ប្រធានាធិបតីហ្វីលីពីន លោក រ៉ូឌ្រីហ្គោ ឌូទើតេ (Rodrigo Duterte) ទើបតែបានយល់ព្រមឈរឈ្មោះជាបេក្ខជនអនុប្រធានាធិបតីសម្រាប់គណបក្សកាន់អំណាចរបស់លោក នៅក្នុងការបោះឆ្នោតនាឆ្នាំ២០២២ ខាងមុខ។
ទីភ្នាក់ងារសារព័ត៌មាន Reuters កាលពីថ្ងៃអង្គារ ទី២៤ សីហា បានចុះផ្សាយថា គណបក្ស PDP-Laban បានប្រកាសអំពីដំណឹងនេះ គឺនៅមុនសមាជជាតិរបស់បក្សនេះដែលត្រូវធ្វើឡើងនៅថ្ងៃទី០៨ ខែកញ្ញា ឆ្នាំ២០២១ ជាពេលដែលគេរំពឹងថា បក្សកាន់អំណាចនេះនឹងប្រកាសពីការគាំទ្រឲ្យលោក Christopher Bong Go ឈរឈ្មោះជាបេក្ខជនប្រធានាធិបតីសម្រាប់ការបោះឆ្នោតឆ្នាំ២០២២ ហើយពេលនេះក៏ជាការប្រកាសបេក្ខភាពអនុប្រធានាធិបតីសម្រាប់លោក ឌូទើតេ ផងដែរ។
លោក Bong Go គឺជាអតីតជំនួយការពិសេសរបស់លោក ឌូទើតេ ហើយបច្ចុប្បន្នបុរសនេះគឺជាសមាជិកព្រឹទ្ធសភាហ្វីលីពីនផងដែរ។
បើតាមរដ្ឋធម្មនុញ្ញរបស់ប្រទេសហ្វីលីពីន គឺប្រធានាធិបតីត្រូវបានកំណត់ឲ្យកាន់អំណាចបានត្រឹមមួយអាណត្តិប៉ុណ្ណោះ ប៉ុន្តែមួយអាណត្តិគឺមានរយៈពេល ៦ឆ្នាំ។ អាណត្តិរបស់លោក ឌូទើតេ នឹងត្រូវផុតនៅខែមិថុនា ឆ្នាំ២០២២។
ទោះជាយ៉ាងនេះក្តី ការត្រៀមឈរឈ្មោះជាអនុប្រធានាធិបតីរបស់លោក ឌូទើតេ នៅក្នុងការបោះឆ្នោតឆ្នាំក្រោយនេះ ត្រូវបានក្រុមអ្នកតាមដានស្ថានការណ៍នយោបាយយល់ឃើញថា គឺជាមធ្យោបាយមួយដើម្បីឲ្យលោក ឌូទើតេ អាចនៅបន្តកាន់អំណាចពីក្រោយខ្នងប្រធានាធិបតីជាប់ឆ្នោត។
កាលពីពេលថ្មីៗនេះ ការស្ទង់មតិមួយបានបង្ហាញថា លោក ឌូទើតេ គឺជាប្រធានាធិបតីនៅតែមានប្រជាប្រិយសម្រាប់ប្រជាជនហ្វីលីពីន។ ប៉ុន្តែអ្នកសង្កេតការណ៍មើលឃើញថា បុរសខ្លាំងរូបនេះដែលព្យាយាមក្រាញអំណាច គឺពុំមានអ្វីចម្លែកនោះទេ ព្រោះបុរសនេះធ្លាប់បានប្រឆាំងនឹងក្រុមរដ្ឋអាជ្ញានៅតុលាការព្រហ្មទណ្ឌអន្តរជាតិ ICC ជាច្រើនដងហើយ។ លោកសច្ចាថានឹងមិនទៅកាន់តុលាការអន្តរជាតិមួយនេះទេ បើទោះជាតុលាការនេះហុចដីកាដល់មុខផ្ទះលោកក៏ដោយ។
