មេរោគកូវីដបំប្លែងខ្លួនថ្មី អូមីក្រុង (Omicron) លេចឡើងដំបូងគេកាលពីខែវិច្ឆិកា នៅក្នុងប្រទេសអាហ្រ្វិកខាងត្បូង។ ប្រទេសមួយនេះកាលពីថ្ងៃសុក្រ ទី១៧ ខែធ្នូ ទទួលស្គាល់ថា Omicron ឆ្លងខ្លាំងពិតមែន តែមិនបង្កឱ្យមានអាការៈធ្ងន់ធ្ងរ ឬក៏ស្លាប់ច្រើនទេ។ បែបនេះក៏ដោយ បណ្ដាប្រទេសនៅអឺរ៉ុប ហាក់ភ័យជាខ្លាំង។
នៅសហរដ្ឋអាមេរិក លោក ចូ បៃដិន បានព្រមានថា អ្នកមិនចាក់ថ្នាំបង្ការជំងឺកូវីដ អាចនឹងធ្លាក់ខ្លួនឈឺធ្ងន់ និងស្លាប់នៅរដូវរងា ដែលកំពុងចូលមកដល់នេះ។ លោកថាមានតែការចាក់វ៉ាក់សាំងទេដែលអាចការពារពីមេរោគបំប្លែងខ្លួនថ្មីនេះបាន។ លោកបន្តថា Omicron បានមកដល់អាមេរិកហើយ។
ចំណែកក្រុមរដ្ឋមន្ត្រីនៃក្រសួងសុខាភិបាលនៃប្រទេសមហាឧស្សាហកម្ម G-7 រួមមាន អង់គ្លេស អាមេរិក បារាំង កាណាដា អាល្លឺម៉ង់ អ៊ីតាលី និងជប៉ុន ដែលបានជួបប្រជុំគ្នានៅថ្ងៃទី១៦ ធ្នូ បានសម្ដែងការព្រួយបារម្ភយ៉ាងខ្លាំង ព្រោះចំនួនអ្នកឆ្លងបានកើនលឿនខ្លាំង។ នៅក្នុងសេចក្តីថ្លែងការណ៍នៃប្រទេស G-7 បានលើកឡើងថា Omicron ជាមេរោគគំរាមកំហែងសុខភាពសាធារណៈពិភពលោកខ្លាំងណាស់ ដែលពិភពលោកចាំបាច់ត្រូវមានកិច្ចសហប្រតិបត្តិការរួមគ្នាដោយចែកចាយវ៉ាក់សាំង និងថ្នាំព្យាបាលកូវីដដោយស្មើភាព។
ក្រុមរដ្ឋមន្ត្រីក្រសួងសុខាភិបាលនៃប្រទេស G-7 យល់ស្របគ្នានឹងការពន្លឿនយុទ្ធនាការចាក់ថ្នាំបង្ការដូសជំរុញ និងការធ្វើតេស្ដឱ្យបានទៀងទាត់ ព្រោះ Omicron មានភាពឆ្លងលឿន។ កាលពីថ្ងៃទី១៥ ធ្នូ កាសែត The Economics បានធ្វើសន្ទស្សន៍នៃការវាយតម្លៃទៅលើពលរដ្ឋដែលបានចាក់វ៉ាក់សាំងពីរដូស និងចាក់ ៣ដូស។ តាមការសន្និដ្ឋានរបស់ The Economics ពលរដ្ឋដែលបានចាក់វ៉ាក់សាំងបានពីរដូស ត្រូវបានចាត់ទុកថាអាចទប់ទល់នឹងមេរោគកូវីដ-១៩ ប៉ុន្តែសម្រាប់ Omicron ថ្មីនេះអាចមានការប្រែប្រួល ដែលចាំបាច់ត្រូវរកការចាក់វ៉ាក់សាំងដូសទី៣ ដែលគេហៅថាដូសបង្កើនប្រសិទ្ធភាពប្រឆាំងមេរោគ។
តាមអ្នកជំនាញផ្នែកសុខភាព មេរោគនេះបង្ហាញរោគសញ្ញាលឿន តែវាបង្កឱ្យមានស្ថានភាពធ្ងន់ធ្ងរខ្លះដែរ ដែលចាំបាច់ទៅព្យាបាលនៅមន្ទីរពេទ្យ។ ការព្យាបាលលើអ្នកឆ្លងមេរោគប្រភេទនេះ ក៏ត្រូវមានការប្រុងប្រយ័ត្នដែរ។
តាមការសិក្សាមួយពីប្រទេសអង់គ្លេស និងអាហ្រ្វិកខាងត្បូង បានបង្ហាញថា ភាពឆ្លងរបស់ Omicron គឺពី ៣ ទៅ ៨ដង ឆ្លងលឿនជាងមេរោគប្រភេទ Delta។
