លោក ហ៊ុន សែន បញ្ជាឱ្យក្រសួងសុខាភិបាល និងអាជ្ញាធរពាក់ព័ន្ធ ពន្លឿននៃការចាក់វ៉ាក់សាំងដូសជំរុញឱ្យបានលឿនជាបន្ទាន់ ដើម្បីទប់ស្កាត់ការឆ្លងរាលដាលជំងឺ Covid-19 បំប្លែងថ្មីប្រភេទអូមីក្រុង ខណៈជំងឺនេះបានឆ្លងចូលសហគមន៍ចំនួន ១៤ករណីហើយគិតមកត្រឹមថ្ងៃចន្ទ ទី១០ ខែមករា។
បទបញ្ជារបស់លោក ហ៊ុន សែន ធ្វើឡើងបន្ទាប់ពីក្រសួងសុខាភិបាល រកឃើញមេរោគកូវីដ-១៩ បំប្លែងខ្លួនថ្មីអូមីក្រុងចំនួន ៣៤ករណី នៅថ្ងៃទី១០ ខែមករា ឆ្នាំ២០២២ ដោយក្នុងនោះនាំចូលពីក្រៅប្រទេសចំនួន ២៤ករណី និងឆ្លងចូលនៅក្នុងសហគមន៍ ១០ករណី។
តាមរយៈសារសំឡេងមួយនាយប់ថ្ងៃទី១០ ខែមករា ឆ្នាំ២០២២ នេះ លោក ហ៊ុន សែន បានបញ្ជាទៅអាជ្ញាធររាជធានី-ខេត្ត និងតាមមូលដ្ឋាននានា ពន្លឿនការចាក់វ៉ាក់សាំងដូសជំរុញដល់ប្រជាពលរដ្ឋជាបន្ទាន់ ដើម្បីឆ្លើយតបទៅនឹងវត្តមានមេរោគកូវីដ-១៩ បំប្លែងខ្លួនថ្មីអូមីក្រុងដែលកំពុងចាប់ផ្តើមរាតត្បាតក្នុងសហគមន៍។ លោកបន្តថា ជំងឺ Covid-19 ប្រភេទអូមីក្រុងបានចូលក្នុងសហគមន៍ចំនួន ១៤ករណីហើយគិតត្រឹមថ្ងៃចន្ទ ទី១០ ខែមករា ឆ្នាំ២០២២។
លោក ហ៊ុន សែន ជំរុញឱ្យអាជ្ញាធរគ្រប់លំដាប់ថ្នាក់យកចិត្តទុកដាក់ក្នុងការប្រមូលប្រជាពលរដ្ឋចាក់វ៉ាក់សាំងដូសជំរុញនេះ។ លោក ហ៊ុន សែន ថាការប្រមូល និងពន្លឿនចាក់វ៉ាក់សាំងជូនប្រជាពលរដ្ឋនេះ ដើម្បីធានាថាកម្ពុជានៅតែបន្តបើកប្រទេស ទោះបីជាជំងឺកូវីដ-១៩ អូមីក្រុងកំពុងឆ្លងចូលក្នុងសហគមន៍ក៏ដោយ។
លើសពីនេះ លោកថាអ្នកដែលអាចវ៉ាក់សាំងដូសជំរុញ ឬដូសទី៣បាន លុះត្រាតែគោរពតាមលក្ខខណ្ឌដែលបានកំណត់ដោយក្រសួងសុខាភិបាល ពោលគឺមានរយៈពេល ៤ខែ បន្ទាប់ពីទទួលដូសទី២ ប៉ុន្តែបើការចាក់ដូសទី២ មិនទាន់បានគ្រប់ ៤ខែទេ គឺក្រសួងសុខាភិបាល ឬគ្រូពេទ្យមិនអនុញ្ញាតឱ្យចាក់នោះទេ ដោយសារមិនធានានូវសុវត្ថិភាព។
