34 C
Phnom Penh

អាមេរិក​បន្ថែម​ទណ្ឌកម្ម​មួយ​ទៀត​លើ​កម្ពុជា​ចំ​ពេល​កម្ពុជា​ជា​ប្រធាន​អាស៊ាន​នៅ​ឆ្នាំ​២០២២

ដោយ ឌឹ ខេមបូឌា ដេលី

បទវិភាគ

សហរដ្ឋ​អាមេរិក​សម្រេច​ដាក់​ទណ្ឌកម្ម​បន្ថែម​ទៀត​លើ​កម្ពុជា និង​ទៅលើ​មន្ត្រី​ជាន់ខ្ពស់​របស់​រដ្ឋាភិបាល​កម្ពុជា ដែល​ក្នុង​នោះ​មាន​ទាំង​មន្ត្រី​យោធា និង​ទណ្ឌកម្ម​លើ​ការ​ជួញដូរ​អាវុធ​ពី​អាមេរិក​ទៅ​កម្ពុជា​ថែម​ទៀត កាលពី​ថ្ងៃ​ពុធ ទី​៨ ធ្នូ។

ទណ្ឌកម្ម​នេះ ដើម្បី​ជំរុញ​ឲ្យ​កម្ពុជា​ដែល​ត្រូវ​បាន​គេ​ចោទ​ថា​ស្ថិតនៅ​ក្រោម​ឥទ្ធិពល​កងទ័ព​ចិន​នោះ ត្រូវ​ប្រកាន់​ជំហរ​ឯករាជ្យ និង​អព្យាក្រឹត្យ​នៅ​ពេល​កម្ពុជា​ជា​ប្រធាន​នៃ​សមាគម​អាស៊ាន​សម្រាប់​ឆ្នាំ​២០២២។

ក្រសួង​ពាណិជ្ជកម្ម​សហរដ្ឋ​អាមេរិក បាន​ពន្យល់​នៅ​ក្នុង​សេចក្ដី​ប្រកាស​ព័ត៌មាន​របស់​ខ្លួន​ថា ទណ្ឌកម្ម​នេះ​នឹង​រឹតត្បិត​ទៅលើ​ការ​លំហូរ​អាវុធ និង​គ្រឿងបរិក្ខារ​យោធា​ពី​អាមេរិក នៅ​ក្រោម​ការ​ត្រួតពិនិត្យ​របស់​ក្រសួង​ពាណិជ្ជកម្ម និង​វិធាន​ការពារ​ជាតិ​របស់​សហរដ្ឋ​អាមេរិក​ទៅលើ​ប្រទេស​កម្ពុជា និង​មន្ត្រី​កម្ពុជា​ដែល​ពាក់ព័ន្ធ​នឹង​បញ្ហា​រំលោភ​សិទ្ធិមនុស្ស។

អ្នកស្រី Gina Raimondo រដ្ឋមន្ត្រី​ក្រសួង​ពាណិជ្ជកម្ម​អាមេរិក បញ្ជាក់​ថា អាមេរិក​នៅតែ​បន្ត​ការ​ប្ដេជ្ញា​ចិត្ត​គោរព​ចំពោះ​ឯករាជភាព និង​អធិបតេយ្យភាព​របស់​កម្ពុជា។ តែ​អ្នកស្រី​ទទូច​ថា អាមេរិក​ជំរុញ​ឲ្យ​កម្ពុជា​ធ្វើ​ឱ្យ​រីកចម្រើន​ចំពោះ​ការ​ប្រយុទ្ធ​ប្រឆាំង​អំពើពុករលួយ ការ​រំលោភ​សិទ្ធិមនុស្ស និង​កាត់បន្ថយ​ឥទ្ធិពល​របស់​កងទ័ព​ចិន​នៅ​កម្ពុជា ដែល​អ្នកស្រី​ថា​កងទ័ព​ចិន​នៅ​កម្ពុជា គឺជា​ការ​គំរាមកំហែង​ដល់​សន្តិសុខ​តំបន់ និង​ពិភពលោក។

