នាវាកងទ័ពជើងទឹកនៃប្រទេសអូស្ត្រាលី ប្រចាំតំបន់ឥណ្ឌូប៉ាស៊ីហ្វិក បានធ្វើទស្សនកិច្ចមកកាន់ព្រះរាជាណាចក្រកម្ពុជារយៈពេល ៣ថ្ងៃ ដើម្បីពង្រឹងចំណងសាមគ្គីភាព ចែករំលែកបទពិសោធន៍រវាងកងទ័ពជើងទឹកប្រទេសទាំងពីរកម្ពុជា-អូស្ត្រាលី និងនាំយកសម្ភារៈវេជ្ជសាស្ត្រមួយចំនួនទៀតមកប្រគល់ជូនប្រទេសកម្ពុជា ដើម្បីរួមចំណែកលើការងារប្រយុទ្ធប្រឆាំងជំងឺ Covid-19។
នាវាកងទ័ពជើងទឹកអូស្ត្រាលី ដែលមានឈ្មោះថា HMAS Anzac 150 បានចូលមកដល់កំពង់ផែអន្តរជាតិក្រុងព្រះសីហនុ កាលពីថ្ងៃទី១៨ ខែតុលា ហើយបានចាកចេញពីកំពង់ផែស្វយ័តក្រុងព្រះសីហនុ នៅព្រឹកថ្ងៃទី២០ ខែតុលា ឆ្នាំ២០២១ ក្រោយបញ្ចប់ដំណើរទស្សនកិច្ចរយៈពេល ៣ថ្ងៃនៅក្នុងប្រទេសកម្ពុជា។
លោក អ៊ុក សីហា មេបញ្ជាការរងកងទ័ពជើងទឹក និងជាមេបញ្ជាការមូលដ្ឋានសមុទ្រ មានប្រសាសន៍ថា ជំនួយវេជ្ជសាស្ត្រប្រយុទ្ធប្រឆាំងមេរោគ Covid-19 ដែលប្រទេសអូស្ត្រាលី ប្រគល់ជូនកម្ពុជានេះ គឺមួយចំនួនបានប្រគល់ជូនរដ្ឋបាលខេត្តព្រះសីហនុ អង្គភាពកងទ័ពជើងទឹកមូលដ្ឋានសមុទ្ររាម យោធភូមិភាគទី៤ ទី៥ និងកងទ័ពជើងគោកនៃកងយោធពលខេមរភូមិន្ទកម្ពុជា។
ចំណែកលោក Pablo Kang ឯកអគ្គរដ្ឋទូតអូស្ត្រាលី ប្រចាំកម្ពុជា លើកឡើងដែរថា អូស្ត្រាលី និងកម្ពុជា មានភាពជាដៃគូបន្តយូរអង្វែងកន្លងមក ហើយចំពោះទំនាក់ទំនងការពារជាតិរបស់ប្រទេសទាំងពីរ ក៏មានមូលដ្ឋានយ៉ាងរឹងមាំផងដែរ។ លោកបន្តថា នេះជាលើកដំបូងចាប់តាំងពីឆ្នាំ២០១៦ មក ដែលនាវាកងទ័ពជើងទឹកអូស្ត្រាលី បានចូលសំចតនៅកំពង់ផែក្នុងប្រទេសកម្ពុជា។
លោក Pablo Kang បានបញ្ជាក់ថា ដំណើរទស្សនកិច្ចនេះ គឺដើម្បីបន្តពង្រឹងកិច្ចសហប្រតិបត្តិការរវាងកងទ័ពជើងទឹកប្រទេសទាំងពីរ ព្រមទាំងផ្លាស់ប្ដូរយោបល់អំពីសន្តិភាព និងសន្តិសុខស្ត្រីតាមរយៈសិក្ខាសាលាអនឡាញ ដែលរៀបចំឡើងនៅក្នុងអំឡុងពេលដំណើរទស្សនកិច្ចនេះផងដែរ៕