ទីបំផុត បុរសខ្លាំងគឺប្រធានាធិបតីហ្វីលីពីន លោក Rodrigo Duterte បានសម្រេចស្ដារឡើងវិញទាំងស្រុងនូវកិច្ចព្រមព្រៀងទស្សនកិច្ចយោធា the Visiting Forces Agreement ឬហៅថា VFA ជាមួយសហរដ្ឋអាមេរិក។
បណ្ដាញផ្សាយព័ត៌មានទូរទស្សន៍ CNN បានហៅជំហររបស់ប្រធានាធិបតី Rodrigo Duterte ថាជាជំហានវិជ្ជមានមួយធ្វើឲ្យសហរដ្ឋអាមេរិកងាយស្រួលក្នុងការចូលជួយកងទ័ពហ្វីលីពីន ក្រោមលក្ខខណ្ឌធ្វើសមយុទ្ធសំដៅពង្រឹងសមត្ថភាពរវាងកងទ័ពនៃប្រទេសទាំង២។
តាមប្រភពសារព័ត៌មានរបស់អាមេរិកនេះឲ្យដឹងថា កិច្ចព្រមព្រៀងពង្រឹងវិស័យយោធាជាថ្មីនេះ គឺជាសញ្ញាប្រាប់ទៅប្រទេសចិន ថាសម្ពន្ធភាពអាយុ ៧០ឆ្នាំមកនេះរវាងក្រុងម៉ានីល និងក្រុងវ៉ាស៊ីនតោន ចាប់ផ្ដើមរឹងមាំឡើងវិញហើយ។
សេចក្ដីសម្រេចរបស់ប្រធានាធិបតីហ្វីលីពីន ដែលធ្វើឱ្យកិច្ចព្រមព្រៀង VFA ចាប់ផ្ដើមចូលជាធរមានឡើងវិញនេះ គឺធ្វើឡើងក្នុងជំនួបរវាងលោក Lloyd Austin រដ្ឋមន្ត្រីការពារជាតិរបស់សហរដ្ឋអាមេរិក និងលោក Rodrigo Duterte នៅចំពោះមុខរដ្ឋមន្ត្រីការពារជាតិហ្វីលីពីន លោក Delfin Lorenzana និងរដ្ឋមន្ត្រីការបរទេសហ្វីលីពីន លោក Teodoro Locsin។
រដ្ឋមន្ត្រីទាំង២រូបនេះ ត្រូវបានមើលឃើញថា ជាអ្នកខិតខំជាខ្លាំងបញ្ចុះបញ្ចូលលោកប្រធានាធិបតី Rodrigo Duterte កុំឱ្យលុបចោលនូវកិច្ចព្រមព្រៀងនេះជាមួយសហរដ្ឋអាមេរិក ដែលពួកគាត់ថាវាមានសារសំខាន់ណាស់ក្នុងការជួយហ្វីលីពីនប្រឈមមុខនឹងចិន ករណីជម្លោះសមុទ្រចិនខាងត្បូង ក្រោមអន្តរាគមន៍របស់សហរដ្ឋអាមេរិក។
កិច្ចព្រមព្រៀង VFA នេះ ត្រូវបានចុះហត្ថលេខានៅឆ្នាំ១៩៨៨ និងចូលជាធរមានតាំងពីពេលនោះមក។ កិច្ចព្រមព្រៀងនេះផ្ដល់ឲ្យសហរដ្ឋអាមេរិកនាំនាវាចម្បាំង កងទ័ពអាកាស កងទ័ពជើងគោកជើងទឹកចូលមកក្នុងទឹកដីហ្វីលីពីន ដើម្បីបោះទីតាំងបណ្ដោះអាសន្ន និងធ្វើលំហាត់សមយុទ្ធជាមួយកងទ័ពហ្វីលីពីន ហើយកិច្ចព្រមព្រៀងនេះក៏បានផ្ដល់ឱ្យអាមេរិកអាចលក់សព្វាវុធ ការដោះដូរព័ត៌មានសម្ងាត់ កិច្ចសហប្រតិបត្តិការផ្នែកយោធាជាមួយហ្វីលីពីន។
ប៉ុន្តែកិច្ចព្រមព្រៀងនេះ ត្រូវបានព្យួរចោលនៅក្រោមរដ្ឋការរបស់លោក Rodrigo Duterte ដែលបុរសនេះបានចូលកាន់តំណែងនៅពាក់កណ្ដាលឆ្នាំ២០១៦។ បុរសខ្លាំងនេះគំរាមលុបចោលកិច្ចព្រមព្រៀងនេះ ដោយប្រកាសមិនឲ្យកងទ័ពអាមេរិកមាននៅលើទឹកដីហ្វីលីពីនឡើយ។ នៅពេលលោកគំរាមដូចនេះ លោក Rodrigo Duterte ក៏ងាកខ្លួនបែរខ្នងដាក់អាមេរិក ហើយទៅចាប់ដៃជាមួយចិន។