ការ​ដាក់​ទណ្ឌកម្ម​បន្ថែម​របស់​អាមេរិក​មក​លើ​កម្ពុជា​នៅ​ពេលនេះ ធ្វើឡើង​តែ​ពីរ​ខែ​ប៉ុណ្ណោះ​បន្ទាប់ពី​រដ្ឋការ​លោក ចូ បៃដិន បាន​ដាក់​ទណ្ឌកម្ម​ប្រឆាំង​នឹង​មន្ត្រី​យោធា​ជាន់ខ្ពស់​កម្ពុជា​ពីរ​រូប ដោយ​ចោទ​ថា​បាន​ប្រព្រឹត្ត​អំពើពុករលួយ​នៅ​មូលដ្ឋាន​កងទ័ព​ជើងទឹក​រាម ហើយ​ទណ្ឌកម្ម​ជា​ថ្មី​របស់​ប្រទេស​មហាអំណាច​មួយ​នេះ ក៏​ធ្វើឡើង​បន្ទាប់ពី​លោក ហ៊ុន សែន ដែល​ថ្លែង​នៅ​ចំពោះ​មុខ​ឯកអគ្គរដ្ឋទូត​ចិន នៅ​ក្នុង​ពិធី​មួយ​នៅ​ខេត្ត​ព្រៃវែង កាលពី​ថ្ងៃ​ទី​៦ ខែ​ធ្នូ ដែល​លោក​បាន​លើកឡើង​ជា​ថ្មី​ម្ដង​ទៀត​អំពី​ទស្សនកិច្ច​របស់​ក្រុម​សេនានុព័ន្ធ​យោធា​ស្ថានទូត​អាមេរិក ប្រចាំ​នៅ​កម្ពុជា ទៅកាន់​មូលដ្ឋាន​ទ័ព​ជើងទឹក​រាម។

ឧត្តមសេនីយ៍​ផ្កាយ​មាស​បួន និង​ជា​អគ្គនាយក​នៃ​អគ្គនាយកដ្ឋាន​សម្ភារៈ​បច្ចេកទេស ចៅ ភិរុណ និង​ឧត្ដមនាវី​ផ្កាយ​មាស​បួន​ដែល​ជា​មេបញ្ជាការ​កងទ័ព​ជើងទឹក ទៀ វិញ

ក្នុង​ឱកាស​នោះ លោក ហ៊ុន សែន បាន​រិះគន់​ក្រុម​យោធា​អាមេរិកាំង​ទាំងនោះ​ថា​តាំង​ខ្លួន​ជា​ក្រុម​អធិការកិច្ច នៅ​ពេល​ចុះ​ទៅ​មូលដ្ឋាន​ទ័ព​ជើងទឹក​រាម។ លោក​ថា ទង្វើ​បែប​នេះ​មិន​អាច​ទៅ​រួច​ទេ​សម្រាប់​កម្ពុជា គឺ​មិនមែន​ចេះ​តែ​ធ្វើ​តាម​អ្នកឯង​ទេ។ លោក​ថា អស់​លោក​គ្មាន​សិទ្ធិ​ដើរ​តួ​ជា​ក្រុម​អធិការកិច្ច​នោះ​ទេ។

បញ្ហា​មូលដ្ឋាន​ទ័ព​ជើងទឹក​រាម​កម្ពុជា មើល​ទៅ​មិនមែន​មាន​តែ​អាមេរិក​មួយ​ទេ​ដែល​បារម្ភ​អំពី​កម្ពុជា​មាន​វត្តមាន​កងទ័ព​ចិន គឺ​ប្រទេស​ក្នុង​តំបន់​អាស៊ាន​មួយ​ចំនួន ក៏​មាន​ការ​ព្រួយ​បារម្ភ​ផង​ដែរ។ កាលពី​ឆ្នាំ​២០១៩ លោក ហ៊ុន សែន ត្រូវ​បាន​នាយករដ្ឋមន្ត្រី​វៀតណាម ង្វៀន ស៊ុនហ្វុក ចោទ​សួរ​នៅ​ក្នុង​ដំណើរ​ទស្សនកិច្ច​របស់​មេដឹកនាំ​កម្ពុជា​រូប​នេះ​ទៅ​ប្រទេស​វៀតណាម។

