រដ្ឋមន្ត្រីក្រសួងមហាផ្ទៃ លោក ស ខេង អនុញ្ញាតឲ្យប្រើកម្លាំងប្រជាការពារបន្ថែមលើកម្លាំងនគរបាល និងកងរាជអាវុធហត្ថ ដើម្បីជួយគាំទ្ររក្សាសន្តិសុខ និងអស្ថិរភាពសង្គមនៅក្នុងដំណាក់កាលមុន និងក្រោយការបោះឆ្នោត។
ថ្លែងនៅក្នុងកិច្ចប្រជុំផ្សព្វផ្សាយផែនការអន្តរស្ថាប័នស្ដីពីកិច្ចការងារពិនិត្យបញ្ជីឈ្មោះ និងការបោះឆ្នោតថ្នាក់ជាតិ ឬថ្នាក់ក្រោមជាតិកាលពីថ្ងៃទី២៨ មីនា លោក ស ខេង អះអាងថា កិច្ចការអាទិភាពចំពោះមុខសម្រាប់អាជ្ញាធរពាក់ព័ន្ធ គឺការការពារសន្តិសុខសម្រាប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៥។
លោក ស ខេង បន្ថែមថា លោកយល់ព្រមឱ្យមានការប្រើកម្លាំងប្រជាការពារបន្ថែមលើកម្លាំងនគរបាល និងកងរាជអាវុធហត្ថ ដើម្បីជួយគាំទ្ររក្សាសន្តិសុខសម្រាប់ការបោះឆ្នោត ដោយត្រូវមានការបណ្ដុះបណ្ដាលអំពីគោលការណ៍សំខាន់មួយចំនួនដល់ពួកគេផងដែរ។ លោកថា គណៈបញ្ជាការឯកភាពរដ្ឋបាលរាជធានី-ខេត្តដែលជាក្បាលម៉ាស៊ីនដឹកនាំសំខាន់នៅថ្នាក់ក្រោមជាតិ ត្រូវលើកកម្ពស់តួនាទី និងទទួលខុសត្រូវរបស់ខ្លួនក្នុងការដឹកនាំសម្របសម្រួលសន្តិសុខនៃការបោះឆ្នោត ដើម្បីធានាឱ្យមានកម្លាំងសមត្ថកិច្ចគ្រប់គ្រាន់សម្រាប់ផ្តល់សេវាសន្តិសុខ សុវត្ថិភាពគ្រប់ដំណាក់កាលនៃការបោះឆ្នោត។
លោកថា អាជ្ញាធរត្រូវយកចិត្តទុកដាក់គ្រប់គ្រងសភាពការណ៍សន្តិសុខក្នុងមូលដ្ឋានឱ្យកាន់តែល្អប្រសើរ ជាពិសេសត្រូវទប់ស្កាត់ឱ្យបាននូវការកេងចំណេញនានាពីការប្រកួតប្រជែងខាងនយោបាយ ព្រមទាំងត្រូវបញ្ចៀសឱ្យបាននូវរាល់អំពើហិង្សា ការបង្កអសន្តិសុខ និងអស្ថិរភាពសង្គម ទាំងមុន អំឡុងពេល និងក្រោយការបោះឆ្នោត។
អនុប្រធានគណបក្សកែទម្រង់កម្ពុជា លោក អ៊ូ ច័ន្ទរ័ត្ន អះអាងថា ការថ្លែងរបស់លោក ស ខេង ធ្វើឡើងជាច្រើនដងហើយ តែអ្វីដែលសំខាន់ថាតើមន្ត្រីថ្នាក់ក្រោមមានឆន្ទៈក្នុងការអនុវត្ត ឬយ៉ាងណានោះ។ លោកបន្តថា លោកឃើញថ្នាក់ជាតិហាក់ដូចជាមានតែអនុសាសន៍ម្តងម្កាល ហើយថ្នាក់ក្រោមធ្វើអីហាក់ដូចជាធ្វើទៅតាមការយល់ឃើញខ្លួនឯង។ លោកថា អ្នកដែលមានការគំរាមកំហែងទៅគណបក្សដទៃ ដូចជាមិនមានទទួលជាការណែនាំ ឬទោសទណ្ឌនោះទេ។
