ប្រទេសរុស្ស៊ី ដែលរងការដាក់ទណ្ឌកម្មសេដ្ឋកិច្ចដ៏ធ្ងន់ធ្ងរមិនធ្លាប់មានពីបស្ចិមប្រទេស ដោយសារតែលើកទ័ពធ្វើសង្គ្រាមឈ្លានពានអ៊ុយក្រែន ត្រូវបានរាយការណ៍មកថាបានស្វែងរកជំនួយអាវុធពីប្រទេសចិន។
ដោយទទួលដំណឹងនេះភ្លាម សហរដ្ឋអាមេរិកបានធ្វើការព្រមានចិន កុំឱ្យធ្វើតាមសំណើរបស់រុស្ស៊ី បើពុំដូច្នោះទេ នោះប្រឈមមុខនឹងផលវិបាកធ្ងន់ធ្ងរ។
នៅក្នុងបទសម្ភាសន៍ជាមួយបណ្ដាញផ្សាយព័ត៌មាន CNN ទីប្រឹក្សាសន្តិសុខជាតិអាមេរិក លោក Jake Sullivan បាននិយាយថា ក្រុងវ៉ាស៊ីនតោនមានជំនឿថា ចិននឹងមិនធ្វើតាមសំណើរបស់រុស្ស៊ីនោះទេ ទោះជារុស្ស៊ីបញ្ចុះបញ្ចូលយ៉ាងណាក៏ដោយ។ បើតាមទីប្រឹក្សារូបនេះឲ្យដឹងថា សហរដ្ឋអាមេរិកបានដាក់ការឃ្លាំមើលយ៉ាងខ្លាំង ដោយតាមដានសកម្មភាពរបស់ចិន ថាតើធ្វើតាមសំណើរបស់រុស្ស៊ី ឬយ៉ាងណា។
លោក Jake Sullivan បានស្នើថា ចិនគួរចូលរួមជាមួយសហគមន៍អន្តរជាតិក្នុងការដាក់ទណ្ឌកម្មលើប្រទេសរុស្ស៊ី គឺមិនត្រូវធ្វើតាមផែនការរបស់ប្រទេសរុស្ស៊ី នោះទេ។ ទីប្រឹក្សាសន្តិសុខជាតិអាមេរិកបានបញ្ជាក់ដូចនេះនៅក្នុងសន្និសីទសារព័ត៌មានមួយកាលពីថ្ងៃទី១៣ ខែមីនា ភ្លាមៗបន្ទាប់ពីអាមេរិកទទួលដំណឹងថា រុស្ស៊ីកំពុងស្វែងរកជំនួយយោធាពីប្រទេសចិន។
រុស្ស៊ី និងចិន ជាប្រទេសដែលមានព្រំដែនជាប់គ្នារាប់រយគីឡូម៉ែត្រ។ ប្រទេសមហាអំណាចពីរនេះធ្លាប់បើកទ្វារព្រំដែនធ្វើសង្គ្រាមវាយប្រយុទ្ធគ្នាអស់រយៈពេលជាច្រើនខែនៅឆ្នាំ១៩៦៩ ដែលកាលនោះ រុស្ស៊ីស្ថិតក្នុងសហភាពសូវៀត ហើយចិនស្ថិតនៅក្រោមការដឹកនាំរបស់មេដឹកនាំ ម៉ៅ សេទុង។
ជម្លោះរុស្ស៊ី-ចិន បានបិទបញ្ចប់ក្រោមការទទួលយកបទឈប់បាញ់គ្នា ប៉ុន្តែនៅមួយទសវត្សចុងក្រោយនេះ ចិននិងរុស្ស៊ី ក្លាយជាមិត្តយ៉ាងស្និទ្ធស្នាលនឹងគ្នា ដោយមានកិច្ចព្រមព្រៀងរួមក្នុងការរួមកម្លាំងគ្នាប្រឆាំងនឹងក្រុមបស្ចិមប្រទេសដែលដឹកនាំដោយសហរដ្ឋអាមេរិក។