ការពិត ទាំងអាមេរិក និងហ្វីលីពីន មានកតិកាសញ្ញាយោធារួមគ្នាតាំងពីឆ្នាំ១៩៥១ ប៉ុន្តែមេដឹកនាំហ្វីលីពីនជំនាន់ក្រោយៗបានបង្កើតកិច្ចព្រមព្រៀង VFA មួយបន្ថែមទៀត ដែលមើលឃើញថាជាការកាត់បន្ថយនូវការផ្ដល់សិទ្ធិទៅឲ្យសហរដ្ឋអាមេរិក។
ក្រុមអ្នកសង្កេតការណ៍អះអាងថា នេះជាការបោះជំហានថ្មីមួយឆ្ពោះទៅរកការពង្រឹងទំនាក់ទំនងរវាងសម្ពន្ធមិត្តទាំងពីរសាជាថ្មី គឺរដ្ឋមន្ត្រីការពារជាតិអាមេរិក លោក Lloyd Austin ដែលធ្វើទស្សនកិច្ចនៅក្រុងម៉ានីល បានបង្ហាញការសាទរ និងស្វាគមន៍ជាខ្លាំងចំពោះការកែប្រែជំហរវិជ្ជមានឡើងវិញរបស់លោក Rodrigo Duterte។
រដ្ឋមន្ត្រីការពារជាតិហ្វីលីពីន លោក Delfin Lorenzana បានប្រកាសអំពីការសម្រេចចិត្តរបស់លោក Rodrigo Duterte ដែលកែប្រែជំហរដ៏សំខាន់នេះនៅក្នុងសន្និសីទសារព័ត៌មានរួមមួយនៅថ្ងៃសុក្រ ទី៣០ ខែកក្កដា នេះ។ ជាមួយគ្នានេះ រដ្ឋមន្ត្រីការបរទេសហ្វីលីពីន លោក Teodoro Locsin បានប្រគល់ឯកសារនៃកិច្ចព្រមព្រៀងនេះទៅឱ្យលោក Austin។
តែយ៉ាងណាក៏ដោយ បុរសខ្លាំងហ្វីលីពីន Rodrigo Duterte បានទទួលរងការរិះគន់ជាខ្លាំងពីអ្នកនយោបាយ និងពលរដ្ឋហ្វីលីពីន លើសម្ដីរបស់លោកដែលចាត់ទុកសាលក្រមមជ្ឈត្តការអន្តរជាតិរបស់អង្គការសហប្រជាជាតិនៅឆ្នាំ២០១៦ ថាមានតម្លៃស្មើនឹងក្រដាសអនាម័យ ទោះជាសាលក្រមនេះកាត់ក្ដីឱ្យហ្វីលីពីន ឈ្នះក្ដីលើប្រទេសចិនក៏ដោយក្នុងជម្លោះមួយផ្នែកនៃដែនសមុទ្រចិនខាងត្បូង។
មិនតែប៉ុណ្ណោះ លោក Rodrigo Duterte ព្រមានមិនឱ្យកងទ័ពហ្វីលីពីន ត្រៀមដើម្បីធ្វើសង្គ្រាមសមុទ្រជាមួយប្រទេសចិននោះទេ។ លោកថា បើមានសង្គ្រាមមែននោះ គឺមានតែចាញ់ចិនប៉ុណ្ណោះ ហើយស្លាប់មនុស្សយ៉ាងរង្គាលទៀតផង។
ពលរដ្ឋហ្វីលីពីនមួយចំនួនហៅលោក Rodrigo Duterte ជាមេដឹកនាំកំសាក គឺបានតែបាញ់សម្លាប់ពលរដ្ឋខ្លួនឯងយ៉ាងរង្គាលនៅក្នុងសង្គ្រាមប្រឆាំងគ្រឿងញៀនដែលលោកជាអ្នកចេញបញ្ជាផ្ទាល់។
អតីតរដ្ឋមន្ត្រីការបរទេសជំនាន់ប្រធានាធិបតី នីណយ អាគ្កីណូ បានហៅជំហររបស់លោក Rodrigo Duterte ចំពោះប្រទេសចិន ថាជាមេដឹកនាំកំសាក ហើយជាមេដឹកនាំហ្វីលីពីនម្នាក់គត់បានលក់ឧត្តមគតិជាតិ និងអធិបតេយ្យជាតិទៅឱ្យប្រទេសចិន ជាពិសេសទៅឱ្យប្រធានាធិបតី ស៊ី ជីនពីង៕