លោកបន្តថា ការប្រើប្រាស់ប្រជាការពារនេះអាចមិនមានប្រសិទ្ធភាពនោះទេ ហើយពេលខ្លះប្រជាការពារនេះហាក់មិនមានទំនុកចិត្តពីពលរដ្ឋនោះដែរ។ ទោះជាយ៉ាងណាក៏ដោយ លោកអំពាវនាវឲ្យលោក ស ខេង គួរបន្ថែមប្រាក់ខែឲ្យនគរបាលធ្វើការថែមម៉ោងលើកិច្ចការនេះអាចប្រសើរជាង។
លោក សំ គន្ធាមី នាយកប្រតិបត្តិនិចហ្វិក ដែលជាអង្គការឃ្លាំមើលការបោះឆ្នោត ប្រាប់សារព័ត៌មានក្នុងស្រុកថា លោកសាទរចំពោះការលើកឡើងរបស់រដ្ឋមន្ត្រីក្រសួងមហាផ្ទៃ ព្រោះអាចនឹងធានាឱ្យការបោះឆ្នោតដោយសេរី ត្រឹមត្រូវ និងយុត្តិធម៌។ លោកថា ដើម្បីធានាឱ្យការបោះឆ្នោតដំណើរការដោយរលូន គ្មានអំពើហិង្សា និងគ្មានការគំរាមកំហែង ទាមទារឱ្យមានការចូលរួមពីគ្រប់អាជ្ញាធរពាក់ព័ន្ធ រួមទាំងកងកម្លាំងប្រដាប់អាវុធ។
លោកជំរុញឱ្យមានការដាក់ពិន័យឱ្យបានម៉ឺងម៉ាត់តាមផ្លូវច្បាប់ក្នុងករណីដែលអាជ្ញាធរពាក់ព័ន្ធដែលបណ្តែតបណ្តោយឱ្យមានហិង្សា និងការរំលោភសិទ្ធិលើគណបក្សនយោបាយណាមួយក្នុងដំណើរការបោះឆ្នោតនោះ។
កន្លងមក បុរសខ្លាំងកម្ពុជា លោក ហ៊ុន សែន ប្ដេជ្ញាមិនឱ្យមានអំពើហិង្សា ឬមានអ្នករបួស និងស្លាប់ដោយសារការបោះឆ្នោតឆ្នាំ២០២២ និង ២០២៣ ខាងមុខទេ។ លោកបានអំពាវនាវឲ្យអាជ្ញាធរមូលដ្ឋានបង្កលក្ខណៈឲ្យគណបក្សទាំងអស់មានសិទ្ធិជួបជុំសមាជិកសមាជិកា និងលើកស្លាកដូចគណបក្សកាន់អំណាច។
គិតត្រឹមដំណាច់ខែមករា ឆ្នាំ២០២២ នេះ កម្ពុជាមានគណបក្សនយោបាយចំនួន ៤៥ ដែលត្រូវបានក្រសួងមហាផ្ទៃសម្រេចចុះបញ្ជីផ្លូវការទៅក្នុងបញ្ជីគណបក្សនយោបាយនៅក្រសួងមហាផ្ទៃ។
កម្ពុជាគ្រោងនឹងរៀបចំការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៥ នៅថ្ងៃទី៥ ខែមិថុនា ឆ្នាំ២០២២ និងត្រូវរៀបចំការបោះឆ្នោតជ្រើសតាំងតំណាងរាស្ត្រអាណត្តិទី៧ នៅឆ្នាំ២០២៣ ផងដែរ៕