លោក ហ៊ុន សែន ដែល​ចេះ​និយាយ​ភាសា​វៀតណាម​យ៉ាង​ស្ទាត់ លោក​បាន​និយាយ​នៅ​ចំពោះ​មុខ​ថ្នាក់​ដឹកនាំ​វៀតណាម​ថា កម្ពុជា​ពុំ​អាច​មាន​វត្តមាន​កងទ័ព​បរទេស​នៅ​លើ​ទឹកដី​របស់​កម្ពុជា​ឡើយ។ លោក​ថា រដ្ឋធម្មនុញ្ញ​កម្ពុជា​បាន​ហាម​ដាច់ខាត។ យ៉ាងណា​ចំពោះ​ទណ្ឌកម្ម​របស់​សហរដ្ឋ​អាមេរិក​មក​លើ​កម្ពុជា បុរស​ខ្លាំង​នៅ​កម្ពុជា​រូប​នេះ​បាន​បញ្ចេញ​ប្រតិកម្ម ដែល​លោក​ថា​លោក​មិន​ខ្វល់​ឡើយ។

នៅ​ក្នុង​ពិធី​មួយ​នៅ​ខេត្ត​កណ្ដាល ព្រឹក​ថ្ងៃ​ទី​០៩ ខែ​ធ្នូ ឆ្នាំ​២០២១ លោក ហ៊ុន សែន បាន​ថ្លែង​ចំអក​ឱ្យ​សហរដ្ឋ​អាមេរិក និង​មន្ត្រី​បក្ស​ក្រុម​ប្រឆាំង​ដែល​ថា​មន្ត្រី​គណបក្ស​ប្រជាជន​កម្ពុជា​នឹង​ស្លន់ស្លោ បើ​ច្បាប់​ដាក់​ទណ្ឌកម្ម​អាមេរិក ឬ​ច្បាប់​ប្រជាធិបតេយ្យ​កម្ពុជា​តាក់តែង​ដោយ​សភា​អាមេរិក ត្រូវ​បាន​អនុម័ត ហើយ​ចូល​ជាធរមាន​មែន​នោះ។ លោក ហ៊ុន សែន បាន​ថ្លែង​ដោយ​ចំអក​ថា សម្រាប់​រូបលោក​ផ្ទាល់ និង​គ្រួសារ​លោក​ផ្ទាល់ មិន​ខ្វល់​ទេ ព្រោះ​គ្មាន​ទ្រព្យសម្បត្តិ​របស់​លោក​នៅ​លើ​ទឹកដី​អាមេរិក​នោះ​ទេ។ លោក​ថា បើ​មន្ត្រី​ណា​មាន​ទ្រព្យសម្បត្តិ ហើយ​ត្រូវ​បាន​គេ​រឹបអូស គឺជា​រឿង​របស់​មន្ត្រី​នោះ។

ប៉ុន្តែ​លោក ហ៊ុន សែន ចំអក​ឱ្យ​អាមេរិក​ថា ប្រជាជន​កម្ពុជា​ខ្លះ​ក៏​មាន​សញ្ជាតិ​អាមេរិក​ផង​ដែរ ហើយ​បើ​ត្រូវ​គេ​រឹបអូស​ទ្រព្យសម្បត្តិ ក៏​ប៉ះពាល់​ដល់​ពលរដ្ឋ​សញ្ជាតិ​អាមេរិក​ដែរ។ ជាមួយ​គ្នា​នេះ លោក​ចំអក​ឱ្យ​ក្រុម​ប្រឆាំង​ដែល​លោក​ថា ក្រុម​ប្រឆាំង​គេ​ចង់​ឱ្យ​ច្បាប់​នេះ​ចេញ​ណាស់ ហើយ​សម្រាប់​រូបលោក​ក៏​បន់​ឱ្យ​តែ​ច្បាប់​នេះ​ឆាប់​ចេញ​ដែរ។