នៅមុនពេលដែលរុស្ស៊ី លើកទ័ពឈ្លានពានអ៊ុយក្រែន នៅថ្ងៃទី២៤ កុម្ភៈ មេដឹកនាំរុស្ស៊ី លោក វ៉្លាឌីមៀរ ពូទីន បានធ្វើដំណើរទៅកាន់ទីក្រុងប៉េកាំង តាមការអញ្ជើញរបស់ប្រធានាធិបតីចិន ស៊ី ជីនពីង ឲ្យចូលរួមបើកព្រឹត្តិការណ៍កីឡាអូឡាំពិករដូវរងានៅទីក្រុងប៉េកាំង។ ក្នុងជំនួបនោះ មេដឹកនាំទាំងពីរបានបង្ហាញភាពស្និទ្ធស្នាលនឹងគ្នាជាខ្លាំង ហើយក៏មានការចុះកិច្ចព្រមព្រៀងទ្វេភាគីជាច្រើនទាំងវិស័យសេដ្ឋកិច្ច និងវិស័យយោធា។
លោក ស៊ី បានបង្ហាញជំហរគាំទ្ររុស្ស៊ី ដែលទប់ទល់អនុត្តរភាពរបស់ក្រុមបស្ចិមប្រទេសក្នុងការពង្រីកកម្លាំងយោធានៅអឺរ៉ុបខាងកើត។ ក្រោយត្រឡប់ពីប្រទេសចិន វិញ គេសង្កេតឃើញលោក ពូទីន បង្ហាញអំនួត ហើយបង្កើនការពង្រាយទ័ពឡោមព័ទ្ធអ៊ុយក្រែនកាន់តែច្រើនឡើងរហូតដល់រុស្ស៊ី លើកទ័ពឈ្លានពានអ៊ុយក្រែន នៅថ្ងៃទី២៤ ខែកុម្ភៈ។ ប្រទេសលោកខាងលិច បានចោទចិនថាបានដឹងអំពីពេលវេលាជាក់លាក់ដែលរុស្ស៊ីបើកទ្វារសង្គ្រាមលុកលុយអ៊ុយក្រែន។ ទោះជាយ៉ាងណាក៏ដោយ ក្រុងប៉េកាំងព្យាយាមបដិសេធ។
នៅឯកិច្ចប្រជុំនៃក្រុមប្រឹក្សាសន្តិសុខអង្គការសហប្រជាជាតិ ចិនបានបោះឆ្នោតអនុប្បវាទករណីរុស្ស៊ីលើកទ័ពឈ្លានពានអ៊ុយក្រែន ខណៈប្រទេស ១១ ទៀត ក្នុងចំណោមសមាជិកក្រុមប្រឹក្សា ១៥ប្រទេស បានបោះឆ្នោតថ្កោលទោសរុស្ស៊ី។
អ្នកសង្កេតការណ៍យល់ថា ចិនបានដូរជំហរថយក្រោយបន្តិច ដែលមើលទៅចិនមិនពេញចិត្តការដែលសភារុស្ស៊ី និងលោក ពូទីន ក្នុងឋានៈជាប្រធានាធិបតីប្រកាសទទួលស្គាល់តំបន់ចំនួនពីរដែលពួកឧទ្ទាមវាយបំបែករដ្ឋពីអ៊ុយក្រែន គឺតំបន់ Donetsk និង Luhansk ជាសាធារណរដ្ឋឯករាជ្យ។ គេថាចិនបោះឆ្នោតអនុប្បវាទ ព្រោះចិនមិនចង់ឃើញតំបន់ទីបេ តំបន់ស៊ីនជាំង និងកោះតៃវ៉ាន់ ជាតំបន់ឯករាជ្យឡើយ។ យ៉ាងណាក៏ដោយ ទណ្ឌកម្មជុំជិតទៅលើប្រទេសរុស្ស៊ី បាននាំឲ្យចិន យ៉ាងហោចណាស់ក៏ពិចារណាផងដែរអំពីផលវិបាកសេដ្ឋកិច្ច ប្រសិនបើចិនជួបប្រទះដូចរុស្ស៊ី។