ជាមួយគ្នានោះ លោក ហ៊ុន សែន បញ្ជាឱ្យយកវ៉ាក់សាំងប្រភេទ Pfizer ចាក់ឱ្យពលរដ្ឋនៅក្នុងរាជធានីភ្នំពេញ និងនៅតាមបណ្ដាខេត្តដែលបានចាក់ដូសទី៣រួច អាចឡើងមកភ្នំពេញចាក់វ៉ាក់សាំងប្រភេទ Pfizer ខណៈវ៉ាក់សាំងនេះមិនអាចឱ្យយកទៅចាក់នៅតាមបណ្ដាខេត្តបាននោះ ដោយសារពិបាកដឹកជញ្ជូន និងខ្វះទីកន្លែងរក្សាទុកវ៉ាក់សាំងនេះដែលត្រូវការសីតុណ្ហភាព។
ក្រៅពីឱ្យចាក់វ៉ាក់សាំងប្រភេទ Pfizer ដល់ពលរដ្ឋហើយ លោក ហ៊ុន សែន ក៏បានបញ្ជាឱ្យទិញវ៉ាក់សាំងចំនួន ៥លានដូសបន្ថែមទៀតសម្រាប់ចាក់ដូសជំរុញ ប៉ុន្តែលោកមិនបានបញ្ជាក់ទេថា វ៉ាក់សាំង ៥លានដូសនឹងត្រូវទិញនៅប្រទេសណានោះទេ។
គិតត្រឹមថ្ងៃទី១០ ខែមករា ឆ្នាំ២០២២ ក្រសួងសុខាភិបាល រកឃើញឆ្លងជំងឺ Covid-19 អូមីក្រុងឆ្លងចូលក្នុងសហគមន៍ចំនួន ៤ករណីហើយ ក្រោយពីក្រសួងរកឃើញលើបុរសជនជាតិខ្មែរម្នាក់អាយុ ២៣ឆ្នាំ ស្នាក់នៅសង្កាត់ទួលសង្កែ ខណ្ឌឫស្សីកែវ រាជធានីភ្នំពេញ។
ការរកឃើញមានវិជ្ជមានវីរុស Covid-19 អូមីក្រុង នេះ បន្ទាប់ពីបុរសរូបនេះបានទៅកំដរអ្នកជំងឺដែលជាបងប្អូនជីដូនមួយរបស់គាត់នៅមន្ទីរពេទ្យមួយនៅថ្ងៃទី៥ ខែមករា ឆ្នាំ២០២២ ក្នុងរាជធានីភ្នំពេញ។
បុរសជនជាតិខ្មែរដែលមានវិជ្ជមាន Covid-19 អូមីក្រុង បានធ្វើដំណើរទៅកន្លែងជាច្រើនចាប់តាំងពីថ្ងៃទី២៧ ខែធ្នូ ឆ្នាំ២០២១ ដល់ថ្ងៃទី៥ ខែមករា ឆ្នាំ២០២២ ក្នុងនោះមានរាជធានីភ្នំពេញ ខេត្តកំពង់ធំ ខេត្តសៀមរាប និងទៅលេងទីតាំងមួយចំនួនទៀតដោយធ្វើដំណើរជាមួយបងប្អូនជីដូនមួយមកពីប្រទេសអូស្ត្រាលី កាលពីថ្ងៃទី២៧ ខែធ្នូ ឆ្នាំ២០២១។
គិតត្រឹមថ្ងៃទី១០ ខែមករា ឆ្នាំ២០២២ កម្ពុជារកឃើញអ្នកឆ្លងជំងឺ Covid-19 ចំនួនជាង ១២ម៉ឺននាក់ (១២០៦៣៦នាក់) ដោយក្នុងនោះ ករណីនាំចូលពីក្រៅប្រទេសចំនួនជាង ២ម៉ឺននាក់ (២០០៤៨នាក់) ខណៈអ្នកជំងឺព្យាបាលជាសះស្បើយចំនួនជាង ១១ម៉ឺន ៧ពាន់នាក់ (១១៧០២៣នាក់) និងអ្នកស្លាប់ជាង ៣ពាន់នាក់ (៣០១៥នាក់)៕