ខ្លឹមសារ​ច្បាប់​ដាក់​ទណ្ឌកម្ម​លើ​បុគ្គល ដែល​គេ​ចាត់ទុក​ថា​ជា​អ្នក​រំលោភ​សិទ្ធិមនុស្ស​ធ្ងន់ធ្ងរ និង​រំលាយ​ប្រជាធិបតេយ្យ​នៅ​កម្ពុជា គឺ​ច្បាប់ H.R.4686។

ច្បាប់​ដែល​ត្រូវ​បាន​សមាជិក​សភា​អាមេរិក​ចំនួន ៤០៣ លើ ៤៣៥​រូប បាន​អនុម័ត​នោះ នឹង​អាច​ដាក់​ទណ្ឌកម្ម​បង្កក​ទ្រព្យសម្បត្តិ​របស់​បុគ្គល​ទាំងនោះ​ដែល​មាន​នៅ​សហរដ្ឋ​អាមេរិក ការ​បិទ​ប្រតិបត្តិការ​ហិរញ្ញវត្ថុ​របស់​បុគ្គល និង​ក្រុមហ៊ុន​របស់​បុគ្គល​ទាំងនោះ និង​បិទ​ទិដ្ឋាការ​មិន​ឱ្យ​ចូល​ទឹកដី​អាមេរិក ជាដើម។

ចំណែក​ឯ​ច្បាប់​លទ្ធិប្រជាធិបតេយ្យ​កម្ពុជា Cambodia Democracy Act កំពុង​ស្ថិត​នៅ​ក្នុង​ដៃ​ព្រឹទ្ធសភា ហើយ​រំពឹង​ថា​នឹង​ត្រូវ​បាន​អនុម័ត​បញ្ជូន​ទៅ​លោក ចូ បៃដិន ក្នុង​ពេល​ឆាប់ៗ​ខាងមុខ​នេះ។ ច្បាប់​នេះ​និយាយ​អំពី​ប្រជាធិបតេយ្យ​នៅ​កម្ពុជា ក្នុង​ដំណាក់កាល​ចុងក្រោយ​ដែល​គណបក្ស​សង្គ្រោះ​ជាតិ​ត្រូវ​បាន​រំលាយ និង​មេដឹកនាំ​បក្ស​ប្រឆាំង​មួយ​នេះ​ត្រូវ​បាន​ចោទប្រកាន់​ពី​បទ​សន្ទិដ្ឋភាព​ជាមួយ​បរទេស។ ច្បាប់​នេះ​ប្រឆាំង​ការ​ធ្វើ​ទុក្ខបុកម្នេញ​ផ្នែក​នយោបាយ​នៅ​កម្ពុជា។

ខណៈ​ដែល​កម្ពុជា នៅ​ឆ្នាំ​២០២២ ជា​ប្រធាន​ប្រជុំ​នៃ​សមាគម​អាស៊ាន ក្រសួង​ការបរទេស​អាមេរិក​បាន​ចេញ​សេចក្ដី​ប្រកាស​ព័ត៌មាន​ដោយ​បាន​ជូនដំណឹង​ថា លោក Derek Chollet កំពុង​ស្ថិត​នៅ​តំបន់​អាស៊ាន គឺ​ចាប់ពី​ថ្ងៃ​ទី​៨ រហូត​ដល់​ថ្ងៃ​ទី​១៣ ខែ​ធ្នូ។ ដំណើរ​ទស្សនកិច្ច​របស់​ទីប្រឹក្សា​របស់​ក្រសួង​ការបរទេស​អាមេរិក​រូប​នេះ នឹង​ត្រូវ​ធ្វើ​ដំណើរ​ទៅកាន់​ប្រទេស​កម្ពុជា និង​ប្រទេស​ឥណ្ឌូនេស៊ី។ ទស្សនកិច្ច​របស់​លោក Derek Chollet ដើម្បី​ជួប​មន្ត្រី​កម្ពុជា និង​មន្ត្រី​ឥណ្ឌូនេស៊ី អំពី​សមត្ថភាព និង​ភាព​អព្យាក្រឹត្យ​របស់​កម្ពុជា​ក្នុង​ឋានៈ​ជា​ប្រធាន​អាស៊ាន​សម្រាប់​ឆ្នាំ​២០២២ ជុំវិញ​ស្ថានភាព​សិទ្ធិមនុស្ស​នៅ​ប្រទេស​កម្ពុជា វិបត្តិ​នៅ​ប្រទេស​ភូមា និង​បញ្ហា​ជម្លោះ​សមុទ្រ​ចិន​ខាងត្បូង។