មូលនិធិរូបិយវត្ថុអន្តរជាតិ IMF ព្រមានថា ទណ្ឌកម្មទៅលើរុស្ស៊ី ក៏ប៉ះពាល់ផងដែរទៅលើសេដ្ឋកិច្ចប្រទេសចិន។
នាយកគ្រប់គ្រង IMF អ្នកស្រី Kristalina Georgieva និយាយថា សេដ្ឋកិច្ចចិន ស្ទុះឡើង ៥,៥% ហើយចិននឹងជួបវិបត្តិភ្លាមៗ ប្រសិនបើទណ្ឌកម្មរបស់ក្រុមប្រទេសសេដ្ឋកិច្ចជឿនលឿនធ្វើឡើងទៅលើប្រទេសចិន។ អ្នកស្រីនាយកគ្រប់គ្រង IMF បានស្នើឲ្យចិនឆាប់ជួយបញ្ចប់សង្គ្រាមនៅអ៊ុយក្រែន ដោយសហការជាមួយសហគមន៍អន្តរជាតិគាបសង្កត់ប្រទេសរុស្ស៊ី។
រដ្ឋមន្ត្រីហិរញ្ញវត្ថុរុស្ស៊ី លោក Anton Siluanov បាននិយាយថា ទណ្ឌកម្មសេដ្ឋកិច្ចរបស់បស្ចិមប្រទេស បានផ្អឹបជិតពាក់កណ្តាលនៃទ្រព្យសម្បត្តិរបស់រុស្ស៊ី ដែលមានដូចជា មាស និងរូបិយប័ណ្ណបរទេសប្រមាណ ៣០០ពាន់លានដុល្លារអាមេរិក។ លោករដ្ឋមន្ត្រីក្រសួងហិរញ្ញវត្ថុរុស្ស៊ី សង្ឃឹមថា ចិននឹងជួយទប់សេដ្ឋកិច្ចរុស្ស៊ី ក្នុងការទប់ទល់នឹងការដាក់ទណ្ឌកម្មសេដ្ឋកិច្ចដ៏ធ្ងន់ធ្ងរនេះ។
នៅក្រោយសង្គ្រាមឈ្លានពានរុស្ស៊ី នៅអ៊ុយក្រែន ក្រុមបស្ចិមប្រទេសបានដាក់ទណ្ឌកម្មសេដ្ឋកិច្ចយ៉ាងខ្លាំងទៅលើប្រព័ន្ធហិរញ្ញវត្ថុរុស្ស៊ី និងបណ្តាក្រុមហ៊ុនមហាសេដ្ឋីរុស្ស៊ី ដែលមានទំនាក់ទំនងជិតស្និទ្ធនឹងលោកប្រធានាធិបតី ពូទីន។
រដ្ឋមន្ត្រីហិរញ្ញវត្ថុរុស្ស៊ី លោក Anton Siluanov អះអាងថា ទុនបម្រុងបរទេសរបស់រុស្ស៊ីជិតពាក់កណ្តាលប្រមាណ ៣០០ពាន់លានដុល្លារនៅក្នុងចំណោម ៦៤០ពាន់លានដុល្លារ ត្រូវបានបង្កក។
ទោះជាយ៉ាងនេះក្ដី លោករដ្ឋមន្ត្រីហិរញ្ញវត្ថុរុស្ស៊ី បានបង្ហាញក្តីសង្ឃឹមទៅលើជំនួយសហការពីប្រទេសចិន ដែលមិនបានចូលរួមថ្កោលទោសរុស្ស៊ី ដែលសម្រេចធ្វើសង្គ្រាមនៅអ៊ុយក្រែន។ តែផ្ទុយទៅវិញ ចិនបានសុំដើរតួនាទីជាអ្នកសម្របសម្រួលជម្លោះរវាងរុស្ស៊ី និងអ៊ុយក្រែន ដោយសុំឱ្យប្រទេសពីរនេះទុកចិត្តលើចិន ព្រោះថាចិនមិនចង់ឃើញសង្គ្រាមអូសបន្លាយនោះទេ។
ក្រុងប៉េកាំង ក៏បានស្នើឱ្យមានបទឈប់បាញ់គ្នា ត្រូវបានអនុវត្តតាមរយៈការចរចា និងយោគយល់គ្នាឡើងវិញ៕