លោកបញ្ជាក់ថា លោកបានដកហ្វីលីពីនចេញពីសមាជិកភាពនៃសន្ធិសញ្ញាក្រុងរ៉ូម ហើយ ដូច្នេះហ្វីលីពីន លែងក្លាយជាសមាជិករបស់ក្រុងរ៉ូម ទៀតហើយ ដែលលោកថាតុលាការព្រហ្មទណ្ឌអន្តរជាតិ ICC ពុំមានបុព្វសិទ្ធិអំណាច ឬយុត្តាធិការមកលើដែនអធិបតេយ្យប្រទេសហ្វីលីពីន ឡើយ។
ប៉ុន្តែលោកស្បថថា បើលោកជ្រុលទៅកាន់តុលាការតាមការកោះហៅ គឺរូបលោកនឹងបាញ់សម្លាប់ខ្លួនដោយការធ្វើអត្តឃាត។
បុរសខ្លាំងហ្វីលីពីនរូបនេះ គឺជាប្រធានាធិបតីដែលបានចេញបទបញ្ជាបើកយុទ្ធនាការសង្គ្រាមប្រឆាំងគ្រឿងញៀន។ ក្នុងយុទ្ធនាការនេះ មនុស្សយ៉ាងតិចជាង ៥០០០នាក់ត្រូវបានបាញ់ស្លាប់ ដោយពួកគេស្លាប់តាមចិញ្ចើមថ្នល់ និងខ្លះទៀតស្លាប់ក្នុងផ្ទុះ ឬក្នុងទីកន្លែងសម្ងាត់ ដោយការវាយឆ្មក់របស់កងទ័ពសម្អាតគ្រឿងញៀន។
ក្រុមសិទ្ធិមនុស្សជាតិ និងអន្តរជាតិ បានហៅសង្គ្រាមគ្រឿងញៀនរបស់លោក ឌូទើតេ គឺជាអំពើសម្លាប់មនុស្សក្រៅប្រព័ន្ធច្បាប់ដែលរំលោភសិទ្ធិមនុស្សធ្ងន់ធ្ងរ។
ដោយមើលឃើញដូចនេះ ក្រុមសិទ្ធិមនុស្សជាតិ និងអន្តរជាតិ បានកសាងសំណុំរឿងទៅកាន់តុលាការព្រហ្មទណ្ឌអន្តរជាតិ ICC ដោយសម្រេចប្ដឹងបុរសខ្លាំងរូបនេះពីបទសម្លាប់មនុស្សយ៉ាងរង្គាល និងរំលោភសិទ្ធិមនុស្សធ្ងន់ធ្ងរ។
ក្នុងសំណុំឧក្រិដ្ឋកម្មនេះ ក្រុមរដ្ឋអាជ្ញានៃតុលាការ ICC បានប្រកាសឈ្មោះលោក ឌូទើតេ ជាជនត្រូវចោទ ដោយប្រកាសស៊ើបអង្កេត ហើយផ្ដើមចេញដីកាកោះហៅ និងដីកានាំខ្លួន ប៉ុន្តែដោយសារលោក ឌូទើតេ នៅមានអំណាចណែនក្នុងដី គឺបុរសនេះបានបដិសេធមិនចូលខ្លួន ហើយក៏មិនឱ្យក្រុមរដ្ឋអាជ្ញាជាន់ដីហ្វីលីពីន ដាច់ខាត។
អ្នកសង្កេតការណ៍ព្រមានថា នៅសល់តែពេលវេលាប៉ុណ្ណោះដែលនឹងបញ្ជាក់ថា តើបុរសខ្លាំងហ្វីលីពីនរូបនេះមានវាសនាដូចម្ដេចបើខ្លួនអស់អំណាច ដោយមិនបានជាប់ជាអនុប្រធានាធិបតីនៅក្នុងការបោះឆ្នោតឆ្នាំ២០២២ ខាងមុខនេះ៕