ជាមួយ​គ្នា​នេះ លោក Derek Chollet ត្រូវ​ពិនិត្យ​ស្ថានភាព​សេរីភាព​អង្គការ​សង្គម​ស៊ីវិល​នៅ​កម្ពុជា។ ចំណែក​នៅ​ប្រទេស​ឥណ្ឌូនេស៊ី លោក Derek នឹង​លើកឡើង​អំពី​ភាព​ជា​ដៃគូ​យុទ្ធសាស្ត្រ​ឥណ្ឌូនេស៊ី-អាមេរិក ហើយ​ក្រោយ​មក លោក​នឹង​ទៅកាន់​ប្រទេស​ម៉ាឡេស៊ី និង​ប្រទេស​ថៃ។

តាមរយៈ​ទស្សនកិច្ច​នេះ លោក Derek Chollet ត្រូវ​បញ្ជាក់​អំពី​ការ​ពង្រឹង​សហប្រតិបត្តិការ​អាមេរិក-អាស៊ាន​ក្នុង​ការ​គាបសង្កត់​របប​សឹក​ភូមា ឱ្យ​បញ្ឈប់​អំពើ​ហិង្សា ការ​ដោះលែង​អ្នក​ជាប់​ឃុំ​ទាំងអស់​ដែល​ពួកគេ​ប្រឆាំង​ពួក​យោធា អនុញ្ញាត​ឱ្យ​ជំនួយ​មនុស្សធម៌​បាន​ទៅ​ដល់​សហគមន៍​ប្រជាជន​ភូមា និង​ចាប់ផ្ដើម​ស្ដារ​ប្រជាធិបតេយ្យ​ឡើងវិញ។

រដ្ឋមន្ត្រី​ការបរទេស​អាមេរិក Antony Blinken

ស្រប​ពេល​គ្នា​នេះ បណ្ដាញ​ផ្សាយ​ព័ត៌មាន​ជប៉ុន​ក្យូដូ បាន​ចុះផ្សាយ​ថា លោក​រដ្ឋមន្ត្រី​ការបរទេស​អាមេរិក លោក Antony Blinken នឹង​ទៅ​ដល់​តំបន់​អាស៊ាន​ផង​ដែរ។ លោក Antony Blinken ក៏​នឹង​ធ្វើ​ដំណើរ​ទៅកាន់​ប្រទេស​ឥណ្ឌូនេស៊ី នៅ​ថ្ងៃ​ទី​១៣ ខែ​ធ្នូ ហើយ​នៅ​ថ្ងៃ​ទី​១៤ និង​ទី​១៥ ខែ​ធ្នូ លោក​នឹង​បន្ត​ដំណើរ​ទៅកាន់​ប្រទេស​ម៉ាឡេស៊ី និង​ថៃ។ ទស្សនកិច្ច​របស់​លោក Antony Blinken នៅ​បី​ប្រទេស​នេះ ផ្ដោត​សំខាន់​ទៅលើ​ដៃគូ​សហរដ្ឋ​អាមេរិក និង​អាស៊ាន បញ្ហា​សន្តិសុខ​តំបន់​ក្រោម​ឥទ្ធិពល​របស់​ចិន និង​បញ្ហា​ប្រទេស​ភូមា ដែល​ធ្លាក់​ក្រោម​របប​រដ្ឋប្រហារ។