បើតាមទិន្នន័យ និងការស្រាវជ្រាវរបស់ប្រទេសអង់គ្លេស កម្រិតនៃការការពារប្រឆាំងមេរោគនេះសម្រាប់អ្នកចាក់វ៉ាក់សាំងបាន ២ដូសទាំង AstraZeneca និង Pfizer-BioNTech អាចទប់ទល់បានក្នុងកម្រិតទាប បើឆ្លងមេរោគ Omicron តែសម្រាប់មេរោគ Delta គឺមិនជាបញ្ហាធ្ងន់ធ្ងរឡើយ។ តែនៅតែមានដំណឹងល្អ ទោះបីជាមានការធ្លាក់ចុះនៃប្រព័ន្ធការពារក៏ដោយ គឺលទ្ធផលបានពីអាហ្វ្រិកខាងត្បូង បង្ហាញថា ការឆ្លងពីមុនក៏មានការកាត់បន្ថយហានិភ័យបានដល់ ២ភាគ៣ ដែរ។ លើសពីនេះទៅទៀត ប្រសិទ្ធភាពវ៉ាក់សាំងប្រឆាំងនឹងការឆ្លងតាមរោគសញ្ញាបាន ៧៥% ដែរសម្រាប់ដូសជំរុញតែម្ដង។ មានគន្លឹះការពារមួយចំនួនសម្រាប់ពលរដ្ឋដែលបានចាក់បាន ២ដូសហើយ បើទោះបីជាអត្រាសុខុមប្រាណហួសប្រសិទ្ធភាពក៏ដោយក្ដី។
ការប្រែប្រួលនេះ វាផ្អែកទៅតាមប្រសិទ្ធភាពនៃការការពារដែលត្រូវមានវិធានការថ្មី ក្នុងការវាយតម្លៃទៅលើប្រទេសដែលមានការការពារខ្ពស់ប្រឆាំងនឹងរលកនៃការឆ្លងនេះ។ ប្រទេសជាច្រើនដែលអាចការពារប្រឆាំងនឹងមេរោគ Delta ក្នុងអត្រាខ្ពស់ ដោយការចាក់វ៉ាក់សាំងចំនួន ២ដូស។
គេអាចនិយាយបានថា ប្រទេសដែលអាចការពារអូមីក្រុងបានល្អ ជាប្រទេសដែលរដ្ឋបាលជំរុញការចាក់វ៉ាក់សាំងមានពលរដ្ឋចាក់ចាប់ពីពីរដងឡើងទៅ និងធ្លាប់ឆ្លងជំងឺកូវីដពីមុនមក។ ចំពោះប្រទេសណា ឬពលរដ្ឋណាចាក់បាន ២ដូសឡើងទៅ ហើយមានអត្រាចាក់បានច្រើនបំផុត គឺប្រទេសនោះក៏អាចឆ្លងដែរ។ នៅលើពិភពលោក ប្រទេសដែលបានចាក់វ៉ាក់សាំងចាប់ពី ២ដូសឡើងទៅមាន ១០២ប្រទេស។
ប្រទេសនៅអាមេរិកខាងត្បូង ត្រូវបានគេមើលឃើញថាមានអត្រាឆ្លងខ្ពស់ពីមុន មានកម្រិតខ្ពស់ តែពេលនេះមានអត្រាចាក់វ៉ាក់សាំងបានល្អ គឺអាចត្រៀមខ្លួនការពារបានចំពោះការមេរោគចម្លងថ្មីនេះ។ ប៉ុន្តែប្រទេសឈីលី និងអ៊ុយរ៉ាហ្កាយ គឺជាប្រទេសដែលមានកម្មវិធីចាក់វ៉ាក់សាំងជំរុញបានលឿន ដោយប្រើវ៉ាក់សាំងចិន ស៊ីណូវ៉ាក់ ដ៏ច្រើន តែប្រព័ន្ធការពារមានកម្រិតទាប ដែលចាំបាច់ត្រូវដូរទៅរកវ៉ាក់សាំងថ្មី។
នៅប្រទេសអង់គ្លេស និងអាមេរិក មានការប៉ាន់ស្មានថា កាលពីចុងខែវិច្ឆិកា គឺមានពលរដ្ឋ ៤៩ភាគរយ និងអាមេរិក ៤៣ភាគរយបានចាក់ដូសជំរុញឡើងវិញ។ ប្រទេសជាច្រើនដូចជាអូស្ត្រាលី ចិន នូវែលហ្សេឡង់ និងណ័រវេស មានកម្មវិធីវ៉ាក់សាំងខ្លាំងក្លា តែមានអ្នកងាយឆ្លងពីមេរោគថ្មីនេះដដែលដោយស្ថិតក្នុងកម្រិតទាប។
វេជ្ជបណ្ឌិត Anthony Fauci នៃសហរដ្ឋអាមេរិក បានជំរុញឲ្យប្រជាជនទាំងអស់ទៅទទួលការចាក់វ៉ាក់សាំងដូសជំរុញសិន មុននឹងធ្វើដំណើរទៅជួបជុំជាមួយមនុស្សជាទីស្រឡាញ់ ហើយក៏ត្រូវពាក់ម៉ាស់ជានិច្ចផងដែរ នៅពេលស្ថិតក្នុងទីសាធារណៈដែលមានមនុស្សជួបជុំកកកុញ។
លោក Anthony Fauci បានព្រមានថា អូមីក្រុង កំពុងរីករាតត្បាតពាសពេញពិភពលោកហើយ គឺសូម្បីតែអ្នកដែលបានចាក់វ៉ាក់សាំងបង្ការរួច ក៏អាចប្រឈមមុខនឹងការឆ្លងវីរុសបំប្លែងថ្មីនេះបានដែរ។ អ្នកជំនាញកំពូលផ្នែកជំងឺរូបនេះ បានសង្កត់ធ្ងន់ទៀតថា ចាប់តាំងពីដើមខែធ្នូ នេះ ចំនួនករណីឆ្លងមេរោគបំប្លែងថ្មីនេះនៅសហរដ្ឋអាមេរិកអាចកើនឡើង ៥០%៕