឱ្យកត់សម្គាល់ឡើយ ខណៈកំណត់ហេតុអធិការស្រុកសង្កែ មានការកោសលុបបន្ថែមការសរសេរ និងមានការសរសេរឈ្មោះឱ្យជនសង្ស័យ ដោយបញ្ជាក់ថា សាមីខ្លួនពុំចេះអក្សរ។
គណៈកម្មាធិការជាតិប្រឆាំងការធ្វើទារុណកម្មដដែល ថារបាយការណ៍ស្នងការនគរបាលខេត្ត និងកំណត់ហេតុអធិការស្រុកសង្កែ បានអះអាងផ្ទុយពីក្រុមគ្រួសារ ដែលបញ្ជាក់ថាជនសង្ស័យដែលស្លាប់រៀនបានថ្នាក់ទី៥ ខណៈសាវតាររបស់ជនសង្ស័យដែលគណៈកម្មាធិការជាតិប្រឆាំងការធ្វើទារុណ ស្រាវជ្រាវនោះ គឺជនរងគ្រោះរៀនបានថ្នាក់ទី៧។
មួយវិញទៀត បើទោះបីជាគណៈកម្មការកោសល្យវិច័យបង្ហាញរបាយការណ៍ថា ជនសង្ស័យស្លាប់ដោយគាំងបេះដូងដែលបណ្ដាលមកពីការប្រើប្រាស់គ្រឿងញៀនហួសកម្រិតក៏ដោយ ប៉ុន្តែអំឡុងពេលឃាត់ខ្លួនជនសង្ស័យ សមត្ថកិច្ចមិនបានធ្វើតេស្ដរកសារធាតុញៀនឡើយ។
គណៈកម្មាធិការជាតិប្រឆាំងការធ្វើទារុណកម្ម បង្ហាញការសោកស្ដាយដែលមិនបានពិនិត្យសាកសពផ្ទាល់ ដោយសារសពត្រូវបានយកទៅបូជា ដោយបន្សល់ទុកត្រឹមស្លាកស្នាមលើខ្លួនជនរងគ្រោះតាមរយៈរូបថត និងវីដេអូដែលចែករំលែកលើបណ្ដាញសង្គម រួមទាំងសារព័ត៌មានប៉ុណ្ណោះ។
ក្រោយពីចុះអង្កេត ស្រាវជ្រាវ ផ្អែកតាមព័ត៌មាន និងកំណត់ហេតុសម្ភាសនោះ គណៈកម្មាធិការជាតិប្រឆាំងការធ្វើទារុណកម្ម បានរកឃើញថា ជនសង្ស័យឈ្មោះ ពេជ្រ ធារ៉េត បានស្លាប់ដោយការធ្វើទារុណកម្មអំឡុងពេលឃុំខ្លួននៅអធិការស្រុកសង្កែ។
បើតាមពាក្យបណ្ដឹងរបស់សាច់ញាតិ ឱ្យដឹងថា ជនរងគ្រោះឈ្មោះ ពេជ្រ ធារ៉េត មានអាយុ ៣១ឆ្នាំ មានមុខរបរជាជាងផ្សារដែក រស់នៅភូមិបោះពោធិ៍ ឃុំអូរដំបង១ ស្រុកសង្កែ ខេត្តបាត់ដំបង បានស្លាប់កាលពីថ្ងៃទី៣ ខែមេសា ឆ្នាំ២០២១ ខណៈសមត្ថកិច្ចបាននាំគាត់ទៅសាកសួរបន្ទាប់ពីម្ដាយក្មេកប្ដឹងទៅសមត្ថកិច្ច ដោយចោទប្រកាន់ថាជនរងគ្រោះរូបនេះបានសម្លាប់ភរិយាខ្លួនឯង។
ករណីនេះ គណៈកម្មាធិការជាតិប្រឆាំងការធ្វើទារុណកម្ម ស្នើឱ្យអគ្គស្នងការដ្ឋាននគរបាលជាតិ បើកការស៊ើបអង្កេតបន្ថែមដើម្បីស្វែងរកការពិត និងនាំខ្លួនជនដែលបានធ្វើទារុណកម្មលើឈ្មោះ ពេជ្រ ធារ៉េត រហូតដល់ស្លាប់នោះ មកផ្ដន្ទាទោសតាមផ្លូវច្បាប់។
ការទាមទារឱ្យចាត់វិធានការច្បាប់ទៅលើមន្ត្រីដែលធ្វើទារុណកម្មលើជនសង្ស័យឈ្មោះ ពេជ្រ ធារ៉េត ដោយគណៈកម្មាធិការជាតិប្រឆាំងការធ្វើទារុណកម្ម អះអាងថា ដើម្បីលើកកម្ពស់ បង្ការ ទប់ស្កាត់ ប្រឆាំងនឹងការធ្វើទារុណកម្ម អំពើឃោរឃៅ អំពើអមនុស្សធម៌ អំពើធ្វើទុក្ខបុកម្នេញ ឬទណ្ឌកម្មលើជនដែលបាន ឬអាចត្រូវបានដកហូតសិទ្ធិសេរីភាព ដោយប្រាសចាកពីស្មារតីរដ្ឋធម្មនុញ្ញកម្ពុជា និងអនុសញ្ញាប្រឆាំងទារុណកម្មច្បាប់ជាតិ និងអន្តរជាតិ រួមទាំងលិខិតបទដ្ឋានពាក់ព័ន្ធនានាដែលមានជាធរមាន៕