ប្រភព​ដដែល​នេះ​ឱ្យ​ដឹង​ទៀត​ថា លោក Antony Blinken មក​កាន់​អាស៊ាន គឺ​ដើម្បី​សម្របសម្រួល​ឱ្យ​មាន​កិច្ចប្រជុំ​កំពូល​អាមេរិក-អាស៊ាន​ដែល​អាច​ប្រព្រឹត្ត​ទៅ​នៅ​សហរដ្ឋ​អាមេរិក នៅ​ចុង​ខែ​មករា ឬ​ខែ​កុម្ភៈ ឆ្នាំ​២០២២ តាម​សំណើ​របស់​លោក​ប្រធានាធិបតី ចូ បៃដិន។

យ៉ាងណា នៅ​ឆ្នាំ​២០២២ គឺ​កម្ពុជា​ជា​ប្រធាន​អាស៊ាន​ដែល​កំពុងតែ​ធ្វើ​ឱ្យ​មាន​ការ​ព្រួយបារម្ភ​អំពី​សមត្ថភាព និង​ភាព​អព្យាក្រឹត្យ​របស់​កម្ពុជា ដែល​គេ​ចោទ​ថា​ជា​ប្រទេស​មួយ​នៃ​សមាគម​អាស៊ាន​នៅ​ក្រោម​ឥទ្ធិពល​ចិន​ខ្លាំង​ជាងគេ។

នាយករដ្ឋមន្ត្រី​កម្ពុជា លោក ហ៊ុន សែន នៅ​ថ្ងៃ​ទី​៩ ធ្នូ នេះ បាន​និយាយ​ថា លោក​នឹង​ដឹកនាំ​ប្រតិភូ​អាស៊ាន​ទៅ​កាន់​សហរដ្ឋ​អាមេរិក ដើម្បី​បើក​កិច្ចប្រជុំ​កំពូល​ជាមួយ​មេដឹកនាំ​អាមេរិក ដែល​លោក​ថា​រូបលោក និង​លោក បៃដិន គឺជា​អ្នក​ដឹកនាំ​ការ​ប្រជុំ​កំពូល​អាស៊ាន-អាមេរិក។ តែ​លោក​ព្រមាន​ថា បើ​អាមេរិក​ដាក់​ទណ្ឌកម្ម​លើ​រូបលោក​មិន​ឱ្យ​ជាន់​ដី​អាមេរិក គឺ​លោក​នឹង​មិន​ទៅ​អាមេរិក ដើម្បី​ប្រជុំ​អាស៊ាន-អាមេរិក​នោះ​ទេ។

មេ​រដ្ឋប្រហារ​លោក​ឧត្តមសេនីយ៍ មីន អ៊ុងឡាំង នៃ​ប្រទេស​ភូមា និង​លោក​នាយករដ្ឋមន្ត្រី ហ៊ុន សែន នៃ​ប្រទេស​កម្ពុជា។

ទំនង​បុរស​ខ្លាំង​កម្ពុជា​រូប​នេះ​ចង់​ព្រមាន​អាមេរិក​ថា បើ​លោក​មិន​ដឹកនាំ​កិច្ចប្រជុំ​អាស៊ាន គឺ​កិច្ចប្រជុំ​អាស៊ាន-អាមេរិក មិន​អាច​ដំណើរការ​បាន​ឡើយ។ តែ​បែប​ណា អ្នក​សង្កេតការណ៍​នៅ​ចាំ​មើល​ថា តើ​លោក ហ៊ុន សែន នឹង​ដឹក​ដៃ​មេ​រដ្ឋប្រហារ​ភូមា ឧត្តមសេនីយ៍ មីន អ៊ុងឡាំង ទៅ​ប្រជុំ​អាស៊ាន​លើ​ទឹកដី​អាមេរិក​បាន​ដែរ​ឬ​ទេ ស្រប​ពេល​ដែល​មេដឹកនាំ​យោធា​ភូមា​រូប​នេះ មិន​អាច​អនុវត្ត​បាន​នូវ​យន្តការ ៥​ចំណុច​ក្នុង​ការ​បញ្ចប់​វិបត្តិ​នៅ​ប្រទេស​ភូមា ដែល​បាន​ស្នើ​ឡើង​ដោយ​មេដឹកនាំ​អាស៊ាន​កាលពី​ថ្ងៃ​ទី​២៤ ខែ​មេសា កន្លងទៅ​នេះ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស